1, 2. Mbukkale buli buti bwakaliko ciindi Samuele naakabandika abantu bamu Israyeli, alimwi nkaambo nzi ncaakeelede kubagwasya kuti beempwe?

SAMUELE wakalanga bantu bakwe. Bantu bakalibungene mu Giligala, kwiinda mukwiitwa amuntu ooyu uusyomeka iwakabelekede kali musinsimi alimwi mubetesi kwamyaka iili mbwiibede. Kweelana akkalenda yamazuba aano, mwakali mumwezi wa May naa June; cilimo cakali afwaafwi kumana. Myuunda yamubusena oobu yakalizwide amaila (bulotwe) aakali kuyandika kutebula. Bantu boonse bakaluumwine. Mbuti Samuele mbwaakali kunga wabasika amoyo bantu?

² Bantu tiibakali kumvwisya bukkale bwabo mbobwakabijide. Bakali kuyanda buyo mwami muntunsi kuti abeendelezye. Tiibakazyi kuti akaambo kakucita boobo bakatondezya kubula bulemu kuli Leza wabo, Jehova, alimwi akumusinsimi wakwe. Kwiinda mukwaamba majwi aayo, bakali kukaka Jehova kuba Mwami wabo! Mbuti Samuele mbwaakali kunga wabagwasya bantu aaba kuti beempwe?

3, 4. (a) Nkaambo nzi Samuele ncaakaambila zyabwanike bwakwe? (b) Nkaambo nzi cikozyanyo ca Samuele calusyomo ncocigwasya kulindiswe mazuba aano?

³ Samuele wakaambila nkamu yabantu kuti: “Mebo ndacembaala, ndaba amvwi.” Imvwi zyakwe zyakapa kuti bantu baabikkile maano majwi aakwe. Kumane wakabaambila kuti: “Mebo ndeenda kumeso aanu mazuba oonse kuzwa kubwanike bwangu kusikila sunu.” (1 Sam. 11:14, 15; 12:2) Nokuba kuti Samuele wakalicembeede, wakali kwaayeeya mazuba aabwanike bwakwe. Wakacili kwaayeeya kabotu-kabotu mazuba aayo. Kusala nkwaakasalide kaindi naakacili kukomena, kwakapa kuti apone buumi bwakulyaaba akusyoma Leza wakwe, Jehova.

 ⁴ Samuele wakali kuyandika kuyumya lusyomo lwakwe alimwi akulubamba, nokuba kuti ziindi zinji wakazingulukidwe abantu batakwe lusyomo alimwi batasyomeki. Mbubwenya buyo amazuba aano nciyumu kuyumya lusyomo akaambo kakuti tukkede munyika iitakwe lusyomo alimwi iipilingene. (Amubale Luka 18:8.) Atubone nzyotukonzya kwiiya kuzwa kucikozyanyo ca Samuele, tulasaanguna kulanga-langa buumi bwakwe naakacili mwana.

5, 6. Ino mbwaakakomezyegwa Samuele kwiindene buti ambobakomezyegwa bana banji, alimwi nkaambo nzi bazyali bakwe ncobakasinizyide kuti wakali kuyakulanganizyigwa kabotu?

⁵ Mbwaakakomezyegwa Samuele kuliindene ambobakomezyegwa bana banji. Nokwakainda buyo ciindi cisyoonto kuzwa naakaleka kunyonka, andiza kajisi buyo myaka yakuzyalwa yotatwe naa kwiinda buyo aawo asyoonto, wakatalika mulimo waatente lisalala lya Jehova mu Silo, musinzo uulampa makkilomita aali 32 kuzwa kumunzi wakwe ku Rama. Bazyali bakwe ba Elikana a Hana, bakaaba mwanaabo musankwa kuli Jehova kutegwa acite mulimo waalubazu, kupa kuti abe mu Naziri mubuumi bwakwe boonse. * Sena eeci caamba kuti bakamukaka Samuele alimwi tiibakali kumuyanda bazyali bakwe?

⁶ Peepe! Bakalizyi kuti mwanaabo musankwa wakali kuyakulanganizyigwa kabotu ku Silo. Cakutadooneka, Mupaizi Mupati Eli ngowakali kulanganya zyintu, alimwi Samuele wakabeleka antoomwe anguwe. Alimwi kwakali bamakaintu banji ibakali kubeleka milimo iisiyene-siyene atente, kweelede kuti bakali kwiicita munzila yeelede.—Kul. 38:8; Bab. 11:34-40.

7, 8. (a) Mbuti bazyali ba Samuele mbobakali kumukulwaizya mwaka amwaka? (b) Ncinzi bazyali mazuba aano ncobakonzya kwiiya kubazyali ba Samuele?

