1-3. (a) Ino bantu banji balimvwa buti kujatikizya milimo yabo? (b) Ino Bbaibbele litukulwaizya kuti katuubona buti mulimo, alimwi ino mibuzyo nzi njotulaalange-lange mucibalo eeci?

MAZUBA aano bantu banji munyika tabaikkomanini milimo njobabeleka. Akaambo kakubeleka mawoola manji kumulimo ngobatakkomanini, balaakufwa butolo kuunka kumilimo buzuba abuzuba. Ino bantu aabo balimvwa boobo inga bakulwaizyigwa buti kutegwa kabauyanda akuukkomanina mulimo ngobacita?

² Bbaibbele litukulwaizya kuti katuukkomanina mulimo ngotubeleka canguzu. Lyaamba kuti mulimo azintu nzyotujana notubeleka, nzipego. Solomoni wakalemba kuti: “Muntu woonse kalya, kanywa alimwi akukkomana akaambo kamilimo yakwe yoonse njabeleka canguzu. Eeci ncipego ca Leza.” (Mukambausi 3:13) Mbwaanga Jehova ulatuyanda alimwi ulatubikkila maano lyoonse, uyanda kuti katukkomana mumilimo yesu akukkutila azintu nzyotujana notubeleka. Kutegwa tuzumanane kuba muluyando lwakwe, tweelede kupona kweelana anjiisyo zyakwe alimwi ambwaubona mulimo.—Amubale Mukambausi 2:24; 5:18.

³ Mucibalo eeci, tulalanga-langa mibuzyo eeyi yone: Ncinzi cikonzya kutupa kuti katuukkomanina mulimo wesu ngotubeleka canguzu? Ino milimo nzi njobateelede kubeleka Banakristo bakasimpe? Mbuti mbotukonzya kutawida kubbazu lyomwe notubeleka milimo yakumubili ayakumuuya? Alimwi ino mulimo nzi uuyandika kapati ngotweelede kucita? Pele cakusaanguna, atulange-lange cikozyanyo cabasimilimo  bapati mububumbo boonse, nkokuti Jehova Leza a Jesu Kristo.

4, 5. Ino mbuti Bbaibbele mbolitondezya kuti Jehova ngusimilimo uuzwidilila mumilimo njacita?

⁴ Jehova ngo Similimo Mupati Kwiinda. Bbuku lya Matalikilo 1:1 lyaamba kuti: “Kumatalikilo, Leza wakalenga julu anyika.” Leza naakamanizya kulenga nyika azintu zyoonse zili mumo, wakaamba kuti “nzibotu kapati.” (Matalikilo 1:31) Munzila imwi, wakaikkomanina kapati milimo yoonse njaakacita anyika. Cakutadooneka, Jehova, “Leza uukkomene,” wakakondwa kapati naakabona mulimo ngwaakacita.—1 Timoteyo 1:11.

⁵ Leza wesu imunkutwe taleki kubeleka. Kakwiindide ciindi cilamfwu kuzwa leelyo nyika azintu zyoonse zili mumo nozyakamana kulengwa, Jesu wakaamba kuti: “Taata ulabeleka ambuli sunu.” (Johane 5:17) Ino mulimo nzi ngwaali kubeleka kuzwa kaindi Taateesu wakujulu? Cakutadooneka, kuzwa kujulu wali kubalanganya akubasololela bantu anyika. Wapa kuti kube “cilenge cipya,” nkokuti Banakristo bakananikwa amuuya ibayakulela a Jesu kujulu. (2 Bakorinto 5:17) Uluujisi kubeleka canguzu kutegwa azuzikizye makanze ngajisi kujatikizya bantu—aakuti bantu bamuyanda bakabe abuumi butamani munyika mpya. (Baroma 6:23) Masimpe, Jehova ulakkomana kapati nabona mulimo ooyu mbouzwidilila. Bantu banji bautambula mulumbe wa Bwami, bakwelwa a Leza alimwi bacinca bukkale bwabo kutegwa bazumanane kuba muluyando lwakwe.—Johane 6:44.

