1, 2. (a) Amupandulule lweendo lwa Rute a Naomi alimwi abuumba mbobakajisi. (b) Ino lweendo lwa Rute lwakaindene buti alweendo lwa Naomi?

RUTE wakali kweenda antoomwe a Naomi munzila iyakali kwiinda muzibanda zyabana Moabu. Bakali buyo bobilo, kababoneka mbuli tuntu tusyoonto kapati mubusena ibwakakwazeme kapati. Amuyeeye buyo Rute kalanga zuba liyanda kubbila, mpoonya walanga banyinazyala akutalika kuyeeya naa cakali ciindi cakuti bajane busena bwakoona masiku aayo. Rute wakali kumuyanda kapati Naomi cakunga wakali kukonzya kucita kufwumbwa ncakonzya kutegwa alanganye banyinazyala.

² Bamakaintu aaba bobilo bakali mubuumba. Naomi wakali mukamufwu kwamyaka iili mbwiibede, alimwi aciindi eeci wakali kulila bana bakwe basankwa bobilo ibakafwide caino-ino, Kilioni a Maloni. Rute awalo wakali kulila. Maloni nguwakali mulumaakwe. Walo alimwi a Naomi bakali kuunka kubusena bomwe, munzi wa Betelehemu mu Israyeli. Nokuba kuti bakali kuunka kubusena bomwe, nzyobakali kuunkila zyakaliindene. Naomi wakali kujokela kumunzi ookwabo. Rute wakali kuunka kubusena mbwatazyi, kusiya banamukwasyi, munzi wakwe, alimwi azilengwa zyoonse—kubikkilizya abaleza.—Amubale Rute 1:3-6.

3. Mibuzyo nzi iititugwasye kwiiya lusyomo lwa Rute?

³ Ncinzi cakapa kuti mukaintu ooyu asale kucinca ooko? Ino Rute wakali kuyakuzijana kuli nguzu kutegwa acikonzye kupona walo alimwi akugwasya Naomi? Notubandika bwiinguzi kumibuzyo eeyi, tulajana ziiyo zinji nzyotukonzya kwiiya kuzwa kulusyomo lwa Rute muna Moabu. (Amubone alimwi akabbokesi kakuti  “Bbuku Lisyoonto Likkomanisya.”) Cakusaanguna, atulange-lange icakapa kuti bamakaintu aaba bobilo balijane mulweendo oolu lulamfwu lwakuunka ku Betelehemu.

4, 5. (a) Nkaambo nzi mukwasyi wa Naomi ncowakalongela kuya ku Moabu? (b) Mbuyumuyumu nzi Naomi mbwaakaswaanganya kali mu Moabu?

⁴ Rute wakakomenena mu Moabu, cisi cisyoonto icakali kujwe kwa Lwizi Lwamunyo. Busena oobo bwakajisi kapati malundu, amyeezi  imwakali makkuti malamfwu. “Nyika ya-Moabu” yakali nyika iijisi mbolezi, nyika mbotu kulima nociba ciindi mu Israyeli nomwakali nzala. Akaambo kanzala, Maloni abamukwasyi wakwe bakaunka ku Moabu kwalo nkobakaakubonana a Rute ciindi cakusaanguna.—Rut. 1:1.

⁵ Nzala iyakali mu Israyeli njiyakapa kuti mulumi wa Naomi, Elimeleki, asale kulonga amukaintu wakwe abana bakwe bobilo akuunka kuyakukkala mu Moabu kali muzwakule. Kubweza ntaamu eeyi kwakali kusunka lusyomo lwaumwi aumwi wabanamukwasyi ooyu, mbwaanga bana Israyeli bakeelede kukomba ciindi coonse mubusena busalala mbwaakasalide Jehova. (Dt. 16:16, 17) Naomi wakazumanana kuba alusyomo. Nokuba boobo, wakali mubuumba ciindi balumi bakwe nobakafwa.—Rut. 1:2, 3.

6, 7. (a) Nkaambo nzi keelede kuti nkakakapa Naomi kulibilika ciindi bana bakwe nobakakwata bamakaintu bana Moabu? (b) Nkaambo nzi ncotumulumbaizya Naomi notubona mbwaakali kubalanganya bamuka bana bakwe?

