Jehova takazumizyi bantu babi ikunyonyoona Paradaiso. Balikke balongwe bakwe mbabayookkala oomo. Ino ncinzi ciyoocitika kubantu babi? Ikutegwa tujane bwiinguzi, atulange-lange makani aakasimpe aajatikizya Nowa. Nowa wakali kupona zyuulu-zyuulu zyamyaka musyule. Wakali muntu mubotu iwakali kusoleka kapati kucita kuyanda kwa Jehova lyoonse. Pele ibantu bambi anyika bakali kucita zintu zibyaabi. Aboobo Jehova wakaambila Nowa kuti wakali kuyooleta zambangulwe lyakunyonyoona bantu aabo babyaabi boonse. Wakalailila Nowa kuti ayake bwaato ikutegwa walo amukwasyi wakwe batakafwi Zambangulwe nolyakali kuyooboola.—Matalikilo 6:9-18.

Nowa amukwasyi wakwe bakayaka bwaato. Nowa wakabacenjezya bantu kuti kwakali kuboola Zambangulwe, pele tiibakamuswiilila pe. Bakazumanana kucita zintu zibyaabi. Ibwaato nobwakamana kuyakwa, Nowa wakanjizya banyama mubwaato mpoonya awalo alimwi amukwasyi wakwe bakanjila. Mpoonya Jehova wakaleta imvwula mpati. Imvwula yakawa mazuba aali 40 isikati amasiku. Imaanzi akapaya nyika yoonse mbwiizulwa.—Matalikilo 7:7-12.

 Basizibi bakafwa, pele Nowa amukwasyi wakwe bakafwutulwa. Jehova wakabafwutula ku Zambangulwe akubaleta munyika iyakasalazidwe iinyina bubi. (Matalikilo 7:22, 23) Ibbaibbele lyaamba kuti cilasika alimwi ciindi elyo Jehova nayoonyonyoona baabo ibakaka kucita zintu ziluleme. Ibantu babotu tabakanyonyoonwi pe. Bayoopona kukabe kutamani aanyika ya Paradaiso.—2 Petro 2:5, 6, 9.

Ibantu banji sunu balacita zintu zibyaabi. Inyika izwide mapenzi. Jehova ulabatuma Bakamboni bakwe ciindi aciindi kuti bacenjezye bantu, pele ibanji tabayandi kutobela majwi aakwe. Tabayandi kuleka nzila zyabo. Tabayandi kuzumina makani ngaamba Leza kujatikizya zintu ziluzi azitaluzi. Ino ncinzi ciyoocitika kubantu aaba? Sena balangilwa kuti bayoocinca bumwi buzuba? Ibunji bwabo tabakacinci pe. Iciindi ciyoosika eelyo basizibi nobayoonyonyoonwa cakumaninina.—Intembauzyo 92:7.

Inyika taikanyonyoonwi pe; iyoocitwa kuti ibe Paradaiso. Aabo ibaba balongwe ba Leza bayoopona kukabe kutamani mu Paradaiso aanyika.—Intembauzyo 37:29.