6, 7. Ino mbuti Jesu mbwaatondezya kuti wali kubeleka canguzu kwaciindi cilamfwu?

⁶ Jesu ulaampuwo mbotu yakuti mubelesi iwali kubeleka canguzu kwaciindi cilamfwu. Katanaboola anyika, wakali “mubelesi uucibwene” wa Leza mukulenga zintu zyoonse “kujulu alimwi aanyika.” (Tusimpi 8:22-31; Bakolose 1:15-17) Naakali anyika, Jesu wakazumanana kubeleka canguzu. Kacili mwana wakaiya mulimo wakuyaka akubeza, nkakaambo  kaako wakali kwaambwa kuti “sikubeza mapulanga.” * (Marko 6:3) Mulimo ooyu wakali muyumu alimwi wakali kuyandika kuti muntu kajisi luzyibo mumbazu zinji, ikwaambisya ciindi Jesu naakali anyika mbwaanga kwakanyina mafakitali mobafwala mapulanga, zintoolo musambalwa mapulanga alimwi azibelesyo zibelesya magesi. Amweezyeezye buyo kuti mulimubwene Jesu kaunka musyokwe kuyakugonka akususa zisamu kutegwa afwale mapulanga. Alimwi amweezyeezye kuti mulimubwene kayaka ŋanda—wapanga makkapulosi akwiivwumba, wabikka zijazyo kumane wapanga zyuuno amatebulu. Cakutadooneka, Jesu wakali kukkomana naakali kubona mulimo ngwaakali kubeleka canguzu alimwi caluzyibo.

⁷ Jesu wakali munkutwe mumulimo wakwe wabukambausi. Kwamyaka yotatwe acisela, wakali kubeleka canguzu mumulimo ooyu uuyandika kapati. Akaambo kakuti wakali kuyanda kukambaukila bantu banji, wakaabelesya kabotu mazuba aakwe, wakali kufwuma kubuka akubeleka kuzwa cifwumofwumo mane kusikila masiku. (Luka 21:37, 38; Johane 3:2) Jesu “wakeenda muminzi mipati amisyoonto kayaabukambauka akwaambilizya makani mabotu aa Bwami bwa Leza.” (Luka 8:1) Jesu wakeenda amaulu misinzo milamfwu mulusuko kayaabukambaukila bantu makani mabotu.

8, 9. Ino mbuti Jesu mbwaakaukkomanina mulimo ngwaakali kubeleka canguzu?

⁸ Sena Jesu wakali kuukkomanina mulimo wakukambauka ngwaakabeleka canguzu? Inzya! Wakasyanga mbuto zyakasimpe ka Bwami alimwi wakasiya myuunda kaili afwaafwi kutebulwa. Ikubeleka mulimo wa Leza kwakali kumupa nguzu akukkutila Jesu cakuti wakalilisungwide kukkala anzala kutegwa aumanizye. (Johane 4:31-38) Amuyeeye buyo mbwaakakkomana kumamanino aamulimo wakwe waanyika naakaambila Bausyi camasimpe kuti: “Ndakulemeka anyika, kwiinda  mukumanizya mulimo ngookandipa kuti ndicite.”—Johane 17:4.

⁹ Masimpe, Jehova a Jesu nzikozyanyo zibotu kapati zitondezya kuti balaukkomanina mulimo ngobabeleka canguzu. Ikuyanda Jehova kutukulwaizya ‘kwiiya Leza.’ (Baefeso 5:1) Ikuyanda Jesu kutukulwaizya ‘kwiitobelesya mikondo yakwe.’ (1 Petro 2:21) Aboobo, lino atulange-lange cikonzya kutupa kuti katuukkomanina mulimo wesu ngotubeleka canguzu.

10, 11. Ino ncinzi cikonzya kutugwasya kuti katuukkomanina mulimo ngotucita?