⁷ Kuyungizya waawo, Hana a Elikana kunyina nobakamuluba mwanaabo mutaanzi kuzyalwa, walo iwakali bwiinguzi bwamupailo. Hana wakalilombede mwana musankwa kuli Leza, akusyomezya kuti uyakwaaba mwana ooyo kuli Leza kuti acite mulimo uusalala mubuumi bwakwe boonse. Mwaka amwaka naakali kuswaya, Hana wakali kumutolela Samuele kabaki kapya nkaakamusumina kuti kabelesya mumulimo wakwe waatente. Cakutadooneka, mwana ooyo wakali kukulangila kuswaya ooko. Wakali kukukkomanina kukulwaizya kwaluyando kwabazyali bakwe alimwi alulayo ndobakali kumupa ciindi nobakali kumuyeezya kuti cakali coolwe cipati kubelekela Jehova mubusena oobu bulibedelede.

⁸ Kuli ziiyo zinji nzyobakonzya kwiiya bazyali mazuba aano kuzwa kuli Hana a Elikana. Bazyali banji ciindi nobakomezya bana inga babikkila buyo kapati maano kukujana ziyandika zyakumubili zyamwana akutabikkila maano nzyayandika kumuuya. Pele bazyali ba Samuele bakasaanguna kubikkila  maano kuzyintu zyakumuuya, alimwi kucita oobo kwakamugwasya kapati mubuumi bwakwe.—Amubale Tusimpi 22:6.

9, 10. (a) Amupandulule tente mbolyakapangidwe alimwi ambwaakali kulimvwa mwanike Samuele kujatikizya busena oobo busalala. (Amubone amajwi aamunsi.) (b) Milimo nzi iimbi njaakajisi Samuele, alimwi muunzila nzi bana-bana mazuba aano mobakonzya kwiiya cikozyanyo cakwe?

⁹ Tulakonzya kweezeezya mulombe ooyo mbwaakali kukomena akweendeenda mumalundu aakazingulukide Silo. Naakali kulanga munsi akubona munzi akkuti ilyakali kulubazu lumwi, kweelede kuti moyo wakwe wakali kukkomana kapati naakali kubona tente lya Jehova. Tente eeli bwakali busena busalala ncobeni. * Tente eeli ilyakayakidwe myaka iili 400 yakaindide kwiinda mukulaililwa aa Musa, mbobwakali busena bwabukombi busalala bwa Jehova nyika yoonse.

¹⁰ Mwanike Samuele wakakomena kaliyanda tente. Mucibalo cimwi ncaakazikulemba, tubala kuti: “Samuele wakali kubeleka milimo kubusyu bwa-Jehova, kali mwana uusamide cikobela cacisani cituba.” (1 Sam. 2:18) Cikobela eeci cakali kutondezya kuti Samuele wakali kubagwasyilizya bapaizi mumilimo yaatente. Nokuba kuti tanaakali umwi wabaabo ibakali baciinga cabapaizi, Samuele wakajisi milimo mbuli yakujula milyango iyakali kutozya kutente mafwumofwumo alimwi akulanganya Eli iwakacembeede. Nokuba kuti wakajisi coolwe camilimo iili boobu, mukuya kwaciindi moyo wakwe wakapenga. Kuli cintu cipati cakalubide muŋanda ya Jehova.

11, 12. (a) Nkaambo nzi kayandika kapati Hofeni a Pinehasi nkobakaalilwa kutobela? (b) Micito nzi mibi alweeno Hofeni a Pinehasi njobakali kucita atente? (Amubone amajwi aamunsi.)

¹¹ Kacili mwana, Samuele wakalibonena bukkale bubi ncobeni alweeno. Eli wakajisi bana bobilo basankwa, Hofeni a Pinehasi. Mucibalo ca Samuele tubala kuti: “Bana baalumi ba-Eli kabali bana-Saatani [babuyo], kabatezi Jehova.” (1 Sam. 2:12) Twaambo tobilo tuli mukapango aaka tuleendelana. Hofeni a Pinehasi bakali ‘bana babuyo’—bakali “bana batakwe mulimo”—akaambo kakuti kunyina nobakali kubikkila maano kuli Jehova. Tiibakali kuzibikkila maano zyeelelo zyakwe ziluleme. Kutabikkila maano kwabo kwakapa kuti bacite zibi zimbi.

