Cilatucisa kapati ikuti wamumukwasyi naa mweenzuma wagusyigwa mumbungano akaambo kakuteempwa kucibi ncaakacita. Tulakonzya kutondezya kuti tulamuyanda kapati Leza akuti tulasyomeka kapati kububambe bwakwe kwiinda mukutobela ncolyaamba Bbaibbele mumakani aaya. * Amulange-lange mibuzyo imwi iibuzyigwa kujatikizya makani aaya.

Ino mbuti mbotweelede kumucita muntu wakagusyigwa mumbungano? Bbaibbele lyaamba kuti: “Muleke kuyanzana amuntu uuli woonse uutegwa mukwesu pele sibwaamu, syaacivwulemwangu, sikukomba mituni, simatusi, mukolwi, naa cigwebenga, alimwi mutasoli nokuba kulya amuntu uuli boobo.” (1 Bakorinto 5:11) Kujatikizya muntu “uutazumanani munjiisyo ya Kristo,” tubala kuti: “Mutasoli pe kumutambula mumaanda aanu naa kumwaanzya. Nkaambo ooyo uumwaanzya ngusikutola lubazu mumicito yakwe mibi.” (2 Johane 9-11) Tatweelede kubandika zintu zyakumuuya naa kuyanzana amuntu wakagusyigwa mumbungano. Ngazi Yamulindizi ya Chingisi yamu September 15, 1981, apeeji 25, yaamba kuti: “Ikwaanzya muntu kuti ‘kwaamba’ kulakonzya kuba ntaamu yakusaanguna iisololela kumubandi alimwi mane akutalika kumvwana anguwe. Sena inga twayanda kubweza ntaamu eeyo yakusaanguna iisololela kukuyanzana amuntu uugusyidwe mumbungano?”

Sena masimpe kuti tweelede kumutantamukilalyo akutayanzana anguwe muzintu zyoonse? Inzya, akaambo katwaambo tuli mbotubede. Kaambo kakusaanguna nkakuti, eeci citondezya kuti tulasyomeka kuli Leza alimwi aku Jwi lyakwe. Tulamumvwida Jehova ikutali buyo nocili cuuba, pele tulacita oobo noliba leelyo nocikatazya kapati. Akaambo kakuti tulamuyanda Leza, tulaitobela milawo yakwe yoonse alimwi tulizyi kuti uliluleme, ngusiluyando akuti milawo yakwe ibikkilidwe kuti kaitugwasya. (Isaya 48:17; 1 Johane 5:3) Kaambo kabili nkakuti, ikumutantamuka sizibi uuteempwi kupa kuti swebo ambungano yoonse tutayambukilwi acibi cakwe akuti tuzumanane kusalala kumuuya amukulilemeka alimwi kupa kuti mbungano izumanane kuba ampuwo mbotu. (1 Bakorinto 5:6, 7) Ikaambo katatu  nkakuti, ikukakatila kunjiisyo zyamu Bbaibbele kulakonzya kumugwasya muntu uugusyidwe. Kwiinda mukutobela mbobakaakosola makani bakkomiti yalubeta, tulakonzya kupa kuti sizibi ooyo aliyeeye nokuba kuti kwaciindi cino tanaluzumina lugwasyo ndobakasoleka kumupa baalu. Ikusweekelwa coolwe citaliboteli cakuyanzana abantu mbayanda, kulakonzya kumupa kuti ‘aliyeeye,’ kuzyiba kuti cibi ncaakacita ncipati alimwi akubweza ntaamu zikonzya kupa kuti apiluke kuli Jehova.—Luka 15:17.

Ino mbuti kuti wamumukwasyi wagusyigwa mumbungano? Mubukkale buli boobo, iluyando luli akati kabanamukwasyi lulakonzya kupa kuti litubede sunko lipati caboola kumakani aakusyomeka kuli Jehova. Mbuti mbotweelede kumucita wamumukwasyi uugusyidwe mumbungano? Aawa tatukonzyi kubandika bukkale boonse bukonzya kuba kujatikizya makani aaya, pele atulange-lange buyo bukkale bobilo ibanji mobavwula kulijana.

Zimwi ziindi, umwi wamumukwasyi uugusyidwe mumbungano inga kacikkala aŋanda abazyali bakwe alimwi abamukwasyi bambi. Mbokunga kugusyigwa mumbungano takumani mukowa, ulakonzya kuzumanana kutola lubazu mumilimo alimwi amuzintu zimwi zicitwa buzuba abuzuba abanamukwasyi aŋanda. Pele, akaambo kazintu nzyaakacita, muntu ooyo wakasala kuti aleke kucita zintu zyakumuuya abamukwasyi wakwe ibasyoma. Aboobo, bamukwasyi ibasyomeka balaleka kuyanzana anguwe mumakani aajatikizya zintu zyakumuuya. Mucikozyanyo, ikuti muntu ooyo uugusyidwe mumbungano kaliko ciindi banamukwasyi nobakomba mumukwasyi, tayelede kutola lubazu mumubandi pe. Nokuba boobo, ikuti ooyo uugusyidwe mumbungano kali mwana muniini, bazyali bakwe bacijisi mukuli wakumuyiisya akumulaya. Aboobo, bazyali basiluyando balakonzya kubikka bubambe bwakumuyiisya Bbaibbele. *—Tusimpi 6:20-22; 29:17.

Zimwi ziindi, wamumukwasyi uugusyidwe mumbungano inga katutakkali limwi aŋanda. Nokuba kuti zimwi ziindi inga kwayandika kuti tuswaangane anguwe akubamba kaambo kamwi kamumukwasyi, tweelede kucesya ziindi zili boobo zyakuswaangana anguwe. Banamukwasyi Banakristo ibasyomeka tabasoli kulangaula twaambo twakulitamizya kutegwa kabayanzana amuntu uugusyidwe mumbungano  ngobatakkali limwi aŋanda. Muciindi caboobo, ikusyomeka kuli Jehova akumbunga yakwe kubapa kuti kabatobela bubambe bwamu Magwalo bwakugusya bantu bateempwi mumbungano. Kwiinda mukusyomeka kububambe oobu, balakonzya kutondezya kuti balamuyanda sizibi ooyo alimwi akupa kuti agwasyigwe acisubulo ncaakapegwa. *—Bahebrayo 12:11.