Nyoonse Nomumuyanda Jehova:

Jesu wakaamba kuti: “Muyoozyiba kasimpe, eelyo kasimpe kayoomwaangununa.” (Johane 8:32) Eelo kaka majwi aaya alakulwaizya! Masimpe tulakonzya kukazyiba kasimpe nokuba kuti tupona “kumazuba aamamanino” aakatazya nokuvwulide bubeji. (2 Timoteyo 3:1) Sena mulayeeya ciindi cakusaanguna nomwakakazyiba kasimpe kweelana ambokapanduludwe mu Jwi lya Leza? Eelo kaka eeci cakali kukkomanisya kapati!

Pele nokuba kuti tulakonzya kuba aluzyibo lwini-lwini lwakasimpe akwaambila bamwi makani aaya, tweelede kulilemeka kweelana akasimpe. Kutegwa tucite oobo, tweelede kuzumanana kukkala muluyando lwa Leza. Ino eeci caamba nzi? Majwi ngaakaamba Jesu imasiku katanafwa alakonzya kutugwasya kwiingula mubuzyo ooyu. Wakaambila baapostolo bakwe basyomeka kuti: “Ikuti mwaitobela milawo yangu, mulazumanana muluyando lwangu, mbubonya andime mbondaitobela milawo ya Taata akuzumanana muluyando lwakwe.”—Johane 15:10.

Amubone kuti Jesu wakazumanana kukkala muluyando lwa Leza kwiinda mukutobela milawo ya Bausyi. Andiswe mbotweelede kucita oobu mazuba aano. Kutegwa tuzumanane kukkala muluyando lwa Leza, tweelede kupona kweelana akasimpe abuzuba. Imangolezya mubuzuba mbubonya buya, Jesu wakaamba kuti: “Ikuti kamuzizyi zintu eezyi, munookkomene ikuti naa kamuzicita.”—Johane 13:17.

Tusyoma kuti bbuku eeli lilamugwasya kuzumanana kucita zintu kweelana akasimpe kamu Bbaibbele akuzumanana kukkala ‘muluyando lwa Leza nomulindila buumi butamani.’—Juda 21.