Jesu Kristo Mmwanaa Jehova alimwi ngomulongwe wakwe ngwayandisya kwiinda boonse. Katanaboola anyika ano muciimo cabuntu, Jesu wakali kupona kujulu kali cilenge camuuya icanguzu kapati. (Johane 17:5) Mpoonya wakaboola anyika kuzyooyiisya bantu kasimpe ka Leza. (Johane 18:37) Alimwi wakaaba buumi bwakwe bwabuntunsi ikutegwa afwutule bantu bamumvwida kuzwa kucibi alimwi alufwu. (Ba-Roma 6:23) Lino Jesu Mmwami wa Bwami bwa Leza, imfwulumende yakujulu iiyooleta Paradaiso anyika ino.—Ciyubunuzyo 19:16.

Abalo bangelo mbalongwe ba Leza. Ibangelo kunyina nobakasaanguna kupona kabali bantunsi anyika pe. Bakalengwa buya kujulu Leza katanalenga nyika. (Jobu 38:4-7) Kuli tuulunzuma tuli mbotubede twabangelo. (Daniele 7:10) Aaba balongwe ba Leza bakujulu bayandisisya kuti bantu baiye kasimpe kujatikizya Jehova.—Ciyubunuzyo 14:6, 7.

Leza alimwi ulijisi balongwe anyika; ubaita kuti mbaakamboni bakwe. Imuntu uupa bumboni munkuta waamba zintu nzyazi kujatikizya muntu umwi naa cintu cimwi. Bakamboni ba Jehova baambila bamwi nzyobazyi kujatikizya Jehova amakanze aakwe. (Isaya 43:10) Mbubwenya mbuli bangelo, Bakamboni bayanda kumugwasya kwiiya kasimpe kujatikizya Jehova. Bayanda kuti anywebo mube balongwe ba Leza.