 ¹² Mulawo wa Leza uujatikizya milimo yabapaizi alimwi ambobakeelede kutuula zipaizyo atente lyakwe tiiwakali kukatazya kumvwa pe. Alimwi kwakali twaambo tumvwika Leza ncaakabapeda Mulawo uuli boobo. Zipaizyo eezyo zyakali kwiiminina bubambe bwa Leza bwakulekelela zibi kutegwa bantu kabasalala mumeso aakwe, kutegwa beelele kupegwa zilongezyo akusololelwa. Pele Hofeni a Pinehasi bakapa kuti bapaizi beenzinyina bacileke kuzilemeka zituuzyo. *

13, 14. (a) Mbuti bantu basyomeka mbobakali kujatikizyigwa azibi izyakali kucitwa atente? (b) Mbuti Eli mbwaakaalilwa kuulanganya mukuli wakwe wabuzyali alimwi awabupaizi?

¹³ Amuyeeye buyo mwanike Samuele mbwaakali kugambwa kubona zibi zipati izyakali kucitwa kakunyina kululamikwa. Amuyeeye buyo mbwaakali kulimvwa naakali kubona bantu—bapengede, balicesya, batyompedwe—ibakali kuboola kutente kutegwa baumbulizyigwe kumuuya akujana nguzu, mbobakali kufwubaazyigwa akupiluka kabatyompedwe! Alimwi amuyeeye buyo mbwaakalimvwa naakazyiba kuti Hofeni a Pinehasi bakali kusulaika milawo ya Jehova iijatikizya kulilemeka, akuzyiba kuti bakali koonana abamakaintu bamwi ibakali kubelekela atente! (1 Sam. 2:22) Andiza wakali kulangila kuli Eli kuti ulazilulamika zyintu.

¹⁴ Eli wakali muciimo cibotu cakululamika penzi eeli ilyakali kuyabukomena. Mbwaanga wakali mupaizi mupati, wakali mukuli wakwe wakulanganya zyintu izyakali kucitika atente. Alimwi mbwaanga wakali muzyali, wakajisi mukuli wakululamika bana bakwe. Kucita boobo nokwakabagwasya, nkaambo micito eeyo tiiyakali kabotu kulimbabo alimwi akubantu bambi banji bamumunzi ooyo. Nokuba boobo, Eli wakaalilwa kwiilanganya mikuli yakwe, mukuli wabuzyali alimwi awabupaizi. Wakabanyemena buyo asyoonto bana bakwe. (Amubale 1 Samuele 2:23-25.) Pele bana bakwe bakeelede kupegwa lulayo lwanguzu kapati. Bakali kucita zibi izyakali kuyandika kuti bajaigwe!

15. Mulumbe nzi wanguzu wakucenjezya Jehova ngwaakatuma kuli Eli, alimwi ncinzi mukwasyi wa Eli ncowakacita akucenjezya ooku?

¹⁵ Makani aaya akabija kapati cakuti Jehova wakatuma “muntu wa-Leza,” musinsimi uutaambidwe zyina, kuli Eli akumwaambila mulumbe wanguzu walubeta. Jehova wakaambila Eli kuti: ‘Ulemeka bana bako kwiinda ndime.’ Kwiinda mumajwi aayo Leza wakatondezya kuti bana babi ba Eli bakali kuyakufwa mubuzuba bomwe alimwi akuti mukwasyi wa Eli wakali kuyakupenga kapati, nokuba kusweekelwa coolwe camulimo wabupaizi. Sena kucenjezya ooku kwanguzu kwakaugwasya mukwasyi ooyu kutegwa ucince? Bbaibbele litondezya kuti Eli abana bakwe kunyina nobakacinca pe.—1 Sam. 2:27–3:1.

16. (a) Makani nzi ngotubala kujatikizya mbwaakali kukomena mwanike Samuele? (b) Sena makani aali boobu alamukulwaizya? Amupandulule.

 ¹⁶ Mbuti bubi buli boobu mbobwakamujatikizya mwanike Samuele? Ciindi aciindi, cibalo eeci icaamba zyamicito mibi, alimwi cilaamba azyintu zibotu izyakali kucitika, makani mabotu aajatikizya mbwaakali kukomena Samuele akuyaambele. Mutalubi kuti mulugwalo lwa 1 Samuele 2:18, tubala kuti cakusyomeka Samuele “wakali kubeleka milimo kubusyu bwa-Jehova.” Noliba leelyo naakacili mwana, Samuele wakabikkila maano kukubelesya buumi bwakwe mumulimo wa Leza. Mukapango 21 mucaandaano ncimunya eeci, tubala majwi aakulwaizya kapati aakuti: ‘Mwana Samuele wakazumanana kukomena mumeso aa Jehova.’ Naakali kukomena, cilongwe cakwe a Usyi wakujulu cakali kuyaabuyuma. Cilongwe cili boobu ciyumu a Jehova cilakwabilila mubukkale buli boonse bubyaabi.

