Ba Farisi baakaka makani aakuti Jesu nguwakamupa kutalika kubona muntu iwakazyalwa kali moofwu, aboobo baita bazyali bakwe. Bazyali bakwe balizyi kuti balalangilwa “kutandwa mucikombelo.” (Johane 9:22) Ikutandwa ooku naa kuleka kuyanzana aba Judanyina bambi kulakonzya kuuletela mapenzi mapati mukwasyi wabo mumakani aabukkale bwabo muciinga alimwi aakujana zintu zyakuligwasya.

Ba Farisi babuzya mibuzyo yobilo, kuti: “Sena ooyu ngomwanaanu ngomwaamba kuti wakazyalwa kali moofwu? Pele ino caba buti kuti lino ulabona?” Bazyali bakwe baingula kuti: “Tulizyi kuti ooyu mwaneesu akuti wakazyalwa kali moofwu. Pele mbwaatalika kubona tatuzyi pe; naba yooyo wakamujalula meso tatumuzyi pe.” Nokuba kuti mwanaabo wakalibaambilide cakacitika, bazyali bakwe babona kuti beelede kucenjela mukwiingula kwabo, eelyo baamba kuti: “Kamumubuzya, mupati. Ulalyaambilila mwini.”—Johane 9:19-21.

Aboobo, ba Farisi bamwiita alimwi muntu ooyu akumukonga kwiinda mukwaamba kuti balaabumboni bwakuti Jesu tali muntu uuli kabotu. Baamba kuti: “Kolemeka Leza; tulizyi kuti muntu ooyu ngusizibi.” Mukukazya kaambo aaka nkobamwaamba Jesu, muntu iwakali moofwu waamba kuti: “Kufwumbwa naa ngusizibi tandizyi pe.” Nokuba boobo, waamba kuti: “Comwe buyo ncendizyi ncakuti ndakali moofwu, pele lino ndilabona.”—Johane 9:24, 25.

Muciindi cakwaaleka buyo makani aaya, ba Farisi bazumanana kuti: “Ncinzi ncaakacita kulinduwe? Ino wakaajalula buti meso aako?” Muntu ooyu lino watondezya busicamba naingula, ulaamba: “Ndamwaambila kale pele tiimwamvwa. Ncinzi cimbi ncomuyanda kumvwa? Sena anywebo muyanda kuba basikwiiya bakwe?” Kabanyemede, ba Farisi baamba kuti: “Yebo ndonduwe sikwiiya wamuntu ooyo, pele swebo tuli basikwiiya ba Musa. Tulizyi kuti Leza wakaambaula a Musa, pele muntu ooyu tatukuzyi pe nkwazwa.”—Johane 9:26-29.

Kagambidwe aceeci, sikulombelela ooyu wati: “Masimpe eeci cilagambya kuti tamukuzyi nkwazwa, pele mebo wakandijalula meso.” Mpoonya muntu ooyu waamba kaambo katakonzyi kukazyigwa kujatikizya muntu Leza ngwaswiilila akukkomanina, ulaamba: “Tulizyi kuti Leza tabaswiilili basizibi, pele kufwumbwa uumuyoowa Leza akucita kuyanda kwakwe ulamuswiilila ooyu. Kuzwa kaindi takunamvwugwa kuti muntu uuli woonse wakajalula meso aamuntu wakazyalwa kali moofwu.” Eeci casololela kukwaamba kuti: “Ikuti muntu ooyu naatali kuzwa kuli Leza, kunyina ncaakali kukonzya kucita.”—Johane 9:30-33.

Akaambo kakwaalilwa kukazya kaambo nkaamba sikulombelela, ba Farisi bamusampaula, balaamba: “Yebo wakazyalwa mucibi, aboobo sena uyiisya ndiswe?” Mpoonya bamutanda.—Johane 9:34.

Jesu naamvwa cakacitika, wajana muntu ooyu akumubuzya kuti: “Sena ulamusyoma Mwanaamuntu?” Muntu ooyu uuponesyedwe waingula kuti: “Ino nguni ooyo mwami, kutegwa ndimusyome?” Cakutainda mumbali, Jesu waamba kuti: “Wamubona alimwi ooyo waambaula anduwe ngonguwe.”—Johane 9:35-37.

Muntu ooyu waingula kuti: “Ndilamusyoma, Mwami.” Ikutondezya lusyomo alimwi abulemu, muntu ooyu wakotamina Jesu, walo iwaamba kaambo kapati kakuti: “Akaambo kalubeta oolu ncindakaboolela munyika eeyi, kutegwa aabo bataboni babone, abaabo babona babe boofwu.”—Johane 9:38, 39.

Ba Farisi ibaliko aawo, bazyi kuti tabali boofwu. Pele ino mbuti kujatikizya mukuli ngobalipa wakuti mbabasololela bantu mumakani aabukombi? Cakuliiminina babuzya kuti: “Sena andiswe tuli boofwu?” Jesu waamba kuti: “Nomwali boofwu, nomutajisi cibi. Pele lino mwaamba kuti, ‘Tulabona.’ Cibi canu cilazumanana andinywe.” (Johane 9:40, 41) Ikuti nobatali bamayi mu Israyeli, nokalimvwisya kaambo ikabapa kutamusyoma Jesu kuti ngo Mesiya. Pele mbwaanga baluuzyi Mulawo, ikutamusyoma ncibi cipati.