Intalisyo
‘Amwiiye baabo kwiinda mulusyomo akukkazyika moyo ibayookona zyakasyomezyegwa.’—BAHEBULAYO 6:12.
1, 2. Mbuti mulangizi weendeenda umwi mbwaakali kubabona bantu basyomeka baambidwe mu Bbaibbele, alimwi nkaambo nzi bantu bali boobu ncobakonzya kuba balongwe babotu?
NAAKAMANA kuswiilila kumakani aa Bbaibbele aakakananwa amulangizi weendeenda uucembeede, mucizyi umwi Munakristo wakaamba kuti: “Bantu baambidwe mu Bbaibbele ubapandulula mbuli kuti mbeenzinyina kuzwa kaindi.” Majwi ngaakaamba mucizyi ooyu ngamasimpe, nkaambo mukwesu ooyo kwamyaka minji wali kwiiya Jwi lya Leza alimwi akulibelesya kuyiisya bamwi—cakuti atalika kwaamba zyabamaalumi abamakaintu baambidwe mu Bbaibbele ibakajisi lusyomo, cakali buyo mbuli kuti waamba makani amulongwe ngobakazyibana kaindi.
2 Eelo kaka inga cainda kubota kuba abalongwe bali boobu ibaambidwe mu Bbaibbele! Sena bantu aaba mubabona kuba bantu beni? Amweezeezye buyo mbocinga caba kweenda akubandika abantu bali boobu, kujana ciindi cakuzyiba bamaalumi abamakaintu mbuli, Nowa, Abrahamu, Rute, Eliya, alimwi a Esita. Amuyeeye buyo mbobakonzya kumugwasya kucinca buumi bwanu—majwi mabotu aalulayo alimwi akukulwaizya nkobakonzya kumupa!—Amubale Tusimpi 13:20.
3. (a) Mbuti mbotukonzya kugwasyigwa kuti twaiya kujatikizya bamaalumi abamakaintu bakajisi lusyomo ibaambidwe mu Bbaibbele? (b) Mibuzyo nzi ncotutiilange-lange?
3 Cakutadooneka, caakusika ciindi ‘cabubuke bwabantu baluleme,’ cilongwe cili boobu ciyakukonzyeka. (Mil. 24:15) Nokuba boobo, noliba lino tulakonzya kugwasyigwa kuti twaiya kujatikizya bamaalumi abamakaintu aaba ibakajisi lusyomo. Mbuti mbocinga cakonzyeka eeci? Mwaapostolo Paulo utupa lulayo oolu lugwasya lwakuti: ‘Amwiiye baabo kwiinda mulusyomo akukkazyika moyo ibayookona zyakasyomezyegwa.’ (Heb. 6:12) Notutalika kulanga-langa makani aajatikizya bamaalumi abamakaintu aabo ibakajisi lusyomo, atulange-lange mibuzyo misyoonto iiboola akaambo kamajwi a Paulo: Ino lusyomo ninzi, alimwi nkaambo nzi ncotuyandika kuba alusyomo? Mbuti mbotukonzya kubaiya aabo bantu basyomeka baambidwe mu Bbaibbele?
Ino Lusyomo Ninzi Alimwi Nkaambo Nzi Ncoluyandika?
4. Ino bantu banji bayeeya kuti lusyomo ninzi, alimwi nkaambo nzi kuyeeya kwabo ncokutaluzi?
4 Lusyomo mbube ibukkomanisya bwalo bamaalumi abamakaintu mbotuyanda kwiiya mubbuku eeli mbobakali kubikkila kapati maano. Bantu banji mazuba aano tabaluzyi lusyomo lwini-lwini ncolwaamba, bayeeya kuti caamba kusyoma kakunyina bumboni buli boonse. Nokuba boobo, balisweekede mukuyeeya kwabo. Lusyomo tacaambi kwiile kusyoma pe; takuli kulimvwa buyo kwamumoyo; nzinji zijatikizyidwe mukusyoma. Kwiile kusyoma nkubi. Mbwalimvwa muntu kulakonzya kucinca kufwumbwa ciindi, caboola kumakani aa Leza tatuyandiki buyo kusyoma pe, mbwaanga ‘aalo madaimona alasyoma alimwi alakankama.’—Jak. 2:19.
