Jesu naamana kwaangwa mbuli cigwebenga, watolwa kuli Anasi, ooyo iwakali mupaizi mupati ciindi Jesu kali mwana naakagambya bamayi mutempele. (Luka 2:42, 47) Bana bamwi ba Anasi kumbele bakazyikuba bapaizi bapati, alimwi lino imukwe wakwe Kayafa nguujisi cuuno eeci.

Ciindi Jesu nali kuŋanda ya Anasi, Kayafa wajana ciindi cakubunganya Nkuta Mpati Yaba Juda. Inkuta eeyi iibambidwe aababetesi bali 71 ibikkilizya mupaizi mupati alimwi abamwi ibakajisi cuuno eeci musyule.

Anasi wabuzya Jesu “kujatikizya basikwiiya bakwe akujatikizya njiisyo zyakwe.” Jesu waile kuvwiila kuti: “Ndakali kwaambila buleya caantangalala. Lyoonse ndakali kuyiisya mucikombelo alimwi amutempele, ooko ba Juda boonse nkobaswaanganina, alimwi kunyina cintu ncindakaamba cakusisikizya. Ino nkaambo nzi ncobuzya ndime? Kobuzya baabo bakamvwa nzyondakali kubaambila.”—Johane 18:19-21.

Kapaso umwi iwiimvwi munsi-munsi wauma Jesu lubayi kumeso akumwaambila cabukali kuti: “Sena oobu mbonga waingula silutwe wabapaizi?” Pele Jesu, kazyi kuti kunyina ncaalubizya, wavwiila kuti: “Ikuti naa ndalubizya mukwaambaula, kondaambila ncindalubizya; pele ikuti naa ncindaamba cililuzi, ino unduumina nzi?” (Johane 18:22, 23) Mpoonya Anasi walailila kuti Jesu atolwe kumukwe wakwe Kayafa.

Lino boonse aabo ibali mu Nkuta Mpati Yaba  Juda—mupaizi mupati uuliko lino, baalu babantu, alimwi abalembi—babungana. Babunganina kuŋanda ya Kayafa. Tacili mumulawo kuba alubeta luli boobu mubusiku bwa Pobwe Lyakwiindilila, pele eeci tiicabalesya kuyanda kuzuzikizya makanze aabo mabi.

Eeyi ninkamu yababetesi ibatabeteki cakululama. Ciindi Jesu naakabusya Lazaro, Nkuta Mpati Yaba Juda yakaamba kuti Jesu ajaigwe. (Johane 11:47-53) Alimwi mazuba masyoonto aayinda, basololi babukombi bakamvwana kuti bamujate Jesu akumujaya. (Matayo 26:3, 4) Masimpe, kabataningatalika kumubeteka, Jesu wapegwa kale mulandu wakuti ajaigwe!

Kunze lyakuba amuswaangano uutali wamumulawo, basilutwe babapaizi alimwi abamwi bamu Nkuta Mpati Yaba Juda basola kujana bakamboni ibatiipe bumboni bwakubeja kutegwa bajanine aakumupeda mulandu Jesu. Bajana bakamboni banji, pele bumboni bwabo tabweendelani. Kumamanino, kwaboola bakamboni bobilo ibaamba kuti: “Twakamumvwa kaamba kuti, ‘Ndiyoomwaya tempele eeli lyakayakwa amaanza, alimwi mumazuba otatwe ndiyooyaka limbi litayakwi amaanza.’” (Marko 14:58) Pele nobaba baalumi aaba tiibeendelana pe.

Kayafa wabuzya Jesu kuti: “Sena toinguli? Ino ncinzi bantu aaba ncobakutamikizya?” (Marko 14:60) Jesu waumuna buyo kukaambo aaka kakubeja nkobaamba bakamboni aaba ibapa bumboni buteendelani. Aboobo, Mupaizi Mupati Kayafa wabelesya nzila imbi yabucenjezu.

Kayafa ulizyi kuti ba Juda tabayandi kumvwa muntu uuli woonse uulyaamba kuti Mwana wa Leza. Musyule oomu, ciindi Jesu naakaamba Leza kuti Mbaausyi, ba Juda bakali kuyanda kumujaya nkaambo bakaamba kuti “wakali kulipa kweelana a Leza.” (Johane 5:17, 18; 10:31-39) Kazyi kuti mbobalimvwa oobu, cabucenjezu Kayafa waambila Jesu kuti: “Ndikwaambila kuti ukonke kuli Leza uupona kuti ulaamba masimpe akutwaambila naa nduwe Kristo Mwana wa Leza!” (Matayo 26:63) Mubwini, kuli ziindi Jesu naakalyaambide kuti Mwana wa Leza. (Johane 3:18; 5:25; 11:4) Ikuti ataciti boobu aciindi eeci, eeco cilaba mbuli kuti wakaka kuti Mwana wa Leza alimwi akuti ngo Kristo. Aboobo, Jesu waamba kuti: “Inzya ndime; alimwi nywebo muyoobona Mwanaamuntu kakkede kujanza lyalulyo lyanguzu alimwi kaboola amakumbi aakujulu.”—Marko 14:62.

Amvwe boobu, camambonwa kapati Kayafa wazapula zisani zyakwe akupozomoka kuti: “Wasampaula Leza! Sena tuciyandika bakamboni abambi? Amulange! Tee mwalimvwida kasampaula Leza. Ino muyeeya buti?” Nkuta Mpati Yaba Juda yakosola makani cakutalulama ategwa: “Weelede kujaigwa.”—Matayo 26:65, 66.

Mpoonya batalika kumufwubaazya Jesu akumuuma mfwaindi. Bamwi bamuuma mbayi kumeso akumuswida mate. Bamane kumuvwumba kumeso akumuuma mbayi, batalika kumwaambila cakufwubaazya kuti: “Sinsima! Nguni wakuuma?” (Luka 22:64) Ma! Eelo kaka cilausisya kubona Mwana wa Leza mbobamupenzya akumusampaula mulubeta oolu lwamasiku ilutali lwamumulawo!