⁶ Alimwi kweelede kuti Naomi wakapenga ciindi bana bakwe nobakakwata bamakaintu bana Moabu. (Rut. 1:4) Wakalizyi kuti Abrahamu, kwalo ikwakazwa musyobo wakwe, wakabikkila maano kubona kuti wajanina mwanaakwe Izaka mukaintu kuzwa akati kabantu bakwe, bantu ibakali kukomba Jehova. (Matl. 24:3, 4) Nokwakainda ciindi, Mulawo wa Musa wakacenjezya bana Israyeli kuti tabeelede kulekela bana babo basankwa abasimbi kukwatana abamuzwakule, akaambo kakuti bantu ba Leza inga batalika kukomba mituni.—Dt. 7:3, 4.

⁷ Nokuba boobo, Maloni a Kilioni bakakwata bamakaintu bana Moabu. Ikuti naa Naomi wakali kubikkila maano, kweelede kuti wakali kusoleka kubatondezya luzyalo lwini-lwini aluyando bamuka bana bakwe, Rute a Olipa. Andiza wakajisi bulangizi bwakuti bumwi buzuba abalo bayakutalika kukomba Jehova mbubwenya mbwaakali kucita walo. Cakutadooneka, Rute a Olipa bakali kumuyanda Naomi. Cilongwe cibotu ncobakajisi cakabagwasya ciindi nobakasikilwa penzi. Bamakaintu aaba bobilo kabatanazyala bana, bakafwidwa bamaalumi.—Rut. 1:5.

8. Ncinzi ceelede kuti ncecakapa Rute kuswena kuli Jehova?

⁸ Sena bukombi mbwaakali kukomba kaindi Rute mbobwakamugwasya ciindi camapenzi? Kweelede kuti peepe. Bana Moabu bakali kukomba baleza banji, mupati akati kabaleza aaba wakali Kemosi. (My. 21:29) Kulibonya kuti abwalo bukombi bwabana Moabu bwakalijatikizyidwe azilengwa zyalunya izyakadumide kuciindi eeco, kubikkilizya acilengwa cakutuula bana. Kufwumbwa Rute nzyaakaiya kuzwa kuli Maloni naa Naomi kujatikizya Leza siluyando alimwi siluse wabana Israyeli, Jehova, kunyina naakazyiluba pe. Jehova wakali kweendelezya caluyando, kutali kwiinda mukupenzya pe! (Amubale Deuteronomo 6:5.) Ciindi naakali kulila kusweekelwa ooku kupati, kweelede kuti Rute wakayumya cilongwe cakwe a Naomi alimwi akuswiililisya kapati ciindi mukaintu ooyu uucembeede naakali kumwaambila kujatikizya Leza  singuzuzyoonse, Jehova, kumwaambila milimo yakwe, luyando aluse ndwaakatondezya naakali kweendelezya bantu bakwe.

9-11. (a) Nkusala kuli buti nkobakacita ba Naomi, Rute a Olipa? (b) Ncinzi ncotukonzya kwiiya kuzwa kumapenzi aakasikila ba Naomi, Rute a Olipa?

⁹ Cakutadooneka, kweelede kuti Naomi wakali kuyandisisya kumvwa makani aazwa kucisi nkwaakazyila. Bumwi buzuba, andiza wakamvwa kuti nzala yakalimanide mu Israyeli kuzwa kuli simakwebo umwi. Jehova lino wakali kubabikkila maano bantu bakwe. Betelehemu, ibbala lipandulula kuti “Ŋanda Yazyakulya,” bwakaba busena bujisi zyakulya ncobeni alimwi. Naomi wakasala kupiluka kucisi cokwabo.—Rut. 1:6.

¹⁰ Ino Rute a Olipa bakali kuyakucita nzi? (Rut. 1:7) Akaambo kalufwu lwabamaalumi babo, bakayumya cilongwe a Naomi. Kwaambisya Rute, kulibonya kuti wakali kumuyanda Naomi akaambo kaluzyalo lwakwe alimwi akaambo kalusyomo luyumu muli Jehova. Bamukabafwu aaba botatwe bakanyamuka lweendo lwakuya kucisi ca Juda antoomwe.