¹⁰ Mulimo wakumubili ulaabusena mubuumi bwa Banakristo bakasimpe. Tuyanda kukkomana akukkutila amulimo ngotucita, pele zimwi ziindi eeci cilakonzya kutukatazya kapati kwaambisya ikuti naa katubeleka mulimo uutazyi kumoyo. Aboobo, ino ncinzi cikonzya kutupa kuti katuukkomanina mulimo wesu mubukkale buli boobu?

¹¹ Kwiinda mukuzibona kabotu zintu. Talili lyoonse notukonzya kubucinca bukkale bwesu, pele tulakonzya kucinca mbotuzibona zintu. Ikukkala ansi kuyeeya mbwazilanga zintu Leza kulakonzya kupa kuti katuukkomanina mulimo ngotucita. Mucikozyanyo, ikuti naa ndinywe mutwe wamukwasyi, amuyeeye kuti mulimo ngomubeleka, nokuba kuti uboneka kuti ngwaansi kapati, umupa kujanina banamukwasyi zintu ziyandika zyakumubili. Aboobo, ikulanganya bayandwa banu taali makani masyoonto mumeso aa Leza. Jwi lyakwe lyaamba kuti ooyo uutayandi kubamba mukwasyi wakwe “mubi kapati kwiinda muntu uunyina lusyomo.” (1 Timoteyo 5:8) Ikuzyiba kuti mulimo ngomubeleka umugwasya kuzuzikizya mukuli ngwaakamupa Leza, kulakonzya kumugwasya kuti muukkomanine akuubona kuti ulaampindu eeyo njobataboni aabo mbomubeleka limwi.

12. Ino kubeleka canguzu akusyomeka mumulimo wesu kugwasya buti?

¹² Kwiinda mukuba bankutwe akusyomeka. Ikubeleka canguzu  akwiiya mbotukonzya kuubeleka kabotu mulimo wesu kulakonzya kupa kuti tulongezyegwe. Bunji bwaziindi, ibanjizya milimo bayanda bantu bankutwe alimwi bacibwene kubeleka. (Tusimpi 12:24; 22:29) Mbokunga tuli Banakristo bakasimpe, tweelede kusyomeka amulimo—tatweelede kubabbida mali, zintu aabo bakatunjizya mulimo naa kusowa ciindi notubeleka. (Baefeso 4:28) Mbuli mbotwabona mucibalo cainda, kusyomeka kuletela mpindu. Imubelesi uulaampuwo yakuti ulasyomeka ulalangilwa kusyomwa. Alimwi nokuba kuti zimwi ziindi bakatunjizya mulimo tabakonzyi kubona kuti tubeleka canguzu, tulakonzya kukkomana akaambo kakuti tulijisi “manjezyeezya aasalala” alimwi tulizyi kuti  tukkomanisya Leza ngotuyanda.—Bahebrayo 13:18; Bakolose 3:22-24.

13. Ncinzi cikonzya kucitika ikuti katupa cikozyanyo cibotu kuncito?

¹³ Kwiinda mukuzyiba kuti mbotulilemeka kumilimo kulakonzya kupa kuti Leza alemekwe. Ikuti katulilemeka kabotu kumulimo mbubonya mbobeelede kulilemeka Banakristo, ibamwi balakonzya kubona. Aboobo ncinzi cikonzya kucitika akaambo kaceeci? Tulakonzya kupa kuti bamwi ‘batembaule kuyiisya kwa Mufwutuli wesu, Leza.’ (Tito 2:9, 10) Masimpe, kwiinda mukulilemeka kabotu ibamwi balakonzya kubona kuti bukombi bwesu mbubotu kapati alimwi balakonzya kukwelelezyegwa kulimbubo. Amuyeeye buyo mbomukonzya kulimvwa ikuti ngomubeleka limwi watalika kwiiya kasimpe akaambo kakuti mupa cikozyanyo cibotu kuncito! Ikwiinda zyoonse eezyi, amuyeeye kaambo aaka: Sena kuli cintu ciinda kubota kunze lyakuzyiba kuti ikulilemeka kwanu kupa kuti Jehova alemekwe alimwi kukkomanisya moyo wakwe?—Amubale Tusimpi 27:11; 1 Petro 2:12.

