Myuuya kwiili! Mukati kanyika yamuuya iitabonwi, kuli myuuya mibotu alimwi amibi. Sena mbantu bakaponede akufwa anyika?

Peepe, tabali mbabo. Ciindi muntu nafwa, inga tainki kunyika yamyuuya, mbubonya mbuli mbobayeeya bantu banji. Ino inga twaziba buti eci? Nkaambo Bbaibbele mbolyaamba obo. Ibbaibbele ndibbuku lyabwini lyalo lizwa kuli Leza alike wamasimpe, uulazina lya-Jehova. Jehova wakalenga bantu; ulizi kabotu cicitika kuli mbabo ciindi nobafwa.—Intembauzyo 83:18; 2 Timoteo 3:16.

Ibbaibbele lyaamba kuti Leza wakabumba Adamu, muntu mutaanzi, “wakamubumbya bulongo bwaansi.” (Matalikilo 2:7) Leza wakamubika mu-Paradaiso, muunda wa-Edeni. Ikuti Adamu naakamvwida mulao wa-Jehova, naatakafwa; asunu naaciliwo anyika. Pele ciindi Adamu naakatyola mulao wa-Leza acaali, Leza wakati kuli nguwe: “[Uyoopiluka] kunyika, nkaambo mulinjiyo mowakagwisigwa, nkaambo uli bulongo buyo, akooko kubulongo nkoelede kupiluka.”—Matalikilo 3:19.

Ino eci caambanzi? Ncibotu, ino Adamu wakali kuli Jehova katanamulenga kuzwa kunyika? Tanaakaliwo. Tanaakali muuya uutanazyalwa mujulu. Kwakanyina. Aboobo ciindi Jehova nakaamba kuti Adamu “[uyoopiluka] kunyika,” wakapandulula kuti Adamu uyoofwa. Tanaakalandukila kunyika yamyuuya. Alufu, Adamu alimwi  wakaba unyina buumi, uutawo. Lufu nkubula buumi.

Pele ino mbuti zyabamwi bafwide? Sena abalo tabaciwo? Ibbaibbele liingula kuti:

• “Boonse [bantu abanyama] balaya kubusena bomwe. Bakazwa kubulongo, alimwi balapiluka kubulongo.”—Mukambausi 3:20.

• “Bafwide tabezi cintu niciba comwe.”—Mukambausi 9:5.

• “Luyando lwabo alusulo lwabo abbivwe lyabo, zyoonse zyafwidilila.”—Mukambausi 9:6.

• “Taakwe milimo niiba miyeeyo neluba luzibo nebuba busongo mukabanda [mucuumbwe] moyoonjila.”—Mukambausi 9:10.

• “[Muntu] ulabweeda kubulongo; mubuzuba obo mbubonya makanze aakwe oonse alamana.”—Intembauzyo 146:4.

Sena mujana buyumuyumu kuzumina magwalo aya? Ikuti na mboobo, amuyeeye ceeci: Mumikwasyi minji, musankwa ujana mali akubamba mukwasyi  wakwe. Ciindi musankwa nafwa, mukwasyi wakwe ujana buyumuyumu. Cimwi ciindi mukaintu wakwe abana inga tabajisi mali manji aakuula zyakulya. Ndiza balwani bamusankwa uya inga babakatazya. Lino amulibuzye nobamukamwini: ‘Ikuti na musankwa oyo ulapona kunyika yamyuuya, ino nkaambonzi ncatatoleleli kubamba mukwasyi wakwe? Ino nkaambonzi ncatakwabilili mukwasyi wakwe kuzwa kubantu babi?’ Nkaambo kakuti magwalo ali masimpe. Musankwa uuya tajisi buumi, takonzyi kucita cintu nociba comwe.—Intembauzyo 115:17.

Sena eci caamba kuti bafwide tabakabooli kubuumi alimwi? Peepe, tabuli mbubo. Tulakanana zyabubuke kumbele. Pele caamba kuti bafwide tabezi ncomucita. Tabakonzyi kumubona, kumumvwa, naba kukanana andinywe. Tamweelede kubayoowa. Tabakonzyi kumugwasya, alimwi tabakonzyi kumucisa.—Mukambausi 9:4; Isaya 26:14.