¹¹ Cibalo icaamba zya Rute cituyeezya kuti mapenzi alasikila bantu babotu ababi. (Muk. 9:2, 11) Cibalo eeci alimwi citutondezya kuti muziindi zyamapenzi, ncibotu kujana luumbulizyo kuli bamwi—kwaambisya kuzwa kuli baabo ibayandaula mayubilo muli Jehova, Leza ngwaakali kukomba Naomi.—Tus. 17:17.

12, 13. Nkaambo nzi Naomi ncaakali kuyanda kuti Rute a Olipa bapiluke kuminzi yabo muciindi cakuunka anguwe, alimwi ncinzi bamakaintu aabo bobilo ncobakacita nobakaamvwa makani aaya?

¹² Bamukabafu aabo botatwe nobakeenda musinzo mulamfwu kuzwa ku Moabu, Naomi wakatalika kulibilika. Wakatalika kuyeeya kujatikizya bamakaintu aaba bana-bana bobilo mbaakali limwi, mbobakali kumuyanda ambobakali kubayanda bamaalumi babo. Wakanyonganizyigwa mumizeezo akubona mbuli kuti watalika kubayungizyila mapenzi. Wakatalika kuyeeya kuti, ikuti basiya munzi wabo akuunka anguwe, ino wakali kuyakubacitila nzi ku Betelehemu?

¹³ Kumane, Naomi wakabaambila kuti: “Kamuya, mukapiluke umwi aumwi kuŋanda yabanyina. Jehova amufwide luzyalo, mbubonya mbumwakacitila bafwide ambumwandicitila ambebo.” Mumajwi aakwe alimwi wakatondezya kuti wakajisi bulangizi bwakuti Jehova wakali kuyakubalongezya  akujana bamaalumi bambi akucinca buumi bwabo. Cibalo caamba kuti: “Mpawo wakabamyonta, nkabela bakatalika kulila.” Kwiinda mukulanga cibalo eeci tacikatazyi kubona kaambo Rute a Olipa ncobakali kumuyanda mukaintu ooyu mubotu moyo iwatakali kuliyanda. Boonse bobilo bakazumanana kumwaambila kuti: “Nee! Katuya toonse kubantu bako.”—Rut. 1:8-10.

14, 15. (a) Ino Olipa wakapiluka kunzi? (b) Mbuti Naomi mbwaakasola kumukombelezya Rute kuti apiluke?

¹⁴ Naomi tanaakafwambaana kuzumina kuti baunke antoomwe. Wakabapandulwida kabotu-kabotu kuti kwakanyina nzyaakali kunga wabacitila mu Israyeli, mwaalumi wakwe wakalifwide kale, wakanyina bana bakonzya kubakwata alimwi wakanyina bulangizi buli boonse. Wakabayubunwida kuti, akaambo kakuti takonzyi kubalanganya, cakali kumupenzya kapati. Olipa wakacimvwa ncaakaamba Naomi. Wakalijisi banamukwasyi mu Moabu, banyina, alimwi aŋanda. Wakacibona kuti cakali camaano kuti acaale buyo mu Moabu. Aboobo, kumwi kauside kapati, Olipa wakamumyonta Naomi akumulaya mpoonya wakapiluka.—Rut. 1:11-14.

¹⁵ Ino Rute wakacita nzi? Nzyaakaamba Naomi zyakali kumujatikizya awalo. Nokuba boobo, tubala kuti: ‘Pele Rute wakakakatila kulinguwe.’ Kweelede kuti Naomi wakalitalikide kale kweenda mpoonya naakalanga musyule wakabona Rute kamuccilila. Wakamunyemena akumwaambila kuti: “Bona! Mukwatwanyoko wapiluka kulibanyina akumizimu yakwe. Piluka ayebo mbuli mukwatwanyoko.” (Rut. 1:15) Majwi aa Naomi atugwasya kubona tumwi twaambo. Olipa naakapiluka tanaakapiluka buyo kubantu bakwe pe, pele “akumizimu yakwe” naa baleza bakwe. Wakali kumvwa kabotu kuba mukombi wa Kemosi alimwi awabaleza bambi bakubeja. Sena oobu mbombubo mbwaakali kulimvwa Rute?

16-18. (a) Mbuti Rute mbwaakatondezya luyando lwini-lwini? (b) Ncinzi ncotukonzya kwiiya kuzwa kuli Rute kujatikizya luyando lwini-lwini? (Amubone alimwi azifwanikiso zyabamakaintu bobilo aaba.)