14-16. Notusala mulimo ngotuyanda kunjila, mibuzyo nzi iiyandika kapati njotweelede kulanga-langa?

¹⁴ Caboola kumulimo wakumubili, Bbaibbele kunyina nolipa malailile oonse aajatikizya mulimo uuzumizyidwe autazumizyidwe. Pele eeci tacaambi kuti tulakonzya kuzumina kunjila mulimo uuli woonse kunyina makani azintu zijatikizyidwe mumulimo ooyo. Magwalo alakonzya kutugwasya kusala mulimo mubotu alimwi uusalala uukonzya kumukkomanisya Leza akukaka yooyo uutamukkomanisyi. (Tusimpi 2:6) Notusala mulimo ngotuyanda kunjila, kuli mibuzyo yobilo iiyandika kapati njotweelede kulanga-langa.

¹⁵ Sena ikubeleka mulimo ooyu kulakonzya kundipa kucita cintu cikasyigwa mu Bbaibbele? Jwi lya Leza lilakasya kubba, kubeja akupanga mituni. (Kulonga 20:4; Milimo 15:29; Baefeso 4:28; Ciyubunuzyo 21:8) Tatukonzyi kunjila mulimo uujatikizya kucita zintu zili boobu. Akaambo kakuti tulamuyanda Jehova, tatukonzyi kuzumina kunjila mulimo uuli woonse  uujatikizya micito iiteendelani amilawo ya Leza.—Amubale 1 Johane 5:3.

¹⁶ Sena ikubeleka mulimo ooyu kulakonzya kupa kuti nditalike kugwasyilizya naa kusumpula micito mibi? Atupe cikozyanyo. Ikubeleka mulimo wakutambula beenzu kuli buyo kabotu. Pele, ino mbuti kuti Munakristo wapegwa mulimo ooyu kucibbadela nkobagusya mada? Masimpe, imulimo wakwe inga kautajatikizyi kugusya mada kwini. Nokuba boobo, sena mulimo ngwabeleka kucibbadela eeci tuusumpuli mulimo  uucitwa ancico wakugusya mada, icintu citeendelani a Jwi lya Leza? (Kulonga 21:22-24) Mbokunga tulamuyanda Jehova, tatuyandi kucita zintu zili zyoonse zitazumizyidwe mu Magwalo.

17. (a) Ntwaambo nzi ntotukonzya kulanga-langa notusala mulimo ngotuyanda kunjila? (Amubone kabbokesi kakuti “ Sena Inga Ndanjila Mulimo Ooyu?”) (b) Ino mbuti manjezyeezya eesu mbwaakonzya kutugwasya kusala zintu zimukkomanisya Leza?

¹⁷ Mibuzyo minji iijatikizya kunjila mulimo ilakonzya kwiingulwa kwiinda mukubulanga-langa cakulomya bwiinguzi bwamibuzyo yobilo iiyandika kapati iili mumincali 15 a 16. Kuyungizya waawo, kuli twaambo atumbi ntotweelede kubikkila maano notusala mulimo ngotuyanda kunjila. * Muzike  uusyomeka alimwi uucenjede takonzyi kutubikkila milawo njotweelede kutobela mubukkale boonse. Akaambo kaboobo, tweelede kubelesya maano. Mbuli mbotwakaiya mu Cibalo 2, tweelede kuyiisya manjezyeezya eesu kwiinda mukwiiya mbotukonzya kutobela Jwi lya Leza mubuumi bwesu buzuba abuzuba. Ikuti ‘twayiisya maano eesu’ “kwiinda mukwaabelesya,” manjezyeezya eesu alakonzya kutugwasya kusala zintu zimukkomanisya Leza akupa kuti tuzumanane kuba muluyando lwakwe.—Bahebrayo 5:14.

