Ndilili makaintu Munakristo nayelede kusama citambala nacita milimo imwi yabukombi alimwi nkaambo nzi? Atulange-lange ncaakalemba mwaapostolo Paulo kujatikizya makani aaya kwiinda mukusololelwa amuuya. Wakaamba twaambo tukonzya kutusololela akutugwasya kusala kabotu kutegwa tumulemeke Leza. (1 Bakorinto 11:3-16) Paulo wakapa twaambo totatwe ntotweelede kubikkila maano: (1) milimo iinga yapa kuti mukaintu asame citambala, (2) bukkale bunga bwapa kuti acite boobo, (3) makanze ngayelede kuba angawo nacita boobo.

Milimo. Paulo wakaamba zintu zyobilo: kupaila akusinsima. (Tupango 4, 5) Mbuli mbotuzyi, mupailo caamba kwaambaula a Jehova cabulemu. Mazuba aano, kusinsima kulakonzya kubikkilizya mulimo uuli woonse uujatikizya kuyiisya makani aamu Bbaibbele ngwacita mubelesi Munakristo. Pele, sena Paulo wakali kwaamba kuti mukaintu weelede kusama citambala kufwumbwa ciindi napaila naa nayiisya bamwi kasimpe kamu Bbaibbele? Peepe. Bukkale mwabede mukaintu ciindi napaila naa nayiisya mbobukonzya kumupa kuti ayandike kusama citambala naa pe.

Bukkale. Majwi aa Paulo atondezya bukkale bobilo ibunga bwapa kuti mukaintu ayandike kusama citambala—mumukwasyi amumbungano. Wakaamba kuti: “Mutwe wamukaintu mwaalumi; . . . mukaintu uupaila naa uusinsima katalivwumbide kumutwe uusya mutwe wakwe nsoni.” (Tupango 3, 5) Mumukwasyi, Jehova ubikkide mulumi kuba mutwe wamukaintu.  Ikuti mukaintu kacita milimo mulumaakwe njapedwe kuli Jehova pele katatondezyi bulemu kubweendelezi bwamulumaakwe, ulakonzya kujazya mulumaakwe nsoni. Mucikozyanyo, ikuti kwayandika kuti mukaintu asololele ciiyo ca Bbaibbele kaliko mulumaakwe, ulakonzya kutondezya bulemu kumulumaakwe kwiinda mukusama citambala. Weelede kucita oobo kufwumbwa naa mulumaakwe ulibbapatizyidwe naa pe, mbwaanga ngomutwe wamukwasyi. * Mbubonya buyo, ikuti kwayandika kuti apaile naa kuyiisya nali antoomwe amwanaakwe muniini musankwa uubbapatizyidwe, mukaintu uleelede kusama citambala ikutali akaambo kakuti ooyu mwana musankwa ngomutwe wamukwasyi, pele akaambo kabweendelezi mbobapedwe basankwa babbapatizyidwe mumbungano ya Bunakristo.

Paulo wakaamba bukkale bujatikizya mbungano ategwa: “Ikuti muntu umwi kayanda kukazya kwiinda mukutobela ciyanza cimbi, swebo tunyina ciyanza cimbi pe noziba mbungano zya Leza.” (Kapango 16) Mumbungano ya Bunakristo, basankwa babbapatizyidwe mbabapedwe busilutwe. (1 Timoteyo 2:11-14; Bahebrayo 13:17) Basankwa balikke mbabasalwa kuba baalu abakutausi akupegwa mukuli wakweembela butanga bwa Leza. (Milimo 20:28) Pele, zimwi ziindi inga kwayandika kuti mukaintu Munakristo acite mulimo umwi uucitwa buyo amukwesu uubbapatizyidwe iweelela. Mucikozyanyo, inga wayandika kweendelezya muswaangano wamulimo wamumuunda ciindi nokutako mukwesu uubbapatizyidwe iweelela kucita oobo. Naa inga wayandika kweendelezya ciiyo ca Bbaibbele caaŋanda kali antoomwe amukwesu uubbapatizyidwe. * Mbokunga milimo eeyi ncibeela camulimo wakuyiisya uucitwa ambungano ya Bunakristo, mucizyi ooyo uleelede kusama citambala kutegwa atondezye kuti ucita mulimo weelede kucitwa amusankwa.

Kulubazu lumwi, kuli milimo minji yabukombi yalo iitayandiki kuti mane mucizyi asame citambala. Mucikozyanyo, tayandiki kusama citambala naingula lyamiswaangano ya Bunakristo, natola  lubazu mumulimo wakuŋanda aŋanda amulumaakwe naa amukwesu uumbi uubbapatizyidwe, naiya naa kupaila abana bakwe batanabbapatizyigwa. Masimpe, kulakonzya kubuka mibuzyo aimwi kujatikizya makani aaya, aboobo ikuti mucizyi katazyi kabotu cakucita ulakonzya kuvwuntauzya. * Ikuti kacizumbauzya alimwi manjezyeezya aakwe amwaambila kuti asame citambala, cili buyo kabotu kucita oobo kweelana ambokutondezyedwe mucifwanikiso eeci.

Makanze. Mukapango 10, tujana twaambo tobilo imukaintu Munakristo ncayelede kusama citambala kumutwe: “Mukaintu weelede kuba acitondezyo cakulibombya kumutwe wakwe akaambo kabangelo.” Kusaanguna, amubone kaambo kakuti, “citondezyo cakulibombya.” Kusama citambala ninzila mukaintu njatondezya kuti ulabulemeka bweendelezi Jehova mbwapede bakwesu babbapatizyidwe mumbungano. Kwiinda mukucita boobo, utondezya kuti ulamuyanda Jehova Leza alimwi akuti ulasyomeka kulinguwe. Kaambo kabili kajanika mumajwi aakuti “akaambo kabangelo.” Ino mbuti mukaintu uusama citambala mbwazijatikizya zilenge eezyi zyamuuya zilaanguzu kapati?

Bangelo baliyandide kapati kubona kuti bweendelezi bwa Jehova bulalemekwa mumbunga yakwe yoonse, kujulu alimwi aanyika. Alimwi balagwasyigwa nobabona cikozyanyo cibotu ncobapa bantu batalondokede caboola kumakani aaya. Kayi abalo beelede kulibombya kububambe bwa Jehova; icintu bangelo bamwi banji buya ncobakaalilwa kucita kaindi. (Juda 6) Ibangelo balakonzya kubona kuti nokuba kuti mukaintu Munakristo ulaaluzyibo lunji alimwi musongo kwiinda mukwesu uubbapatizyidwe mumbungano, ulalibombya cakulisungula kubweendelezi bwamukwesu ooyo. Zimwi ziindi, mukaintu ooyo inga kali  Munakristo munanike uuyakuba umwi wabasikulelanyina a Kristo. Kumbele, mukaintu ooyo mane uyakuba acuuno cipati kwiinda ncobajisi bangelo alimwi uyakweendelezya a Kristo kujulu. Taciliboteli kaka cikozyanyo ncobabona bangelo lino! Ncobeni, bacizyi boonse balijisi coolwe cakutondezya tuulunzuma twabangelo basyomeka mbociyandika kulibombya kubweendelezi bwa Leza kwiinda mukulibombya akusyomeka kwabo!