 ¹⁶ Rute wakalicizyi kabotu-kabotu mumoyo wakwe ncaakasalide. Mumoyo wakwe, Rute wakali kumuyanda kapati Naomi—alimwi a Leza Naomi ngwaakali kukomba. Aboobo, Rute wakaamba kuti: “Utandisungilizyi kukusia nanka kuleka kukutobela, nkaambo kufumbwa nkoya yebo ndaya ambebo, nkoyookala yebo njookala ambebo. Bantu bako bayooba bantu bangu, a-Leza wako uyooba Leza wangu. Kufumbwa nkoyoofwida njoofwida ambebo nkuko akuzikwa nkukonya. Leza andicitile mbubonya akwiinda na ndazumizya cintu neciba cimwi cita lufu luzutu kundaanzanya ayebo.”—Rut. 1:16, 17.

¹⁷ Majwi aa Rute mabotu kapati—cakunga myaka 3,000 yainda kuzwa naakafwa kuzikusika sunu, bantu bacaayeeya majwi ngaakaamba. Atutondezya bube bubotu kapati, luyando lwini-lwini. Luyando ndwaakajisi Rute lwakali luyumu ncobeni alimwi lwini-lwini cakuti wakacikonzya kukkala a Naomi kufwumbwa nkwaakaunka. Lufwu lulikke ndolwakali kukonzya kubaandaanya. Bantu ba Naomi bakali kuyakuba bantu bakwe, nkaambo Rute wakalilibambilide kusiya zyintu zyoonse zyamu Moabu—kubikkilizya abaleza babana Moabu. Mukwiimpana a Olipa, Rute wakali kukonzya kwaamba camoyo woonse kuti wakali kuyanda Leza wa Naomi, Jehova, kuba Leza wakwe.

¹⁸ Aboobo, bakazumanana alweendo lwabo kabali buyo bobilo, musinzo mulamfwu kuya ku Betelehemu. Kweelana abbuku limwi, musinzo ooyu weelede kuti wakabatolela nsondo kutegwa basike. Cakutadooneka, umwi aumwi wabo wakaumbulizyigwa amweenzinyina ciindi nobakali mubuumba.

19. Mbuti mbotukonzya kwiiya luyando lwini-lwini lwa Rute mumikwasyi yesu, akati kabalongwe besu, alimwi amumbungano?

¹⁹ Bantu banji bali mubuumba mazuba aano. Mumazuba aano aambwa mu Bbaibbele kuti ‘mazuba aakatazya ncobeni,’ tulasikilwa mapenzi aaindene-indene alimwi abuumba. (2 Ti. 3:1) Aboobo, bube mbwaakajisi Rute bulayandika kapati mazuba aano kwiinda lyoonse. Luyando lwini-lwini—iluyando ilujatilila ilutakonzyi kulekezya cintu pe—mbobube ibuyandika kapati kutegwa tucite zibotu munyika iino iili mumudima. Iluyando luli boobu lulayandika kapati mucikwati, mumukwasyi, mucilongwe, amumbungano ya Bunakristo. (Amubale 1 Johane 4:7, 8, 20.) Mbotuyaabwiiya kuba aluyando luli boobu, twiiya cikozyanyo cibotu kapati ca Rute.

20-22. (a) Ino Naomi wakajatikizyigwa buti abuumi mbwaakali kupona mucisi ca Moabu? (b) Ino nkuyeeya kuli buti ikwatakali kabotu Naomi nkwaakajisi ikujatikizya mapenzi aakwe? (Amubone alimwi Jakobo 1:13.)

²⁰ Cakutadooneka, kwaamba kuti mulijisi luyando lwini-lwini kuliindene kapati akulutondezya mumicito. Rute lino wakajisi coolwe cakutondezya  luyando lwakwe lwini-lwini kutali buyo kuli Naomi, pele akuli yooyo ngwaakasala kuba Leza wakwe, Jehova.

