Lugwalo Luzwa ku Kabunga Keendelezya
‘Mweelede kuba bamayi.’ (Heb. 5:12) Amuciyeeyele buyo! Jehova, Mwiiyi uucibwene mububumbo boonse ulatutamba kuti tube bamayi kutegwa katuyiisya bantu bamwi kujatikizya nguwe! Kufwumbwa mukuli wakuyiisya kasimpe kajatikizya Jehova, mube mumukwasyi, mumbungano naa mumulimo wamumuunda, ncoolwe caalubazu alimwi mukuli mupati. Ino inga twazwidilila buti?
Bwiinguzi bulajanika mumajwi aamwaapostolo Paulo ngaakalembela Timoteyo aakuti: “Kozumanana kulitakata kubala kubuleya, ikulaya, akuyiisya.” Paulo wakayungizya kuti: “Kwiinda mukucita boobo uyoolifwutula omwini alimwi abaabo bakuswiilila.” (1Tim. 4:13, 16) Mujisi mulumbe uufwutula bantu ngomweelede kwaambilizya. Aboobo cilayandika kapati kuti musungwaale kubala alimwi akuyiisya. Broshuwa eeyi ibambilidwe kumugwasya kucita boobo. Atulange-lange zimwi izili mukati.
Kuli lugwalo luzubuludwe apeeji imwi aimwi lwalo ilujisi njiisyo yamu Bbaibbele iiswaangene akaambo kapati kali muciiyo eeco naa cikozyanyo cambokakonzya kubelesyegwa kaambo kayiigwa
Jehova “Mwiiyi Mupati.” (Is. 30:20) Nokuba kuti broshuwa eeyi iyoomugwasya kuba babali alimwi akuba bamayi bacibwene, tamweelede kuluba kuti Jehova Ngokasensa kamulumbe wesu alimwi ngonguwe uukwela bantu. (Johane 6:44) Aboobo, lyoonse kamuupailila muuya Uusalala kuti umugwasye. Amulibelesye lyoonse Jwi lya Leza. Muciindi cakulijanina mpuwo, bulemu boonse amubugamike kuli Jehova. Amusolekesye kugwasya baswiilizi banu kumuyanda kapati Jehova.
Mwatambwa kuyiisya bantu mulumbe uuyandika kapati walo uuzwa kuli Leza. Tulijisi lusyomo lwakuti, ikuti mwasyoma “nguzu nzyapa Leza,” muyoozwidilila.—1 Pet. 4:11.
Tobamayinyoko,
Kabunga Keendelezya Kaba Kamboni ba Jehova
