Akaambo kakubayanda kapati baapostolo bakwe, Jesu wali kubagwasya kulibambila mumizeezo kuti ulabasiya lino-lino. Mpoonya walanga kujulu akupaila kuli Bausyi kuti: “Kopa kuti mwanaako alemekwe kutegwa awalo akulemeke, mbubonya walo mboomupa nguzu zyakweendelezya bantu boonse, ikutegwa akonzye kubapa buumi butamani boonse aabo mbomupede.”—Johane 17:1, 2.

Cilisalede kuti Jesu ulizyi kuti ikulemeka Leza ncecintu ciyandika kapati. Pele kaka bulakulwaizya abwalo bulangizi mbwaamba Jesu bwabuumi butamani! Mbokunga ulipedwe “nguzu zyakweendelezya bantu boonse,” Jesu ulakonzya kupa kuti bantu boonse bagwasyigwe acinunuzyo cakwe. Nokuba boobo, tabali boonse ibayakugwasyigwa ancico. Nkaambo nzi ncobatali boonse? Nkaambo kakuti Jesu uyoopa kuti cinunuzyo cakwe cigwasye buyo baabo bacita kweelana amajwi aatobela ngaamba aakuti: “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kristo.”—Johane 17:3.

Muntu weelede kumuzyiba ncobeni Taata alimwi a Mwana, ikuba acilongwe ciyumu ambabo. Weelede kulimvwa mbubonya mbobalimvwa balo mumakani oonse. Kuyungizya waawo, weelede kwiiya bube bwabo ibutaliboteli muzintu nzyacitila bamwi. Alimwi weelede kuzyiba kuti kulemeka Leza ncecintu cipati kapati kwiinda kupa bantu buumi butamani. Lino Jesu wajokelela mutwe wamakani ooyu, ulaamba:

“Ndakulemeka anyika, kwiinda mukumanizya mulimo ngookandipa kuti ndicite. Aboobo Taata kopa kuti ndilemekwe kumbali lyako abulemu mbondakajisi nendakacili anduwe inyika kaitanaba.” (Johane 17:4, 5) Inzya, Jesu ulomba kuti apilusyigwe kubulemu bwakujulu kwiinda mububuke.

Nokuba boobo, Jesu tanaaluba nzyaacita mumulimo wakwe. Wapaila kuti: “Ndabazyibya zina lyako bantu mbookandipa munyika. Bakali bako, pele wakabapa kulindime alimwi balibamba jwi lyako.” (Johane 17:6) Mumulimo wakwe, Jesu tanaakaamba buyo zina lya Leza, lyakuti Jehova pe. Wakagwasya baapostolo bakwe kuti balizyibe ncolyaamba zina eeli, nkokuti kuti babuzyibe bube bwa Leza alimwi ambwabalanganya bantu.

Baapostolo bamuzyiba Jehova, bauzyiba mulimo ngwajisi Mwanaakwe, alimwi bazizyiba zintu nzyaali kuyiisya Jesu. Cakulicesya Jesu waamba kuti: “Ndabaambila majwi ngookandipa, eelyo baatambula akusinizya kuti ndakaboola kandili mwiiminizi wako alimwi basyoma kuti nduwe wakandituma.”—Johane 17:8.

Mpoonya Jesu waamba kwiindana kuliko akati kabasikumutobela alimwi abantu bamunyika, ulaamba: “Ndilombela mbabo; tandilombeli nyika pe, pele buyo baabo mbondipede, nkaambo mbibako . . . Taata Oosalala, kobakwabilila akaambo kazina lyako eelyo ndyookandipa, ikutegwa babe bamwi mbubonya mbotubede andiswe. . . . Ndabakwabilila eelyo kunyina umwi wabo wasweeka ccita buyo mwana walunyonyooko,” nkokuti Judasi Isikariote, ooyo iwaunka kuyakwaaba Jesu.—Johane 17:9-12.

Jesu wazumanana kupaila kuti: “Nyika yabasulaika. . . . Tandikulombi kuti ubagusye munyika, pele kuti ubakwabilile akaambo kamubi. Tabali banyika mbubonya andime mbonditali wanyika.” (Johane 17:14-16) Baapostolo alimwi abasikwiiya bambi bali munyika, nkokuti, akati kabantu beendelezyegwa a Saatani, pele beelede kuzumanana kulyaandaanya kulinjiyo alimwi akububi bwanjiyo. Munzila nzi?

Beelede kuzumanana kuba bantu basalala, nkokuti, ibasalidwe kubelekela Leza, kwiinda mukutobela kasimpe ikali mu Magwalo aa Chihebrayo alimwi amakani ngaali kuyiisya Jesu. Jesu wapaila  kuti: “Kobasalazya akasimpe; ijwi lyako nkasimpe.” (Johane 17:17) Mukuya kwaciindi, baapostolo bamwi bayakulemba magwalo kwiinda mukusololelwa aa Leza aayo aalo aayakuba cibeela ‘cakasimpe’ aako ikakonzya kusalazya muntu.

Pele mukuya kwaciindi kuli abambi ibayakukatambula “kasimpe.” Aboobo Jesu tanaapailila buyo ‘baaba balikke pe mbali limwi, pele wabalombela abaabo bamusyoma kwiinda mumajwi aabo.’ Ino ncinzi Jesu ncaabalombeleda aaba boonse? Wabalombela kuli Bausyi kuti: “Ikutegwa boonse babe bamwi mbubonya yebo Taata andime mbotukamantene, ikuti abalo kabakamantene andiswe, ikutegwa nyika isyome kuti nduwe wakandituma.” (Johane 17:20, 21) Mubwini Jesu a Bausyi tabali mubili omwe. Mbamwi mukuti balimvwene muzintu zyoonse. Jesu wapailila kuti basikumutobela bazumanane kuba alukamantano luli boobu.

Takunainda ciindi cilamfwu kuzwa leelyo Jesu naambila Petro abaapostolo bamwi kuti uunka kuyoobabambila busena, nkokuti busena kujulu. (Johane 14:2, 3) Lino Jesu wakajokelela kaambo nkamunya aaka mumupailo, wati: “Taata, ndiyanda kuti aabo mboondipa abalo bakabe andime ooko nkweyooba, ikutegwa bakabone bulemu mbondipede, nkaambo wakandiyanda kaitanaba nyika.” (Johane 17:24) Aboobo, watondezya kuti ikaindi—ba Adamu a Eva kabatanaba abana—Leza wakamuyanda Mwanaakwe simuzyalwaalikke, ooyo wakazyikuba Jesu Kristo.

Mukumanizya mupailo wakwe, Jesu wainduluka kukankaizya kwaamba zina lya Bausyi alimwi akuti Leza ulabayanda baapostolo alimwi abamwi aabo ibayakutambula “kasimpe,” ulaamba: “Ndabazyibya zina lyako alimwi ndiyoolizyibya ikutegwa luyando ndookali kundiyanda andulo lube mulimbabo alimwi mebo ambabo tukamantane.”—Johane 17:26.