Mweelede kusolekesya kutegwa mujane mulongwe; alimwi mweelede kusolekesya ikutegwa cilongwe canu cizumanane. Muyoolongezyegwa kapati mukusoleka kwanu nkomucita kuba balongwe ba Leza alimwi amakanze aanu aakuzumananaa cilongwe eco. Kuli baabo ibakamusyoma Jesu wakati: “Bwini buyoomunununa.” (Johane 8:32) Ino eco caamba nzi?

Mulakonzya kubaa lwaanguluko lino. Mulakonzya kwaanguluka kunjiisyo zyakubeja akububeji ibwamwaigwaa Saatani. Mulakonzya kwaanguluka kukuzyingwa ikudumide mumaumi aatuulunzuma twabantu batamuzi Jehova. (Ba-Roma 8:22) Balongwe ba Leza balaangulukide “ku[ku]yoowa lufu.”—Ba-Hebrayo 2:14, 15.

Mulakonzya kubaa lwaanguluko munyika ya Leza impya. Taluliboteli kaka lwaanguluko ndomukonzya kuyoobaandulo kumbele! Munyika ya Paradaiso, muyooanguluka kunkondo amalwazi alimwi amilandu. Muyooanguluka kubucete anzala. Muyooanguluka kukucembaala alufwu. Lwaanguluko kubuyoofwu akudyaamininwa alimwi akukutalulama koonse. Ibbaibbele Leza limwaamba kuti: “Ulafumbatula ijanza lyako, ulakutya kusukama kwabaumi boonse.”—Intembauzyo 145:16.

 Balongwe ba Leza bayoopona kukabe kutamani. Buumi butamani ncipego cibotu Leza ncayoopa bantu boonse ibajisi cilongwe anguwe. (Ba-Roma 6:23) Amweezeezye buyo ncocaamba ikubaa buumi butamani!

Munoolaa ciindi cakucita zintu zinji. Ambweni muyandisya kwiiya kulizya ciimbyo cimwi. Antela muyanda kwiiya kuzekaula zifwanikiso naa kuba babezi. Ambweni muyandisya kwiiya makani aajatikizya banyama naa zisamu. Ambweni muyandisya kweenda nyendo zilamfwu akubona zisi ziindene-indene abantu. Ikubaa buumi butamani kuyoopa kuti zintu ezi zyoonse zikonzyeke!

Munoolaa ciindi cakubaa balongwe banji. Ikupona kukabe kutamani kuyoopa kuti muzyibe bambi ibanji ibakaba balongwe ba Leza. Muyoobuzyiba buhaazibwene bwabo muzintu abube bwabo bubotu alimwi abalo bayooba balongwe banu. Muyoobayanda alimwi abalo bayoomuyanda. (1 Ba-Korinto 13:8) Ikubaa buumi butamani ciyoomupa ciindi cakuba balongwe kumuntu woonse uunooponaa nyika! Ikwiinda zyoonse, icilongwe canu a Jehova ciyooindila kukomena imyaanda-myaanda yamyaka mboinooyooyabuya. Amube balongwe ba Leza mane kukabe kutamani!