Jesu wasola munzila zinji kugwasya bantu kuti bayeeye mbocibede cilongwe cabo a Leza. Lino waba acoolwe acimbi musyule lyakubandika abantu aanze aaŋanda yamu Farisi.

Bamwi akati kabo baluula cintu cimwi cuusisya icakacitika. Baamba “zyabana Galilaya aabo bulowa bwabo [mweendelezi waba Roma Ponto] Pilato mbwaakasanganya azipaizyo zyabo.” (Luka 13:1) Ino bapandulula nzi?

Ambweni bana Galilaya aabo mbambabo ibakajaigwa ciindi zyuulu-zyuulu zyaba Juda nobakabusya manyongwe eelyo Pilato naakabelesya mali aazwa muzibikkilo zyamali zyamutempele ikupanga mugelo uuleta meenda mu Jerusalemu. Ambweni beendelezi batempele bakamuzumizya Pilato kwaabweza mali aayo. Aabo baluula makani aaya ambweni bayeeya kuti bana Galilaya aaba bakajaigwa akaambo kakuti bakajisi mulandu wakucita zibi zimwi. Pele Jesu tanaazuminizya.

Wabuzya kuti: “Sena muyeeya kuti bana Galilaya aaba bakali basizibi kwiinda bana Galilaya bamwi boonse akaambo kakuti bakajaigwa boobo?” Bwiinguzi bwakwe mbwakuti peepe. Pele wabelesya ceeci icakacitika kucenjezya ba Juda kuti: “Ikuti muteempwi anywebo nyoonse muyoonyonyoonwa mbuli mbabo.” (Luka 13:2, 3) Mpoonya Jesu waamba ntenda imbi iilangilwa kuti yakacitika caino-ino alimwi iiboneka kuti yakacitika ciindi nokwakali kupangwa mugelo ngomunya wameenda, wabuzya kuti:

“Aabo bali 18 ibakalimbwa akujaigwa angazi ku Siloamu, sena muyeeya kuti bakali basizibi kwiinda bantu boonse bakkala mu Jerusalemu?” (Luka 13:4) Ambweni nkamu yabantu iyeeya kuti bantu aabo bakafwa akaambo kabubi bumwi mbobakajisi. Aalo aawa Jesu tanaazuminizya. Ulizyi kuti bantu boonse “balasikilwa ziindi zyamapenzi akucitikilwa zintu zitalangilwi,” aboobo eezyi nzyezilangilwa kuti nzyezyakapa kuti kucitike ntenda eeyi ayalo. (Mukambausi 9:11) Nokuba boobo, kuli ciiyo ncobeelede kwiiya bantu kuntenda eeyi. Jesu waamba kuti: “Ikuti muteempwi anywebo nyoonse muyoonyonyoonwa mbuli mbabo.” (Luka 13:5) Pele ino nkaambo nzi ncakankaizya ciiyo eeci lino?

Cili boobo akaambo kampasikide mumulimo wakwe, eelyo wapa cikozyanyo ikupandulula makani aaya, wati: “Umwi muntu wakajisi mukuyu wakasyangidwe mumuunda wakwe wamisaansa, eelyo wakaboola kuti alangaule nkuyu kulinguwo, pele tanaakajana niiba yomwe. Mpoonya wakaambila mubelesi wamumuunda wamisaansa kuti, ‘Lino yaba myaka yotatwe kandiboola kulangaula nkuyu kumukuyu ooyu, pele kunyina niiba yomwe njondijana. Kocigonka cisamu eeci! Mubwini ino nkaambo nzi ncoceelede kunyonyoona nyika?’ Mukumwiingula wakati, ‘Simalelaangu, amucileke amwaka uuno, ndicilimine mumbali akucibikkila mbolezi. Ikuti cikazyale micelo kumbele, inga cabota; pele kuti citakazyali, nkokuti mukaciteme.’”—Luka 13:6-9.

Kwamyaka yiinda kuli yotatwe, Jesu wasola kubapa kuba alusyomo ba Juda. Pele mbasyoonto buyo ibaba basikwiiya bakwe alimwi ibakonzya kwaambwa kuti micelo yamilimo yakwe. Lino mumwaka wane wamulimo wakwe, wabeleka cabusungu kapati kwiinda lyoonse. Cili mbuli kuti uluujisi kulimina akubikka mbolezi mumabali aamukuyu waba Juda kwiinda mukukambauka akuyiisya cabusungu mu Judaya alimwi amu Pereya. Ino ncinzi ncaajana? Mbasyoonto buyo iba Juda babweza ntaamu. Cisi cabo coonse mbocibede kunyina noceempwa, aboobo cilindila buyo kunyonyoonwa.

 Ikutasyoma ooku kwabanabunji kwalibonya alimwi nokwainda buyo ciindi cisyoonto mu Sabata. Jesu uli mukuyiisya mucikombelo. Wabona mukaintu woongomene akaambo kakuti wali kupenzyegwa adaimona kwamyaka iili 18. Akaambo kakumufwida luzyalo, Jesu wamwaambila kuti: “Omukaintu, waangululwa kubulwazi bwako.” (Luka 13:12) Jesu wabikka maanza aakwe aalinguwe, eelyo ndilyonya woololoka akutalika kutembaula Leza.

Eeci camunyemya mweendelezi wacikombelo, walo iwaamba kuti: “Kuli mazuba aali cisambomwe nokweelede kubelekwa milimo; aboobo mumazuba aayo amuboole kuzooponesyegwa, ikutali mubuzuba bwa Sabata.” (Luka 13:14) Mweendelezi ooyu taambi kuti Jesu tajisi nguzu zyakuponya; pele upa bantu mulandu akaambo kakuboola kuzyikuponesyegwa mu Sabata! Jesu wavwiila munzila iisalede, ulaamba: “Nobasikuupaupa ameso, sena umwi aumwi wanu taangululi ŋombe naa mbongolo yakwe mucimpati mu Sabata akwiitola kuyoonywa maanzi? Aboobo sena tiicaleelede kumukaintu ooyu walo uuli mwana wa Abrahamu alimwi ooyo Saatani ngwaangide kwamyaka iili 18 kuti aangununwe kucilwazi eeci mubuzuba bwa Sabata?”—Luka 13:15, 16.

Basikumukazya bafwa nsoni pele makamu aabantu akondwa akaambo kazintu zitaliboteli nzyobabona kacita Jesu. Mpoonya okuno ku Judaya Jesu wainduluka zikozyanyo zyabusinsimi izijatikizya Bwami eezyo nzyaakaambide musyule kali mubwato mu Lwizi lwa Galilaya.—Matayo 13:31-33; Luka 13:18-21.