5, 6. (a) Ino lusyomo lwesu lubikkilizya zyintu zyobilo zili zitalibonyi? (b) Ino ntalisyo yalusyomo lwesu yeelede kuyuma buti? Amupe cikozyanyo.
5 Lusyomo lwini-lwini lubikkilizya zyintu zinji kutali buyo kusyoma. Amubone Bbaibbele mbolilupandulula. (Amubale Bahebulayo 11:1.) Paulo wakaamba kuti lusyomo lubikkilizya zyintu zyobilo nzyotutakonzyi kubona. Cakusaanguna, lujatikizya zyintu ziliko ncobeni mazuba aano “zitanabonwa.” Meso eesu taakonzyi kubona zyintu ziliko ncobeni izili kujulu—tatukonzyi kumubona Jehova Leza, Mwanaakwe, naa Bwami bwalo ibulela kujulu lino. Cabili, lusyomo lujatikizya zyintu ‘zilangilwa’—zyintu zitanacitika. Tatukonzyi kwiibona nyika mpya iilaafwaafwi kuletwa a Bwami bwa Leza. Sena eeci caamba kuti, lusyomo lwesu muzyintu eezyi zitanalibonya alimwi azyintu nzyotulangila taakwe mpoluyeeme?
6 Peepe! Paulo wakapandulula kuti lusyomo lwini-lwini lulijisi ntalisyo njumu. Ciindi naakaamba lusyomo kuti “mbulangizi businizyidwe,” wakabelesya majwi aakonzya kwaamba “title deed” (cisinizyo). Amweezeezye kuti umwi muntu wamupa ŋanda. Ulakonzya kumupa cipepa kumaanza akumwaambila kuti, “Njeeyi ŋanda yanu mpya.” Cakutadooneka, taambi kuti muyakukkala acipepa ciya pe; upandulula kuti eeci cipepa ncecisinizyo cizumizyidwe amulawo, aboobo kuba acipepa cili boobo ncimwi buyo akuba aŋanda iini. Mbubwenya buyo, abwalo bumboni ibutupa kuba alusyomo bulisinizyidwe ncobeni, cakuti ncimwi buyo akuba aazyintu eezyo.
7. Ino lusyomo lwini-lwini lubikkilizya nzi?
7 Aboobo, lusyomo lwini-lwini lubikkilizya bumboni businizyidwe ncobeni alimwi akusyoma kakunyina kudooneka ikuyeeme aali Jehova Leza. Lusyomo lutupa kuti katumubona kuti ngu Taateesu siluyando alimwi akusyoma kuti zyintu zyoonse nzyaakatusyomezya ziyakucitika ncobeni. Nokuba boobo, lusyomo lwini-lwini lubikkilizya zinji. Mbubwenya mbuli zyintu zipona, lweelede kubambwa kabotu kutegwa kaluliko lyoonse. Tweelede kulutondezya mumilimo njotucita, buyo-buyo inga lwafwa.—Jak. 2:26.
8. Nkaambo nzi lusyomo ncoluyandika kapati?
8 Nkaambo nzi lusyomo ncoluyandika kapati? Paulo wakapa bwiinguzi bumvwika. (Amubale Bahebulayo 11:6.) Ikuti katutajisi lusyomo, tatukonzyi kusika kuli Jehova alimwi tatukonzyi kumukkomanisya pe. Aboobo, lusyomo lulayandika kapati ikuti katuyanda kucita zyintu zyamaano, nkokuti makanze ngozijisi zilenge zyoonse zyamaano: kuba acilongwe alimwi akulemeka Taateesu wakujulu, Jehova.
