Sinkondonyina a Leza mupati ngu Saatani Diabolosi. Ncilenge camuuya icakazangila Jehova. Saatani wazumanana kulwana Leza alimwi nguuletela bantunsi mapenzi aataambiki. Saatani mmubyaabi kapati. Mmubeji alimwi mmujayi.—Johane 8:44.

Izilenge zyamuuya zimbi zyakamutobela Saatani mukuzangila Leza. Ibbaibbele liziita kuti mmadaimona. Imadaimona aalo mbaasinkondonyina a Leza mbubwenya mbuli Saatani. Alayandisisya kucisa bantu. (Matayo 9:32, 33; 12:22) Jehova uyoomunyonyoona cakumaninina Saatani amadaimonaakwe. Iciindi cacaala ncobacijisi cakupenzya bantu ncisyoonto buyo.—Ciyubunuzyo 12:12.

Ikuti kamuyanda kuba balongwe ba Leza, tamweelede kucita zintu nzyayanda kuti mucite Saatani. Saatani amadaimona balimusulide Jehova. Mbaasinkondonyina a Leza elyo bayanda kuti anywebo mube basinkondonyina a Leza. Mweelede kusala ngomweelede kukkomanisya—Saatani naa Jehova. Ikuti kamuyanda buumi butamani, mweelede kusala kucita kuyanda kwa Leza. Saatani ujisi nzila zinji zyabucenjezu izyakweena bantu. Ibantu banji bali mukweenwa anguwe.—Ciyubunuzyo 12:9.