Buzuba bwamamanino bwa Pobwe lya Zivwuka, nkokuti buzuba bwaciloba, Jesu ulayiisya mucibeela catempele imuli “zibikkilo zyamali.” (Johane 8:20; Luka 21:1) Kulibonya kuti cibeela eeci cili mu Lubuwa lwa Bamakaintu, ooko bantu nkobabikka zyakusanga zyabo.

Masiku ciindi nokuli pobwe, cibeela catempele eeci cilamunikwa kapati. Kuli zibikkilo zyamalambe zipati zyone, acimwi kacijisi mitiba mipati yone iizwide mafwuta. Mumuni uuzwa kumalambe aaya mupati cakuti ulakonzya kusika kumasena aazingulukide aali kulamfwu. Aboobo ncaamba lino Jesu cilakonzya kuyeezya bantu bamuswiilide kujatikizya mumuni ooyu, naamba kuti: “Ndili mumuni wanyika. Kufwumbwa ooyo uunditobela kunyina nayakweenda mumudima, pele unoojisi mumuni wabuumi.”—Johane 8:12.

Ba Farisi bamukazya Jesu balaamba: “Ulicitila bumboni omwini; bumboni bwako tabuli bwamasimpe.” Jesu wabaambila kuti: “Nokuba kuti ndalicitila bumboni ndemwini, bumboni bwangu mbwamasimpe nkaambo ndilikuzyi nkondakazwa ankondiya. Pele nywebo tamukuzyi pe nkondakazwa ankondiya.” Wayungizya kuti: “Mu Mulawo wanu wini kulilembedwe kuti: ‘Bumboni bwabantu bobilo mbwamasimpe.’ Ndime nendilicitila bumboni, awalo Taata iwakandituma ulandicitila bumboni.”—Johane 8:13-18.

Kabatasyomi ncapandulula, ba Farisi bamubuzya kuti: “Ino uli kuli Uso?” Jesu wabaingula cakutainda mumbali kuti: “Tamundizyi mebo alimwi a Taata. Ikuti nomwalindizyi mebo, nomwalimuzyi awalo Taata.” (Johane 8:19) Nokuba kuti ba Farisi baciyanda kuti Jesu aangwe, kunyina naba omwe wasola kumujata.

Jesu wacaamba alimwi ncaambide kale kuti: “Ndilaunka, eelyo muyoondiyandaula, pele muyoofwa muzibi zyanu. Ooko nkondiya tamukonzyi  kusika pe.” Ba Juda cabainda ncaamba Jesu, eelyo batalika kwaamba kuti: “Sena uyanda kulijaya? Nkaambo waamba kuti, ‘Nkondiya tamukonzyi kuboola.’” Tiibacimvwa ncaamba Jesu, nkaambo tabakuzyi nkwaakazwa. Wapandulula kuti: “Nywebo muli baansi; mebo ndakazwa kujulu. Muli bamunyika eeyi; mebo tandili wamunyika eeyi pe.”—Johane 8:21-23.

Jesu waamba kuti wakaliko kujulu katanaboola anyika akuba muntu alimwi akuti ngonguwe Mesiya naa Kristo iwakasyomezyegwa, ooyo basololi babukombi aaba ngobeelede kuti kabalangila. Nokuba boobo bamubuzya, cakumunyansya kapati ategwa: “Ino nduwe ni?”—Johane 8:25.

Nibamukaka akumukazya boobu, Jesu waingula kuti: “Ino nkaambo nzi ncondilipenzyela kwaambaula andinywe?” Nokuba boobo, wagamika mizeezo kuli Bausyi akupandulula kaambo ba Juda ncobayandika kuswiilila Mwana, ulaamba: “Ooyo wakandituma ngwamasimpe alimwi nzyoonya nzindakamvwa kulinguwe nzyondaamba munyika.”—Johane 8:25, 26.

Mpoonya Jesu watondezya kuti ulabasyoma Bausyi, eeco ncobataciti balo ba Juda aaba, ulaamba: “Mwaakumwaanzika Mwanaamuntu, nemuyoozyiba kuti ndime nguwe, akuti tandilicitili buyo zintu; pele mbubonya mbwaakandiyiisya Taata ndilaamba makani aaya. Alimwi ooyo wakandituma ulaandime; kunyina naakandilekelezya nkaambo lyoonse ndicita zimukkomanisya.”—Johane 8:28, 29.

Pele ba Juda bamwi balamusyoma Jesu, aboobo aaba wabaambila kuti: “Ikuti mwazumanana kuba mujwi lyangu, muli basikwiiya bangu ncobeni, alimwi muyoozyiba kasimpe, eelyo kasimpe kayoomwaangununa.”—Johane 8:31, 32.

Ibambi makani aaya aakwaangununwa ababeda meenzu. Bakazya balaamba: “Swebo tuli bana ba Abrahamu alimwi tatunabede bazike kumuntu uuli woonse. Ino waambila nzi kuti ‘Muyakwaangunuka’?” Ba Juda balizyi kuti ziindi zimwi bali kweendelezyegwa azisi zimbi, pele tabazumini kwaambwa kuti mbazike. Nokuba boobo, Jesu watondezya kuti bacili bazike, ulaamba: “Ncobeni ndimwaambila masimpe kuti, kufwumbwa uucita cibi muzike wacibi.”—Johane 8:33, 34.

Ikukaka kuzumina kuti mbazike kucibi kubikka ba Juda aaba muntenda. Jesu wapandulula kuti: “Muzike takkali muŋanda mane kukabe kutamani; mwana ulakkala mane kukabe kutamani.” (Johane 8:35) Muzike tajisi nguzu zyakukona lubono lwasimalelaakwe, alimwi ulakonzya kutandwa kufwumbwa ciindi. Alikke mwana muzyale naa uulelwa muŋanda nguukkala “mane kukabe kutamani,” nkokwaamba kuti kufwumbwa kuti kali muumi.

Kasimpe kajatikizya Mwana nkakasimpe kaangununa bantu mane kukabe kutamani kucibi cileta lufwu. Aboobo Jesu waamba kuti: “Ikuti Mwana wamwaangununa, mulaangunuka ncobeni.”—Johane 8:36.