Jehova wakabapa nyika bantu. Nyika eeyi ngomunzi wesu. Aboobo, banabukwetene bakusaanguna, ba Adamu a Eva, tiibakalengelwa kuti bazuzye julu—Leza wakalilengede kale bangelo kuti kabakkala kujulu. (Jobu 38:4, 7) Muciindi caboobo, Leza wakabikka muntu wakusaanguna muparadaiso iikondelezya yakali kwiitwa kuti muunda wa Edeni. (Matalikilo 2:15-17) Jehova wakamupa bulangizi walo alimwi abana mbaakali kuyooba ambabo bwakukkomana kupona anyika kukabe kutamani.​—Amubale Intembauzyo 37:29; 115:16.

Kumatalikilo, muunda wa Edeni ulikke ngowakali paradaiso. Banabukwetene bakusaanguna bakeelede kuzuzya nyika abana babo. Mukuya kwaciindi, bakeelede kuyeendelezya nyika yoonse alimwi akwiipanga kuba paradaiso. (Matalikilo 1:28) Nyika kunyina noiyakunyonyoonwa pe. Mobanookkala bantu lyoonse.​—Amubale Intembauzyo 104:5.

Amweebelele Kavidiyo Ino Leza Wakailengela Nzi Nyika?

Ba Adamu a Eva tiibakamumvwida Leza, aboobo Jehova wakabatanda mumuunda. Paradaiso yakasweeka alimwi kunyina muntu iwacikonzya kwiipilusya. Ibbaibbele lyaamba kuti: “Nyika yapegwa mumaanza aababi.”—Jobu 9:24.​—Amubale Matalikilo 3:23, 24.

Sena Jehova waalilwa kuzuzikizya makanze aakwe aakusaanguna kujatikizya bantu? Peepe! Takonzyi kwaalilwa. Ngu singuzuzyoonse. (Isaya 45:18) Uyoozibambulula zintu kweelana amakanze aakwe kujatikizya bantu.​—Amubale Intembauzyo 37:11, 34.

Paradaiso iyoopilusyigwa anyika ciindi Jesu nanoolela kali Mwami uubikkidwe a Leza. Munkondo yiitwa kuti Amagedoni,  Jesu uyoosololela bangelo ba Leza mukunyonyoona baabo boonse bakazya Leza. Mpoonya Jesu uyoomwaanga Saatani kwamyaka iili 1,000. Bantu ba Leza bayoofwutuka akaambo kakuti Jesu unooli ambabo alimwi uyoobakwabilila. Bayookkomana kupona buumi butamani mu Paradaiso anyika.​—Amubale Ciyubunuzyo 20:1-3; 21:3, 4.

Ino Leza uyoobumana lili bubi anyika? Jesu wakapa “citondezyo” ciyootondezya kuti mamanino aswena. Bukkale bwazintu sunu bubikka buumi bwabantu muntenda alimwi ncitondezyo cakuti lino tupona ‘kumamanino aabweende bwazintu.’​—Amubale Matayo 24:3, 7-14, 21, 22.

Mumyaka iili 1,000 Jesu njayoolela nyika kali kujulu, uyakwaamana mapenzi oonse. (Isaya 9:6, 7; 11:9) Kunze lyakulela kali Mwami, Jesu uyooba Mupaizi Mupati alimwi uyoomwaya zibi zyabaabo bamuyanda Leza. Aboobo, kwiinda muli Jesu, Leza uyoogusya kuciswa, kucembaala, alimwi alufwu.​—Amubale Isaya 25:8; 33:24.

Bantu bamumvwida Leza bayookkala mu Paradaiso. (1 Johane 2:17) Jesu wakatuma basikumutobela kuti bayandaule bantu babombe myoyo akubayiisya mbobakonzya kuzuminwa a Leza. Mazuba aano, Jehova ulimukugwasya mamiliyoni aabantu kuti bakabe abuumi munyika ya Paradaiso kumbele. (Zefaniya 2:3) Kumaanda aa Bwami aa Bakamboni ba Jehova, bantu balaiya mbobakonzya kuba bamalumi, bamakaintu abazyali bali kabotu. Bana abazyali balakomba antoomwe akwiiya mbobakonzya kugwasyigwa amakani mabotu.​—Amubale Mika 4:1-4.