17, 18. (a) Mbuti bakubusi Banakristo mbobakonzya kwiiya cikozyanyo ca Samuele ciindi nobaswaanganya bukkale bubi? (b) Ncinzi citondezya kuti Samuele wakasala nzila mbotu?

¹⁷ Cakali cuubauba kuli Samuele kutalika kuyeeya kuti mbwaanga mupaizi mupati abana bakwe balabisya, andime ndilakonzya kucita kufwumbwa ncondiyanda. Pele kubisya kwabamwi, kubikkilizya akwabaabo ibali mubweendelezi takweelede kutupa kuti andiswe tubisye pe. Mazuba aano, bakubusi banji Banakristo balacitobela cikozyanyo ca Samuele alimwi bazumanana ‘kukomena mumeso aa Jehova’—nokuba kuti bamwi babazingulukide balaalilwa kupa cikozyanyo cibotu.

¹⁸ Ncinzi cakacitika akaambo kakuti Samuele wakasala kumvwida Jehova? Tubala kuti: “Mwana Samuele wakali kuya bukula akubota kumeso aa-Jehova akumeso aabantu.” (1 Sam. 2:26) Aboobo, Samuele wakali kuyandwa abaabo mbaakali kubona kuti nzyobakali kwaamba zyakali kuyandika kulinguwe. Jehova walo mwini wakali kumuyanda kapati mwana ooyu akaambo kakusyomeka kwakwe. Cakutadooneka, Samuele  wakalizyi kuti Leza wakali kuyakucita cimwi cintu kujatikizya bubi bwakali kucitika mu Silo, pele weelede kuti wakali kulibuzya kuti, ino ndilili nocakali kuyakucitika? Buzuba bumwi masiku mubuzyo ooyu wakaingulwa.

19, 20. (a) Amupandulule icakamucitikila Samuele buzuba bumwi masiku kali kutente. (b) Mbuti Samuele mbwaakamuzyiba iwakali kumwiita, alimwi mbuti mbwaakali kumulanganya Eli?

¹⁹ Bumwi buzuba kubucedo; lampi lipati lyamutente kaliciyaka kwakacitika cintu cimwi. Kalede, Samuele wakamvwa jwi kaliita zyina lyakwe. Samuele wakali kuyeeya kuti Eli iwakacembeede alimwi iwakatalikide kubaya ngowakali kumwiita. Samuele wakabuka ‘akuzuzila’ ikwakali mudaala ooyo. Amusole kuyeeya akubona mulombe ooyo kazuza kakunyina kusama mpato kuunka kuli Eli kutegwa azyibe ncaakali kumwiitila. Cilakulwaizya kubona kuti Samuele wakali kumulanganya Eli cabulemu alimwi caluzyalo. Nokuba kuti Eli wakalicitide zibi, wakacili mupaizi mupati wa Jehova.—1 Sam. 3:2-5.

²⁰ Samuele wakabusya Eli kwiinda mukwaamba majwi aakuti: “Mpendi, nkaambo wandiita.” Pele Eli wakaamba kuti tiindakwiita kopiluka ukoone. Eeci cakacitika cakwiinduluka-induluka! Kumane, Eli wakazyiba icakali kucitika. Aciindi eeci Jehova tanaakali kuvwula kutuma zilengaano naa mulumbe wabusinsimi kubantu bakwe, alimwi tacikatazyi kumvwisya ncaakali kucitila boobo. Pele Eli wakalizyi kuti Jehova ngowakali kwaambaula—pele lino wakali kubandika amulombe ooyu! Eli wakaambila Samuele kuti apiluke akoone akumulailila mbwaakeelede kwiingula Jehova. Samuele wakamvwida. Kakutanainda ciindi wakamvwa jwi kaliti: “Samuele, Samuele.” Mulombe ooyu wakaingula kuti: ‘Koamba, mulanda wako ulaswiilila.’—1 Sam. 3:1, 5-10.

21. Mbuti mbotukonzya kuswiilila kuli Jehova mazuba aano, alimwi nkaambo nzi ncocigwasya kucita oobo?

²¹ Lino Jehova wakaba amubelesi mu Silo iwakali kuswiilila. Alimwi mubuumi bwakwe boonse, Samuele lyoonse wakali kuswiilila kuli Jehova. Sena mulaswiilila kuli Jehova lyoonse? Tatweelede kulindila kuti mane tumvwe jwi kuzwa kujulu kalyaambaula kulindiswe masiku. Mazuba aano, jwi lya Leza lyoonse nkolili. Nkolili mu Jwi lyakwe, Ibbaibbele. Ikuti katuswiilila kuli Leza akucita nzyaamba, lusyomo lwesu luyakuyuma. Oobo mbocakabede akuli Samuele.

