Kacili muŋanda yamujulu abaapostolo bakwe nobamana kulya mulalilo, Jesu wabakulwaizya kuti: “Myoyo yanu itapengi. Amusyome Leza; amundisyome andime.”—Johane 13:36; 14:1.

Jesu waambila baapostolo bakwe ibasyomeka ikaambo ncobateelede kupenga mumoyo akaambo kakuti uyanda kuunka, ulaamba: “Muŋanda ya Taata muli makkalilo manji. . . . Alimwi ikuti nduunke kuyoomubambila busena, ndiyooboola alimwi eelyo ndiyoomutolelezya kuŋanda yangu, kutegwa ooko nkondinoobede andinywe mukabe nkuko.” Pele baapostolo tiibazyiba kuti waamba zyakuunka kujulu. Eelyo Tomasi wati: “O Mwami, tatukuzyi pe nkoya. Ino inga twaizyiba buti nzila?”—Johane 14:2-5.

Jesu waingula kuti: “Ndime nzila, kasimpe alimwi abuumi.” Muntu ulakonzya kunjila muŋanda ya Bausyi kujulu lilikke buyo kuti wazumina Jesu anjiisyo zyakwe alimwi akutobela cikozyanyo cijatikizya mbwaakali kupona. Jesu waamba kuti: “Kunyina uuboola kuli Taata ccita kuti wainda mulindime.”—Johane 14:6.

Filipo, ooyo uubikkilide maano kapati kuswiilila, walomba kuti: “O Mwami, kotutondezya Bauso, eelyo tulasalalilwa.” Kuboneka kuti Filipo uyanda kuti Leza alibonye caantangalala kubantu, mbuli muzilengaano nzyobakabona ba Musa, Elija alimwi a Isaya. Pele baapostolo bajisi cintu cibotu kapati kwiinda zilengaano eezyo. Jesu wacisalazya eeci kwiinda mukwaamba kuti: “Nobaalumi nywebo, ikulampa ciindi ncondakkala andinywe, pele Filipo sena tonandizyiba? Kufwumbwa ooyo wandibona wamubona awalo Taata.” Jesu utondezya bube bwa Bausyi munzila iilondokede; aboobo, ikupona a Jesu alimwi akumubona kuli mbuli kubona Bausyi. Masimpe, Bausyi mbapati kwiinda Mwana, nkaambo Jesu wati: “Zintu nzyendimwaambila nywebo nobaalumi tandizyaambi mukuyanda kwangu ndemwini pe.” (Johane 14:8-10) Baapostolo babona kuti muzintu zyoonse nzyayiisya, Jesu ulemeka Bausyi.

Baapostolo ba Jesu bali kumubona kacita milimo mibotu iigambya akumumvwa kaambilizya makani mabotu aa Bwami bwa Leza. Lino wabaambila  kuti: “Kufwumbwa uundisyoma awalo uyoocita milimo njondicita; alimwi uyoocita milimo mipati kwiinda yeeyi.” (Johane 14:12) Aawa Jesu taambi kuti bayakucita maleele mapati kwiinda ngaakacita. Pele kuti bayakubeleka mulimo wabo kwaciindi cilamfwu, mucilawo cipati kapati alimwi bayakusikila bantu banji kapati kwiinda nguwe.

Kuunka kwa Jesu takwaambi kuti balekelezyegwa, nkaambo wasyomezya kuti: “Ikuti mwalomba cili coonse muzina lyangu, ndiyoocicita.” Kuyungizya waawo, waamba kuti: “Ndiyoomulomba Taata, eelyo uyoomupa mugwasyi uumbi ngomunooli limwi kukabe kutamani, nkokuti muuya wakasimpe.” (Johane 14:14, 16, 17) Wabasyomezya kuti bayakupegwa muuya uusalala, nkokuti imugwasyi ooyu uumbi. Eeci cacitika mubuzuba bwa Pentekoste.

Jesu waamba kuti: “Muciindi cisyoonto inyika tiikandiboni limbi pe, pele nywebo muyoondibona nkaambo ndilapona anywebo muyoopona.” (Johane 14:19) Jesu takalibonyi buyo kulimbabo amubili mbuli wabantu aakubusyigwa, pele alimwi mukuya kwaciindi uyakubabusya kuti bakabe anguwe kujulu kabali zilenge zyamuuya.

Lino Jesu waamba kaambo kamwi kamasimpe, ulaamba: “Kufwumbwa ooyo uutambula milawo yangu akwiitobela nguundiyanda. Alimwi kufwumbwa ooyo uundiyanda uyooyandwa a Taata, eelyo ambebo ndiyoomuyanda akulitondezya caantangalala kulinguwe.” Amvwe boobo, mwaapostolo Judasi, ooyo alimwi iwiitwa kuti Tadayo, wabuzya kuti: “O Mwami, nkaambo nzi ncoyanda kulitondezya caantangalala kulindiswe pele ikutali kunyika?” Jesu waingula kuti: “Ikuti muntu kandiyanda, unoobamba majwi aangu, eelyo Taata uyoomuyanda . . . Kufwumbwa ooyo uutandiyandi tabambi majwi aangu.” (Johane 14:21-24) Mukwiimpana abasikumutobela, inyika tiimuzumini Jesu kuti nenzila, ngokasimpe alimwi mbobuumi.

Jesu uunka buya, aboobo ino basikwiiya bakwe bayakuziyeeya buti zintu zyoonse nzyaakabayiisya? Jesu wapandulula kuti: “Mugwasyi, nkokuti muuya uusalala, ooyo ngwayootuma Taata muzina lyangu, uyoomuyiisya zintu zyoonse alimwi akumwiibalusya zintu zyoonse nzindakamwaambila.” Baapostolo balibonena nguzu zyamuuya uusalala muzintu nzyowali kucita, aboobo cisyomezyo eeci cabakkazika myoyo. Jesu wayungizya kuti: “Ndamusiila luumuno; ndamupa luumuno lwangu. . . . Myoyo yanu itapengi alimwi itayoowi pe.” (Johane 14:26, 27) Aboobo, basikwiiya balaatwaambo tumvwika ncobateelede kupenga mumoyo—banoosololelwa alimwi akukwabililwa a Bausyi Jesu.

Bumboni bwakukwabililwa a Leza buyoolibonya lino-lino. Jesu waamba kuti: “Mweendelezi wanyika ulaboola, lino tajisi nguzu zyakundizunda.” (Johane 14:30) Diabolosi wakacikonzya kumunjila Judasi akumuzunda. Pele Jesu tajisi cibi cili coonse ncakonzya kubelesya Saatani kuti amupe kuzangila Leza. Alimwi Diabolosi takamusinkili Jesu mulufwu. Nkaambo nzi? Jesu wati: “Ndilacita mbubonya Taata mbwaakandilailila kuti ndicite.” Uli masimpe kuti Bausyi bayakumubusya.—Johane 14:31.