9. Mbuti Jehova mbwaatondezya kuti ulizyi kuti tuyandika lusyomo?
9 Jehova ulizyi mbociyandika kuba alusyomo, aboobo utupa zikozyanyo kutegwa atuyiisye mbotukonzya kuyaka alimwi akutondezya lusyomo. Mbungano zya Banakristo zililongezyedwe azikozyanyo zyabamaalumi basyomeka ibasololela. Ijwi lyakwe lyaamba kuti: “Amwiiye lusyomo lwabo.” (Heb. 13:7) Alimwi watupa azimbi zikozyanyo. Paulo wakalemba kujatikizya “nkamu mpati . . . yabakamboni,” bamaalumi abamakaintu bakaindi ibakasiya zikozyanyo zibotu zyalusyomo. (Heb. 12:1) Kuli babelesi banji ba Jehova basyomeka mbaatakaamba Paulo mulugwalo lwa Bahebulayo caandaano 11. Bbaibbele lilijisi makani manji aamasimpe aamba zyabamaalumi abamakaintu, bana abapati, ibakali mubukkale bwiindene-indene, ibakapona buumi butondezya kuti bakali alusyomo alimwi ibakasiya zikozyanyo zikonzya kutugwasya munyika ino mwalo bantu banji mobatajisi lusyomo.
Mbuti Mbotukonzya Kwiiya Lusyomo lwa Bamwi?
10. Mbuti ciiyo cesu tobeni mbocikonzya kutugwasya kwiiya bamaalumi abamakaintu basyomeka baambidwe mu Bbaibbele?
10 Nciyumu kwiiya muntu ccita kuti mwamulangisisya mbwacita zyintu. Cakutadooneka, mwanoobala bbuku eeli, mulabona kuti kuli buvwuntauzyi bunji bwakacitwa kutegwa mubazyibe kabotu bamaalumi abamakaintu aaba ibakajisi lusyomo. Inga cainda kubota kaka ikuti andinywe mwavwuntauzya! Ciindi nomucita ciiyo canu nobeni, amuzibelesye zibelesyo zyakuvwuntauzizya nzyomujisi kutegwa mulimvwisye Bbaibbele. Ciindi nomuzinzibala kuyeeya aali zyeezyo nzyomwaiya, amusole kweezeezya busena alimwi azyintu izyakali kucitika mucibalo eeco camu Bbaibbele. Amusole kwaabona masena, amumvwe zyakali kwaambwa akucitika, amununkizye amweezeezye kuti andinywe mwakaliko. Ciyandika kapati, amusole kweezeezya mbobakali kulimvwa bantu bakajatikizyidwe. Ciindi nomulimvwa mbobakali kulimvwa, bamaalumi abamakaintu aabo ibakali kusyomeka muyakubabona kuba bantu beni-beni, bantu mbomuzyi—bamwi buya bayakuba mbuli balongwe mbomwakazyibana kaindi.
11, 12. (a) Mbuti mbomukonzya kuba acilongwe a Abrahamu a Sara? (b) Mbuti mbomukonzya kugwasyigwa acikozyanyo ca Hana, Eliya, naa Samuele?
11 Ikuti mwabazyiba ncobeni, muyakuba aaluyandisisyo lwakwiiya zikozyanyo zyabo. Mucikozyanyo, amweezeezye kuti mwapegwa mulimo mupya. Andiza kwiinda mumbunga ya Jehova, mwalombwa kuti muyungizye mulimo wanu. Andiza mwalombwa kuti muunke kubusena bumwi ikuyandika bakambausi cakufwambaana, naa kulombwa kuti mubelesye nzila zimwi zyabukambausi nzyomutazyibide kapati. Nomuyeeya akupaila kujatikizya mulimo ooyo, inga camugwasya kapati kuzinzibala kuyeeya cikozyanyo ca Abrahamu. Walo alimwi a Sara bakalilisungwide kusiya munzi wa Uri abubotu boonse bwakali mumo alimwi bakalongezyegwa kapati akaambo kakucita oobo. Nomucita zyintu mbuli mbobakacita, cakutadooneka muyakulimvwa kuti lino mwabazyiba ncobeni kwiinda kaindi.
