Mangolezya aamamanino aakuba abaapostolo bakwe, Jesu wakalibaambilide kuti: “Ndaakubusyigwa, ndiyoosika ku Galilaya nywebo kamutanasika.” (Matayo 26:32; 28:7, 10) Lino bunji bwabasikumutobela baunka nkuko, pele ino ncinzi ncobeelede kucita ku Galilaya?

Aciindi cimwi, Petro waambila baapostolo bali cisambomwe kuti: “Ndaunka kukuzuba nswi.” Boonse ibali cisambomwe bati: “Andiswe tulaunka anduwe.” (Johane 21:3) Busiku boonse, taakwe ncobajaya. Nobuyaabuumbuluka, Jesu walibonya kunkomwe, pele tiibamuzyiba pe. Jesu waita kuti: “Nobana, sena kuli cakulya ncomujisi?” Bamuvwiila kuti: “Peepe!” Jesu wabaambila kuti: “Amuwaale kansabwe kanu kululyo lwabwato eelyo mulajaya nswi.” (Johane 21:5, 6) Bajaya nswi zinji kapati cakuti cabaalila kukwela kansabwe kabo.

Johane waambila Petro kuti: “Ngu Mwami!” (Johane 21:7) Cakutasowa ciindi, Petro wasama cisani cakwe caatala, eeco ncaatasamide naali kuzuba nswi. Kumane wasotokela mumeenda akusaya kwamamita aatandila ku 90 kuya kunkomwe yalwizi. Bamwi ibali mubwato bamutobela asyoonto-syoonto, kabazyaabukwela kansabwe kazwide nswi.

Nobasika kunkomwe, babona ‘mulilo wamalasya answi kaziyokwa alinguwo, alimwi babona acinkwa.’ Jesu wati: “Amulete nswi zimwi nzyomwajaya ino aawa.” Petro wakwela kansabwe ikajisi nswi zipati zili 153! Jesu wabaambila kuti: “Amuboole mulye.” Kunyina naba omwe uujisi camba cakumubuzya kuti: “Ino nduwe ni?” nkaambo bamuzyiba kuti ngu Jesu. (Johane 21:10-12) Eeci nciindi catatu cakulibonya kuli basikwiiya kabali kakamu.

Jesu wabapa umwi aumwi wabo cinkwa answi kuti balye. Mpoonya, ambweni kalangide nswi nzyobajaya, Jesu wabuzya kuti: “Simoni omwana wa Johane, sena ulandiyanda kwiinda zyeezyi?” Sena Petro uyandisya mulimo wakuzuba nswi kwiinda mulimo Jesu ngwayanda kuti acite? Petro waingula kuti: “Inzya Mwami, ulizyi kuti ndilakuyanda kapati.” Aboobo Jesu wamwaambila kuti: “Kosanina twana twambelele twangu.”—Johane 21:15.

Alimwi Jesu wamubuzya kuti: “Simoni omwana wa Johane, sena ulandiyanda?” Ambweni, kazyingidwe, Petro wavwiila cakusinizya kuti: “Inzya Mwami, ulizyi kuti ndilakuyanda kapati.” Jesu wamwaambila majwi aakonzyene, wati: “Koembela tubelele twangu.”—Johane 21:16.

Ciindi catatu, Jesu wabuzya kuti: “Simoni omwana wa Johane, sena ulandiyanda kapati?” Ambweni lino Petro watalika kulibuzya naa Jesu umudooneka buya kuti ulasyomeka. Kasinizyide, Petro wati: “O Mwami, yebo ulizyi zintu zyoonse; ulizyi kuti ndilakuyanda kapati.” Alimwi Jesu wakankaizya kwaamba ncayelede kucita Petro, wati: “Kosanina tubelele twangu.” (Johane 21:17) Inzya, aabo basololela beelede kubelekela baabo baletwa mubutanga bwa Leza.

Jesu wakaangwa akujaigwa akaambo kakuti wakawoonda mulimo Leza ngwaakamutuma kuti acite. Lino waambila Petro kuti awalo uyakucitikilwa zintu zili boobu. Jesu wati: “Nookacili mwana wakali kulisamika omwini akulyeendela kufwumbwa nkookali kuyanda. Pele waakucembaala uyootandabika maanza aako, eelyo muntu uumbi nguuyookusamika akukusololela nkotayandi kuunka.” Nokuba boobo, Jesu wamukulwaizya kuti: “Kozumanana kunditobela.”—Johane 21:18, 19.

Petro wabona mwaapostolo Johane akubuzya kuti: “O Mwami, ino mbuti muntu ooyu?” Inzya, ino ncinzi cimulindila kumbele mwaapostolo ooyu ngwayandisya Jesu? Jesu waingula kuti: “Ikuti kandiyanda kuti azumanane kupona kusikila ndikaboole, ino eeco cikujatikizya buti yebo?” (Johane 21:21-23) Petro weelede kutobela Jesu akutalipenzya anzyobacita bamwi. Nokuba boobo, Jesu utondezya kuti Johane uyoopona myaka minji kwiinda baapostolonyina bamwi alimwi uyoopegwa cilengaano cakuboola kwa Jesu mu Bwami.

Masimpe, kuli zintu azimbi zinji Jesu nzyaakacita, izitakonzyi kukkwana mumabbuku naavwula buti.