Lino nkuumamanino aamwaka wa 32 C.E., kwainda myaka iitandila kuli yotatwe kuzwa ciindi Jesu naakabbapatizyigwa. Walo abasikwiiya bakwe calino-lino bakali ku Pobwe lya Zivwuka ku Jerusalemu. Kuboneka kuti bacili munsi-munsi ankuko. (Luka 10:38; Johane 11:1) Mubwini Jesu wabelesya ciindi cinji camyezi iili cisambomwe iiceede yamulimo wakwe mucooko ca Judaya naa mutala lya Mulonga wa Jordano mucooko ca Pereya. Mulimo wakukambauka weelede kucitwa amwalo mumasena aaya.

Kumatalikilo, nolyakainda Pobwe Lyakwiindilila lyamu 30 C.E., Jesu wakatola myezi iili mbwiibede kakambauka mu Judaya akwiinda mu Samariya. Mpoonya kuciindi ca Pobwe Lyakwiindilila lyamu 31 C.E., ba Juda ku Jerusalemu bakali kuyanda kumujaya. Kwamwaka omwe acisela iwakatobela, Jesu bunji bwaziindi wakali kuyiisya kulubazu lwakunyika, mucooko ca Galilaya. Kuciindi eeci, bantu banji bakaba basikumutobela. Mu Galilaya Jesu wakabayiisya mulimo baapostolo bakwe akubatuma amalailile aakuti “Kamuyaabukambauka kuti: ‘Bwami bwakujulu bwaswena afwaafwi.’” (Matayo 10:5-7) Lino wabikka bubambe bwakukambauka mu Judaya.

Kutegwa atalisye mulimo ooyu, Jesu wasala basikwiiya ibali 70 akubatuma bobilo-bobilo. Aboobo, kuli tukamu tuli 35 twabakambausi ba Bwami mucilawo, oomo ‘mulimo wakutebula mouli mupati, pele babelesi mobali basyoonto.’ (Luka 10:2) Beelede kumusoloda kumasena nkwalangilwa kuunka awalo Jesu. Aaba ibali 70 beelede kuponya balwazi akumwaya mulumbe ngoonya Jesu ngwaali kukambauka.

Basikwiiya aaba tabeelede kuunka kuyakuyiisya muzikombelo. Jesu wabaambila kuunka mumaanda aabantu. Wabalailila kuti: “Kufwumbwa nkomuyoonjila muŋanda, amukasaangune kwaamba kuti: ‘Akube luumuno muŋanda iino.’ Eelyo ikuti muŋanda oomo kakuli muntu uuyandisya luumuno, luumuno lwanu luyooba alinguwe.” Ino mulumbe nzi ngobeelede kukambauka? Jesu waamba kuti beelede kubaambila kuti: “Bwami bwa Leza bwaswena afwaafwi kulindinywe.”—Luka 10:5-9.

Malailile Jesu ngaabapa aaba ibali 70 alikozyenye ayaayo ngaakapa ciindi naakatuma baapostolo bali 12 mazuba aatandila kumwaka omwe aayinda. Wabacenjezya kuti tabali boonse ibayakubatambula kabotu. Pele mulimo ngobayakucita uyakupa kuti ibabombe myoyo balibambile kutegwa Jesu aakusika kakutanainda ciindi cilamfwu kuzwa aciindi eeci, ibanji bakabe aluyandisisyo lwakumutambula Simalelo ooyu akwiiya kulinguwe.

Kalitanalampa, tukamu tuli 35 twabakambausi ba Bwami twapiluka kuli Jesu. Calukkomano bamwaambila kuti: “Mwami, naaba madaimona alatumvwida kwiinda mukubelesya zina lyako.” Masimpe, makani aaya mabotu amukkomanisya kapati Jesu, nkaambo waamba kuti: “Ndamubona kale Saatani kawide mbuli lulabo kuzwa kujulu. Amubone! Ndamupa nguzu zyakulyatauka nzoka atubanze.”—Luka 10:17-19.

 Aboobo Jesu wasyomezya basikumutobela kuti banoocikonzya kuzunda zintu zibi, nkokuti kulyatauka nzoka atubanze munzila yacikozyanyo. Kuyungizya waawo, balakonzya kusyoma cakumaninina kuti kumbele Saatani uyakuwa kuzwa kujulu. Alimwi Jesu wagwasya ibali 70 kuzyiba cintu ciyandika ncobeni mubuumi. Waamba kuti: “Mutakkomani akaambo kakuti myuuya ilamumvwida, pele amukkomane akaambo kakuti mazina aanu alembwa kujulu.”—Luka 10:20.

Jesu wakkomana kapati akutembaula Bausyi caantangalala akaambo kakubelesya babelesi bakwe aaba ibalicesya kucita milimo mipati boobu. Mpoonya wacengulukila basikwiiya bakwe akubaambila kuti: “Balikkomene aabo bajisi meso aabona zintu eezyi nzyomubona. Nkaambo ndimwaambila kuti, bunji bwabasinsimi abami bakali kuyandisisya kubona zintu nzyomubona, pele tiibakazibona, alimwi bakali kuyandisisya kumvwa zintu nzyomumvwa, pele tiibakazimvwa pe.”—Luka 10:23, 24.