12 Mbuti kuti muntu umwi ngomumvwana limwi kapati wamubisizya akumutyompya—andiza mwalimvwa kuti inga cainda kubota ikuti mwataunka kumiswaangano? Kuyeeya cikozyanyo ca Hana alimwi ambwaakazumanana kukomba Jehova nokuba kuti Penina wakali kumupenzya kulakonzya kumugwasya kutegwa musale kabotu—alimwi kucita oobo inga kwamugwasya kutegwa Hana abe mulongwe wanu waamoyo. Mbubwenya buyo, ikuti kamutyompedwe akulimvwa kubula mulimo, Eliya ulakonzya kuba mulongwe wanu ikuti mwaiya cikozyanyo cakwe ciindi naakali kupenga alimwi a Jehova mbwaakamuumbulizya. Abalo bakubusi ibayungwa abasicikolonyina batalilemeki, balakonzya kubona Samuele kuba mulongwe wabo ciindi nobaiya mbuli mbwaatakayungwa abana ba Eli ibakali kubelekela kutente.
13. Sena kwiiya lusyomo lwabantu baambidwe mu Bbaibbele ibakajisi lusyomo kupa kuti lusyomo lwanu lube lwabuyo kuli Jehova? Amupandulule.
13 Sena kwiiya lusyomo lwabantu baambidwe mu Bbaibbele ibakajisi lusyomo kupa kuti lusyomo lwanu lube lwabuyo kuli Jehova? Peepe! Amuyeeye kuti, Ijwi lya Jehova litukulwaizya kwiiya bantu bakajisi lusyomo. (1 Ko. 4:16; 11:1; 2 Te. 3:7, 9) Ciinda waawo, bamwi bantu mbotuya kwiiya mubbuku eeli abalo bakali kwiiya bantu ibakali kusyomeka alimwi ibakapona kabatanazyalwa. Mucikozyanyo, mubbuku eeli mu Cibalo 17 icaamba zya Mariya, citondezya kuti ciindi cimwi wakabelesya majwi akaambidwe a Hana, calo icitondezya kuti wakali kumubona kuti wakali cikozyanyo cibotu. Sena eeci cakapa kuti lusyomo lwa Mariya luceye? Peepe! Muciindi caboobo, cikozyanyo ca Hana cakamugwasya Mariya kutegwa ayake lusyomo lwakwe akuba acilongwe cilibedelede a Jehova Leza.
14, 15. Nzyintu nzi izili mubbuku eeli, alimwi mbuti mbotukonzya kulibelesya kabotu?
14 Bbuku eeli lyakabambilwa kumugwasya kuyumya lusyomo lwanu. Izibalo zitobela zyakazwa muzibalo izyaamba kuti: “Amwiiye Lusyomo Lwabo” izyakamwaigwa mumagazini aa Ngazi Yamulindizi akati kamwaka wa 2008 a 2013. Nokuba boobo, kuli makani aambi aakayungizyigwa. Cibalo cili coonse cilijisi mibuzyo kutegwa itugwasye mumubandi alimwi amukubelesya nzyotwiiya. Kwabikkwa zifwanikiso zimbi iziboneka kabotu izyaabambilwa bbuku eeli, mpoonya eezyo zyakaliko kale zyakomezyegwa naa kupentwa bumbi kutegwa ziboneke kabotu kapati. Alimwi zyintu zimbi zigwasya mbuli maccaati alimwi amamaapu abikkwa. Bbuku lya Amwiiye Lusyomo Lwabo ncibelesyo cakabambilwa ciiyo canu nobeni, camukwasyi, alimwi acambungano. Cakutadooneka, mikwasyi minji iyakukkomana kulibalila antoomwe cakupozya.
15 Amugwasyigwe abbuku eeli nomwiiya lusyomo lwababelesi ba Jehova basyomeka bakaindi. Alimwi alimugwasye kukomena mulusyomo nomuswena kuli Taateesu wakujulu, Jehova!