²¹ Bamakaintu aaba bobilo mane bakasika ku Betelehemu, munzi iwakali kumusanza kwa Jerusalemu, musinzo uulampa makilomita aali 10. Kulibonya kuti, aciindi cimwi Naomi amukwasyi wakwe bakali bantu bazyibidwe kapati mumunzi ooyu musyoonto, akaambo kakuti muciindi buyo cisyoonto bantu boonse bakali kwaamba makani aakupiluka kwa Naomi. Kweelede kuti bamakaintu okuya bakali kumuswaya akubuzya kuti “Ndonduwe Naomi?” Cakutadooneka, kweelede kuti wakacinca muciindi ncaakakkala mu Moabu; mbwaakali kulibonya ambwaakali kweenda kwakali kutondezya mbwaakali kupenga abuumba mbwaakajisi.—Rut. 1:19.

²² Naomi wakabaambila banamukwasyi abasimukobonyina bakaindi buumi bwakwe mbobwakabijide. Akaambo kaceeco wakasala akucinca zyina lyakwe lyakuti Naomi ilyaamba kuti “Obubotu Bwangu,” akulipa zyina lyakuti Mara, ilyaamba kuti “Kulula.” Mukubula luzyibo Naomi mbubwenya mbuli Jobu iwakaponede kaindi, awalo wakasyoma kuti Jehova Leza nguwakapa kuti apenge.—Rut. 1:20, 21; Job. 2:10; 13:24-26.

23. Ncinzi Rute ncaakatalikide kuyeeya, alimwi mbubambe nzi bwakugwasya bapengede ibwakali mu Mulawo wa Musa? (Amubone amajwi aamunsi.)

²³ Bamakaintu aaba bobilo nobakakkalikana mu Betelehemu, Rute wakatalika kuyeeya mbwaakali kunga wajana cakulya cakwe aca Naomi. Wakazikuzyiba kuti Mulawo Jehova ngwaakapede bantu bakwe mu Israyeli wakali kubikkilizya abubambe bubotu bwakugwasya bapengede. Bapengede bakali kuzumizyigwa kuunka mumyuunda ciindi cakutebula akutobela basikutebula, kutegwa bavwulule izyakaceede akubwezelela izyakali mumbali aamyuunda. *—Lev. 19:9, 10; Dt. 24:19-21.

24, 25. Ncinzi Rute ncaakacita naakazumizyigwa kuvwulula mumyuunda ya Boazi, alimwi ino mulimo wakuvwulula wakali buti?

²⁴ Cakali ciindi cakutebula bbaale, kweelana akkalenda yamazuba aano, andiza mwakali mumwezi wa April, Rute wakaunka kumyuunda kutegwa abone naa nguni uukonzya kumuzumizya kuti avwulule. Wakaba acoolwe, wakanjila  mumyuunda ya Boazi, mwaalumi iwakavwubide iwakajisi busena bupati iwamukwasyi wa Elimeleki mulumi wa Naomi iwakafwide. Nokuba kuti Mulawo wakali kumuzumizya kuti avwulule, wakasaanguna kulomba kuzwa kumwaalumi iwakali kulanganya basikutebula kutegwa anjile mumuunda akuvwulula. Mwaalumi ooyu wakamuzumizya, mpoonya kakunyina akusowa ciindi Rute wakatalika kubeleka.—Rut. 1:22–2:3, 7.

²⁵ Amuyeeye Rute mbwaakali kuyaabutobela basikutebula. Nobakali kutebula bbaale amasikela aabo aatabosyi, wakeenda kutegwa abwezelele izyakali kucaala musyule, wazibunganya, akuzitola kubusena nkwaakali kunga wazibikka kutegwa azyuume. Mulimo ooyu wakali muyumu, tiiwakali kweenda, wakali kulemya kwaambisya ikuti izuba lyatanta. Nokuba boobo, Rute wakazumanana kubeleka, wakali kwiima buyo ciindi naakali kuyanda kupukuta nkasaalo akulya cakulya camasikati cisyoonto ‘mukatungu’—kweelede kuti aaka kakali katungu ikakayakilwa babelesi.

26, 27. Ino Boazi wakali muntu uuli buti, alimwi mbuti mbwaakali kumulanganya Rute?

