Ciindi Jehova naakatalisya bubambe bwamukwasyi, wakapa bazyali mukuli wakulanganya bana babo. (Bakolose 3:20) Nobazyali, mukuli wanu kuyiisya mwanaanu kuyanda Jehova alimwi akumugwasya kuti akomene kabotu. (2 Timoteyo 1:5; 3:15) Alimwi mweelede kuzyiba zili mumoyo wamwanaanu. Alimwi buya cikozyanyo canu cilayandika kapati. Mulakonzya kumuyiisya kabotu mwanaanu Ijwi lya Jehova ikuti mwasaanguna ndinywe kulibikka mumoyo wanu.—Intembauzyo 40:8.

NCOLYAAMBA BBAIBBELE: ‘Kamufwambaana kuswiilila, kamumuka kwaambaula.’ (Jakobo 1:19) Ncomuyanda ncakuti bana banu kabalimvwa kwaanguluka kubandika andinywe. Beelede kulibonena kuti mulilibambilide kubaswiilila ciindi nobayanda kwaambaula andinywe. Amukulwaizye muuya waluumuno kutegwa kacibaubila kwaamba mbobalimvwa. (Jakobo 3:18) Ikuti babona kuti inga mwabakalalila naa kubayeeyela zintu zitako, tabakonzyi kwaanguluka kumwaambila mbobalimvwa. Amubakkazikile moyo bana banu, alimwi lyoonse kamubaambila kuti mulabayanda.—Matayo 3:17; 1 Bakolinto 8:1.

NCOMUKONZYA KUCITA:

• Amuswiilile ciindi bana banu nobayanda kubandika andinywe

• Kamubandika abana banu lyoonse, ikutali buyo nokuli mapenzi

NCOLYAAMBA BBAIBBELE: “Uubika moyo wakwe kumakani ulajana coolwe.” (Tusimpi 16:20) Zimwi ziindi kutegwa mumvwisye bwini mbobalimvwa bana banu tamuyandiki kubikkila buyo maano majwi ngobabelesya. Kanji-kanji, bana balaciindizya kwaamba twaambo tumwi alimwi nzyobaamba inga kazitali zini nzyobali kuyanda kwaamba. “Na muntu wavuwa katana kumvwa, mbufubafuba.” (Tusimpi 18:13.) Mutanoofwambaani kukalala.—Tusimpi 19:11.

NCOMUKONZYA KUCITA:

• Mutanoobanjili mukanwa naa kuciindizya kukalala nokuba kuti bamwaambila makani aali buti

• Amusole kuyeeya mbomwakali kulimvwa nomwakali aciimo cabo alimwi azintu nzyomwakali kubona kuti zilayandika kapati

NCOLYAAMBA BBAIBBELE: “Swiilila, mwanaangu, lulayo lwauso, Alimwi utataalazyi mulao wabanyoko.” (Tusimpi 1:8) Jehova ulibapede nguzu bazyali boonse bobilo zyakweendelezya bana babo. Mweelede kubayiisya bana banu kuti beelede kumulemeka alimwi akumumvwida. (Baefeso 6:1-3) Bana balakonzya kubona naa bazyali ‘tabakamantene ncobeni camoyo omwe.’ (1 Bakolinto 1:10) Kuti tiimwamvwana, mutanoozwangani mumeso aabana banu nkaambo cilakonzya kupa kuti kabatamulemeki nobazyali.

NCOMUKONZYA KUCITA:

• Amubandike akuzumizyanya mbomunoobapa lulayo bana banu

• Kuti nywebo angomukwetene limwi kamujisi mizeezo iindene kujatikizya mbomweelede kuyiisya bana banu, amusole kuumvwisya muzeezo ngwajisi ngomukwetene limwi

NCOLYAAMBA BBAIBBELE: “Iyisya mwana aende munzila iielede.” (Tusimpi 22:6) Kuzwidilila mukuyiisya bana banu takukalicitikili buyo pe. Mweelede kubikka bubambe bujatikizya mbomukonzya kubayiisya, calo cibikkilizya kubapa lulayo bana banu. (Intembauzyo 127:4; Tusimpi 29:17) Kupa lulayo tacaambi kwiile kusubula, pele cibikkilizya kubagwasya bana banu kumvwisya kaambo ncomubapeda milawo. (Tusimpi 28: 7) Alimwi amubayiisye kuyanda Jwi lya Jehova alimwi akuzyiba njiisyo zijatikizyidwe. (Intembauzyo 1:2) Kucita boobo kuyoobagwasya kuba amanjezeezya mabotu.—Bahebulayo 5:14.

NCOMUKONZYA KUCITA:

• Amube masimpe kuti bana banu, Leza bamubona kuba mwini-mwini ooyo ngobakonzya kusyoma

• Amubagwasye kuzyiba alimwi akweeleba micito mibi, mbuli yeeyo iijanika a intaneti. Amubayiisye mbobakonzya kweeleba bantu bajata bana akoona ambabo