Ikutegwa mube balongwe ba Leza, mweelede kwiiya makani aajatikizya nguwe. Sena balongwe banu balilizyi izina lyanu alimwi sena balalibelesya? Inzya. Awalo Leza uyanda kuti mulizyibe alimwi akulibelesya zina lyakwe. Izina lya Leza ngu Jehova. (Intembauzyo 83:18; Matayo 6:9) Alimwi mweelede kwiiya zintu nzyayanda anzyatayandi. Mweelede kubazyiba balongwe bakwe abasinkondonyina. Citola ciindi cili mbocibede ikumuzyiba kabotu muntu umwi. Ibbaibbele lyaamba kuti ncabusongo ikujana ciindi cakwiiya makani aajatikizya Jehova.—Ba-Efeso 5:15, 16.

Balongwe ba Leza bacita zintu izimukkomanisya. Amuyeeye balongwe banu. Ikuti kamutabalanganyi kabotu alimwi akucita zintu nzyobasulaika, sena bayoozumanana kuba balongwe banu? Peepe! Ncimwi buyo, ikuti kamuyanda kuba balongwe ba Leza, mweelede kunoocita zintu zimukkomanisya.—Johane 4:24.

Teensi zikombelo zyoonse izisololela kukubaa cilongwe a Leza. Jesu, imulongwe wa Leza ngwayandisya, wakaamba makani aanzila zyobile. Inzila imwi ilikwazeme alimwi ilizwide bantu. Inzila eyo isololela kulunyonyooko. Inzila iimbi ilimanikide alimwi ibantu beenda mulinjiyo mbasyoonto. Inzila eyo isolololela kubuumi butamani. Eci caamba kuti, ikuti kamuyanda kuba balongwe a Leza, mweelede kwiiya nzila iiluzi yakumukomba.—Matayo 7:13, 14.