18. Nkaambo nzi ncocikatazya kuzumanana kuzibikkila maano zintu zyakumuuya?

¹⁸ ‘Imazuba aano aakumamanino aakatazya,’ tacili cuuba-uba kuzumanana kuzibikkila maano zintu zyakumuuya. (2 Timoteyo 3:1) Cilakatazya kujana ncito akuzumanana kubeleka. Mbokunga tuli Banakristo bakasimpe, tulizyi mbociyandika kubeleka canguzu kuti tusanine mikwasyi yesu. Pele, ikuti naa tiitwacenjela, ikujata maankamaanka kumulimo naa imuuya wanyika wakuyandisya zintu zinji zyakumubili kulakonzya kupa kuti tuleke kuzibikkila maano zintu zyakumuuya. (1 Timoteyo 6:9, 10) Aboobo, atulange-lange mbotukonzya kucita kutegwa tutawidi kubbazu lyomwe, kuti ‘tusinizye zintu ziyandika kapati.’—Bafilipi 1:10.

19. Ino nkaambo nzi ncotweelede kumusyoma cakumaninina Jehova, alimwi ino eeci inga catugwasya buti?

¹⁹ Amumusyome Jehova cakumaninina. (Amubale Tusimpi 3:5, 6.) Masimpe, oobo mbotweelede kumusyoma Jehova nkaambo ulatubikkila maano. (1 Petro 5:7) Ulizyizyi zintu nzyotuyandika alimwi janza lyakwe talili lifwaafwi pe. (Intembauzyo 37:25) Aboobo, tweelede kuswiilila akutobela ncolyaamba Jwi lyakwe kuti: “Ibukkale bwanu butabi bwakuyandisya mali pe, pele amukkutile azintu nzyomujisi lino. Nkaambo [Leza] wakaamba kuti: ‘Ziyume zitete, tandikakusiyi pe alimwi tandikakulekelezyi pe.’” (Bahebrayo 13:5) Babelesi banji ibali mumulimo waciindi coonse balakonzya  kupa bumboni bwakuti Leza wali kubapa zintu zyakuligwasya ziyandika. Ikuti katusyoma cakumaninina kuti Jehova unakutulanganya, kunyina notuyakulibilika kapati akaambo kakuyeeya nkotulaajane ziyandika mumukwasyi. (Matayo 6:25-32) Tatukalekeli mulimo wakumubili kutulesya kubikkila maano kuzintu zyakumuuya, mbuli kukambauka makani mabotu alimwi akujanika kumiswaangano.—Matayo 24:14; Bahebrayo 10:24, 25.

20. Ino kuba aliso lilangide buyo acintu comwe caamba nzi, alimwi ino mbuti mbomukonzya kuzumanana kuba aliso lili boobo?

 ²⁰ Amube aliso lilangide buyo acintu comwe. (Amubale Matayo 6:22, 23.) Ikuba aliso lilangide buyo acintu comwe caamba kuliimya akutayanda zintu zinji. Liso lya Munakristo lilangide buyo acintu comwe, nkokuti aakucita kuyanda kwa Leza. Ikuti liso lyesu kalilangide buyo acintu comwe, tatukamanini ciindi cesu kukuyandaula milimo iivwolwa mali manji alimwi akuyandisya kuba azintu zinji. Alimwi tatukacegwi amuuya wabusyaacivwulemwangu wakuyandaula zintu zipya nzyobaambilizya basimakwebo ibayanda kuti katuyeeya kuti tweelede kuba azintu eezyo kutegwa tukkomane mubuumi. Mbuti mbomukonzya kucita kutegwa muzumanane kuba aliso lilangide buyo acintu comwe? Mutaliminyi kwiinda mukuba azikwelete zitayandiki. Mutayumyi buumi bwanu kwiinda mukuba azintu zinji izikonzya kumumanina ciindi kuzilanganya. Amutobele lulayo lwamu Bbaibbele lwaamba kuti mweelede kukkutila ‘acakulya azisani.’ (1 Timoteyo 6:8) Amubone mbomukonzya kuliimya zintu zimwi akuubya-ubya buumi bwanu.

