CIBEELA 4
Mulimo Ngwaakacita Jesu Kumbele mu Judaya
“Amulombe Simalelo wabutebuzi kuti atume Babelesi.”—LUKA 10:2
MUCIBEELA EECI
CIBALO 66
Ku Jerusalemu ku Pobwe lya Zivwuka
Ino ncinzi cakapa baabo ibakali kumuswiilila Jesu kuyeeya kuti wakanjidwe daimona?
CIBALO 67
“Takunabede Muntu Waambaula Bobuya”
Mubwini, boonse bamunkuta mpati yaba Juda tabamuyandi Jesu, pele omwe munkuta eeyi waba acamba cakwaambaula akumwiiminina.
CIBALO 68
Mwana wa Leza “Mumuni Wanyika”
Jesu wakaamba kuti “kasimpe kayoomwaangununa.” Kwaangunuka kunzi?
CIBALO 69
Ino Swaabo Nguni—Ngu Abrahamu Naa Diabolosi?
Jesu waamba mbobakonzya kuzyibwa bana ba Abrahamu, alimwi akuti Bausyi mbaani ncobeni.
CIBALO 70
Jesu Waponya Muntu Wakazyalwa Kali Moofwu
Basikwiiya babuzya kaambo muntu ooyu ncaakazyalwa kali moofwu. Sena wakabisya? Sena bazyali bakwe bakabisya? Bantu baindana mbobacita ciindi Jesu naaponya muntu ooyu.
CIBALO 71
Ba Farisi Bamuzumanana Muntu Iwakali Moofwu
Muntu iwakali moofwu iwaamba twaambo tumvwika wabanyemya ba Farisi. Cacitika ncimunya ncobali kuyoowa bazyali bakwe, ba Farisi bamutanda mucikombelo.
CIBALO 72
Jesu Watuma Basikwiiya Bali 70 Kuyookambauka
Mu Judaya, Jesu watuma basikwiiya bali 70 mutukamu twabantu bobilo-bobilo kuyookambauka Bwami. Ino basikwiiya aaba bayoobajana kuli bantu bakukambaukila, mucikombelo naa mumaanda aabantu?
CIBALO 73
Mu Samariya Watondezya Kuti Ngusimukobonyina
Ino mbuti Jesu mbwaabelesya caano camu Samariya mubotu kuyiisya ciiyo cipati?
CIBALO 74
Ziiyo Zijatikizya Kusamausya Beenzu Alimwi Akupaila
Jesu waswaya Mariya a Marta kuŋanda yabo. Ino ncinzi ncaabayiisya kujatikizya kusamausya beenzu? Alimwi ino mbuti kumbele mbwaayiisya basikwiiya bakwe kujatikizya ncobeelede kupailila?
CIBALO 75
Jesu Watondezya Cini Cipa Kukkomana
Jesu wabavwiila basikumukazya, wabaambila kujatikizya “munwe wa Leza” alimwi a Bwami bwa Leza mbobwabasikila cakutayeeyela. Alimwi watondezya mbobakonzya kuba alukkomano lwini-lwini bantu.
CIBALO 76
Jesu Walya amu Farisi
Jesu wabasinsa balembi aba Farisi basikuupaupa ameso mumakani aabukombi. Ino mikuli nzi milemu njobatukka bantu?
CIBALO 77
Jesu Wapa Lulayo Kujatikizya Buvwubi
Jesu waamba cikozyanyo camuntu muvwubi iwakayaka matala mapati. Ino ndulayo nzi ndwaainduluka kujatikizya ntenda iiliko mukuyandaula buvwubi?
CIBALO 78
Kamulibambilide Lyoonse, Mubanzi Uusyomeka
Jesu watondezya kuti ulibikkilide maano kubona kuti basikwiiya bakwe mbayumu kumuuya. Ino mulimo nzi ngwanakucita mubanzi mukupa kuti bazumanane kuyuma kumuuya? Nkaambo nzi lulayo lujatikizya kuba bantu balibambilide lyoonse ncoluyandika?
CIBALO 79
Ilunyonyooko Ncolucili Kumbele
Jesu waamba kuti aabo mbasola kugwasya bayoonyonyoonwa ikuti bateempwi. Sena balacibikkila maano ciiyo ciyandika kapati ncali mukubayiisya Jesu kujatikizya kuyeeya mbocibede cilongwe cabo a Leza?
CIBALO 80
Mweembezi Mubotu Alimwi Azyaanda Zyambelele
Mweembezi mbwazilanganya mbelele zyakwe ncitondezyo cibotu icitondezya Jesu mbwalimvwa kujatikizya basikwiiya bakwe. Sena banoozibikkila maano njiisyo zyakwe akutobela busolozi bwakwe?
CIBALO 81
Mbamwi a Bausyi, Pele Tali Leza
Bantu bamwi ibamukazya Jesu bamutamikizya kuti ulipa kweelana a Leza. Ino mbuti cabusongo mbwaaikazya milandu yakubeja njobamupa?