22, 23. (a) Mbuti mulumbe ngwaakayoowede kutola Samuele mbowakazuzikizyigwa? (b) Mbuti mpuwo ya Samuele mboyakazumanana kumvwugwa?

²² Icakacitika kuli Samuele masiku aalya mu Silo cakali cintu cipati mubuumi bwakwe, nkaambo kuzwa aciindi eeci wakaba acilongwe caalubazu, wakaba musinsimi wa Leza alimwi amwaambilizi. Kumatalikilo, mulombe ooyo wakayoowa kumwaambila Eli mulumbe wa Jehova nkaambo wakali mulumbe walubeta iwakali kutondezya kuti businsimi bujatikizya mukwasyi ooyu, bwakali afwaafwi kuzuzikizyigwa. Nokuba boobo, Samuele wakaamba cabusicamba—alimwi Eli cakulicesya wakalutambula lubeta oolo lwa Leza. Kakutanainda aciindi, zyoonse nzyaakaambide  Jehova zyakazuzikizyigwa: Bana Israyeli nobakaunka kuyakulwana aba Filisti, boonse bobilo Hofeni a Pinehasi bakajaigwa mubuzuba bomwe, alimwi Eli naakamvwa kuti Bbokesi lisalala balibweza ba Filisti wakawa akufwa.—1 Sam. 3:10-18; 4:1-18.

²³ Nokuba boobo, mpuwo yakusyomeka kwa Samuele kali musinsimi yakazumanana kumvwugwa. Cibalo caamba kuti: “Jehova wakali awe,” alimwi Jehova wakazuzikizya businsimi boonse bwa Samuele.—Amubale 1 Samuele 3:19.

24. Nokwakainda ciindi, nkusala kuli buti nkobakasala bana Israyeli, alimwi nkaambo nzi eeci ncocakali cibi cipati?

²⁴ Sena bana Israyeli bakacitobela cikozyanyo ca Samuele akuba bantu basimide kumuuya, bantu basyomeka? Peepe! Nokwakainda ciindi, bakasala kuti tiibakacili kuyanda kuba amusinsimi buyo kuti kababeteka. Bakali kuyanda kuba mbuli zisi zimbi zyakabazingulukide akuba amwami muntunsi kuti abeendelezye. Kwiinda mukulaililwa a Jehova, Samuele wakacita ncobakali kuyanda. Nokuba boobo, wakeelede kubaambila bana Israyeli mbocakali cipati cibi eeco. Tiibakali kukaka muntu buyo pe, pele bakali kukaka Jehova mwini. Aboobo, wakaambila bantu kuti baunke ku Giligala.

25, 26. Nobakali mu Giligala, mbuti Samuele mudaala mbwaakabagwasya bantu kutegwa babone mbocakali cipati cibi cabo ncobakabisyila Jehova?

²⁵ Lino atupiluke kumakani aamba zya Samuele ciindi naakali kubandika abana Israyeli mu Giligala aciindi eciya cikatazya. Samuele iwakacembeede wakabayeezya bana Israyeli milimo yakwe yakusyomeka. Mpoonya tubala kuti: “Samuele wakoongolola kuli-Jehova.” Wakalomba kuti Jehova alete mvwula yamuzuzumo.—1 Sam. 12:17, 18.

²⁶ Mvwula yamuzuzumo ciindi cacilimo tiiyakali kulangilwa pe. Ikuti naa oobo mbombubo mbobakali kulimvwa, eeco cakacinca kakutanainda aciindi. Cakutayeeyelwa, kwakalibonya makumbi aamvwula. Muwo wakatalika kubbubbula mumyuunda yamaila. Muzuzumo wakatalika kulimvwisya. Mvwula yakatalika kuwa. Ino bantu bakacita nzi? “Bantu boonse bakayoowa loko Jehova a-Samuele.” Aciindi eeci bakabona mbocakali cipati cibi cabo.—1 Sam. 12:18, 19.

27. Mbuti Jehova mbwalimvwa kujatikizya baabo ibaiya lusyomo lwa Samuele?

²⁷ Jehova, Leza wa Samuele, ngowakapa kuti bantu aaba bazangi beempwe. Kuzwa kubwana kusikila naakakomena, Samuele wakali kusyoma muli Leza wakwe. Alimwi Jehova wakamulongezya. Kusikila sunu, Jehova tanaacinca pe. Ulabagwasyilizya aabo boonse ibaiya lusyomo lwa Samuele.