21. Nkaambo nzi ncotweelede kusala zintu nzyotweelede kubikka kumbele, alimwi ino ncinzi ncotweelede kubikka kumbele mubuumi bwesu?

²¹ Amubikke zintu zyakumuuya kumbele alimwi akukakatila kulinzizyo. Mbokunga zintu nzyotukonzya kucita mubuumi nzisyoonto buyo, tweelede kusala zintu nzyotweelede kubikka kumbele. Buyo-buyo, zintu zitayandiki kapati zilakonzya kutumanina ciindi ncotweelede kubelesya kucita zintu ziyandika kapati. Ncinzi ncotweelede kubikka kumbele mubuumi bwesu? Ibantu banji munyika babikkila maano kapati kukuba alwiiyo lwaatala kutegwa bajane mulimo uuvwolwa mali manji mubweende bwazintu buno. Pele, Jesu wakakulwaizya basikumutobela kuti “amuzumanane kusaanguna kuyandaula Bwami.” (Matayo 6:33) Masimpe, mbokunga tuli Banakristo bakasimpe, tubikka Bwami bwa Leza mubusena bwakusaanguna mubuumi bwesu. Buumi bwesu, nkokuti nzyotusala, mbaakani zyesu, amilimo njotuyanda—bweelede kutondezya  kuti zintu zya Bwami alimwi akuyanda kwa Leza nzyezintu nzyotuyanda kapati kwiinda zintu zyakumubili.

22, 23. (a) Ino mulimo nzi uuyandika kapati ngobajisi Banakristo bakasimpe, alimwi ino mbuti mbotukonzya kutondezya kuti mulimo ooyu ulayandika kapati kulindiswe? (Amubone kabbokesi kakuti “ Ncondakasala Cakandipa Kuti Kandikkomana Akuliiba.”) (b) Makanze nzi ngomujisi kujatikizya mulimo wakumubili?

²² Mbokunga tulizyi kuti tupona kumamanino aaciindi kwini, tulabikkila maano kumulimo uuyandika kapati wa Banakristo bakasimpe—wakukambauka akuyiisya bantu kuba basikwiiya. (Matayo 24:14; 28:19, 20) Mbubonya mbuli Jesu iwakatusiila cikozyanyo, tuyanda kujata bubi mumulimo ooyu wakufwutula bantu. Mbuti mbotukonzya kutondezya kuti mulimo ooyu ulayandika kapati kulindiswe? Ibunji bwabantu ba Leza balilyaabide amoyo woonse mumulimo wakukambauka kabali basikumwaya mumbungano. Ibamwi bakacinca bukkale bwabo kutegwa babeleke mulimo wabupainiya naa wabumisyinali. Akaambo kakuti balizyi mboziyandika mbaakani zyakumuuya, ibazyali banji bakulwaizya bana babo kunjila mulimo waciindi coonse. Sena basikwaambilizya Bwami basungu balaukkomanina mulimo wakukambauka ngobabeleka canguzu? Inzya! Ikubelekela Jehova amoyo woonse nenzila iikonzya kutupa kuti katukkomana, kukkutila alimwi akuba azileleko zinji kapati.—Amubale Tusimpi 10:22.

²³ Tobanji tulabeleka ciindi cilamfwu kutegwa tujane zintu zyakumubili ziyandika mumukwasyi. Amuyeeye kuti Jehova uyanda kuti katuukkomanina mulimo ngotubeleka canguzu. Ikuti katuyeeya akucita zintu kweelana ambwazilanga zintu walo alimwi kweelana anjiisyo zyakwe, tulakonzya kuukkomanina mulimo wesu. Nokuba boobo, tutalekeli mulimo wakumubili kutulesya kucita mulimo uuyandika kapati, nkokuti mulimo wakwaambilizya makani mabotu aa Bwami bwa Leza. Kwiinda mukuubikka kumbele mulimo ooyu, tutondezya kuti tulamuyanda Jehova alimwi tulakonzya kuzumanana kuba muluyando lwakwe.