²⁶ Kulibonya kuti Rute kunyina naakali kulangila kuzyibwa, pele nokuba boobo wakazyibwa. Boazi naakamubona Rute wakabuzya mulombwana wakali kulanganya basikutebula kutegwa amwaambile naa wakali ni. Boazi muntu mubotu iwakajisi lusyomo, wakali kubaanzya babelesi bakwe—bamwi akati kabo beelede kuti bakali babelesi babeleka buyo buzuba bomwe naa bamuzwakule, wakali kubaanzya kuti: “Jehova abe anywe.” Abalo bakali kumwaanzya amajwi ngaonya aayo. Muntu ooyu iwakali kumuyanda Jehova, wakamubikkila maano Rute mbuli kuti wakali usyi.—Rut. 2:4-7.

²⁷ Kwiinda mukumwiita kuti: “Mwanaangu,” Boazi wakakulwaizya Rute kuti azumanane kuboola akuvwulula mumyuunda yakwe alimwi wakamwaambila kuti weelede kukkala antoomwe abasimbi bamuŋanda  yakwe kutegwa batamunyonganyi babelesi bakwe basankwa. Boazi wakali kubikkila maano kubona kuti Rute lyoonse wakajisi cakulya camasyikati. (Amubale Rute 2:8, 9, 14.) Kwiinda waawo, wakali kumulumbaizya akumukulwaizya. Ino wakali kucita buti oobo?

28, 29. (a) Ino Rute wakajisi mpuwo iili buti? (b) Mbubwenya mbuli Rute, mbuti mbomukonzya kuyubila muli Jehova?

²⁸ Ciindi Rute muzwakule naakamubuzya Boazi kutegwa azyibe kaambo ncaakali kumulanganya boobu munzila yaluyando, Boazi wakamwaambila kuti wakalimvwide makani aakali kwaambwa kujatikizya mbwaakali kubalanganya banyinazyala, ba Naomi. Kweelede kuti Naomi wakali kumutembaula muyandwa wakwe Rute kubamakaintu bamwi bamu Betelehemu, alimwi Boazi wakaamvwa makani aayo. Boazi alimwi wakalizyi kuti Rute wakalitalikide kukomba Jehova, wakaamba kuti: “Jehova akupe coolwe nkaambo kamilimo yako, ukatambule bulumbu buzulide kuzwa kumaanza aa-Jehova Leza wa-Israyeli, ngonguwe ngowajana mayubilo kunsi amababa aakwe.”—Rut. 2:12.

²⁹ Eelo kaka majwi aaya akamukulwaizya Rute! Wakasalide ncobeni kujana mayubilo mumababa aa Jehova Leza, wakali mbuli kayuni ikali mumababa aabanyina. Wakamulumba Boazi akaambo kamajwi aakulwaizya aali boobu. Alimwi wakazumanana kubeleka kusikila kumazuba.—Rut. 2:13, 17.

30, 31. Ncinzi ncotukonzya kwiiya kuzwa kuli Rute caboola kumakani aamulimo, kulumba, alimwi aluyando lwini-lwini?

³⁰ Lusyomo lwa Rute ncikozyanyo cibotu kapati kulindiswe toonse mazuba aano mbwaanga tupona muziindi bukkale mobukatazya kapati. Kunyina naakali kulangila kuti bantu bamwi kabamucitila zyintu zimwi akaambo kakuti wakali mukamufwu, wakali kulumba kuzyintu zyoonse nzyobakali kumucitila. Nokuba kuti wakali mulimo waansi, kunyina naakali kulisenda kubeleka kwaciindi cilamfwu, kubeleka mulimo uuminya kutegwa alanganye muntu ngwaakali kuyanda. Wakalumba alimwi wakalutobela lulayo lwabusongo ndwaakapegwa ilwakali kwaamba mbwakeelede kubeleka alimwi abantu mbakeelede kuyanzana limwi. Icikkomanisya kapati ncakuti, kunyina naakacileka kubikkila maano ikwakali mayubilo aakwe—Usyi uukwabilila, Jehova Leza.

³¹ Ikuti twatondezya luyando lwini-lwini mbuli Rute mbwaakacita akutobela cikozyanyo cakwe cakulicesya, cakusungwaala mumulimo, acakutondezya kulumba, tuyakubakulwaizya bambi akaambo kacikozyanyo cesu cibotu calusyomo. Mbuti Jehova mbwaakamulanganya Rute a Naomi? Makani aaya tuyakwaabandika mucibalo citobela.