Ibbaibbele lyaamba kuti Saatani “nguuena bantu boonse baansi.” (Ciyubunuzyo 12:9) Saatani amadaimona aakwe tabayandi kuti swebo tusyome Ijwi lya-Leza, Ibbaibbele. Basola kucita bantu kusyoma kuti bafwide balapona kumwi kunyika yamyuuya. Atulange mbuli mbwiicita eci.

Bukombi bunji buyiisya kuti muntu woonse ulaabuumi obo bwiinka kunyika yamyuuya ciindi mubili wabuntu nuufwa. Baamba kuti mubili ulafwa akuti buumi tabufwi. Alimwi, balasinizya kwaamba kuti buumi tabukonzyi kufwa, ikuti tabufwiki.

Pele Ijwi lya-Leza taliyiisyi obo. Ibbaibbele litondezya kuti buumi muntu, kutali cimwi cintu cikala mukati kamuntu. Muceezyanisyo, kupandulula kulengwa kwa-Adamu, Ibbaibbele lyaamba kuti: “Jehova Leza wakabumba muntu. Wakamubumbya bulongo bwaansi, wamufulida mumpemu zyakwe muuya wabuumi, nkabela mpawo muntu wakaba muumi.” (Matalikilo 2:7) Aboobo Adamu taakapegwa buumi; wakali mbobuumi.

Banyama abalo baitwa kuti nzyabuumi.—Matalikilo 1:20, 21, 24, 30.

 Mbokunga ijwi lyamu-Bbaibbele “buumi” caamba muntu mukamwini, taceelede kutugambya kwiiya kuti buumi bulakonzya alimwi bulafwa. Magwalo aamba kuti:

• “Buumi bubisya—mbombubo buyoofwa.”—Ezekieli 18:4, NW.

• “Nkabela Samsoni wakati: ‘Leka buumi bwangu bufwide antoomwe aba-Filisti.’”—Babetesi 16:30, NW.

• “Sena cileelede mu-sabata kucita kabotu nanka kucita cibi, kufutula nanka kujaya buumi?”—Marko 3:4, NW.

Ikuti buumi bulakonzya kunyonyoonwa, naba kujaigwa apanga, kulatondezegwa muli Joshua 10:37 (NW): “Elyo bakauzunda akuuyasa apanga mwami wanguwo aminzi yoonse abuumi boonse bwakali mukati. . . . Wakaunyonyoona abuumi boonse ibwakali mulinguwo.” Aboobo, buumi bulafwa.

Ikuti na mwabala Ibbaibbele kuzwa kumatalikilo kusikila kumamanino, kwiina mpomuyookonzya kujana kaambyo kakuti “buumi tabufwi.” Buumi bwamuntu tuuli muuya. Kuyiisya kwabuumi butafwi takuli kuyiisya kwa-Bbaibbele. Nkuyiisya kwa-Saatani  amadaimona aakwe. Jehova tayandi kubeja koonse kwabukombi.—Tusimpi 6:16-19; 1 Timoteo 4:1, 2.

Aimwi nzila Saatani njaena bantu nkwiinda muli basibusangu. Sibusangu muntu uukonzya kutambula makani cakaanzambwene kuzwa kunyika yamyuuya. Bantu banji banji, kubikilizya abasibusangu mbamunya, basyoma kuti twaambo otu tuzwa kumyuuya yabantu bafwide. Pele mbuli mbotwabona kuzwa mu-Bbaibbele, eci tacikonzyeki.—Mukambausi 9:5, 6, 10.

Lino, ino twaaambo otu tuzwa kuli? Madaimona ngamunya! Madaimona alakonzya kulangilila muntu ciindi napona; alizi mbuli muntu mbwaakali kukanana, mbuli mbwaakali kulangika, nzyaakacita, alimwi anzyaakazyi. Aboobo ncuubauba kuli ngawo kwiiya bantu bafwide. —1 Samuele 28:3-19.

Nzila aimwi Saatani njatola ambele kubeja kwabafwide nkwiinda mumakani aakubeja. Makani aamusyobo oyo bunji bwaziindi atantamuna bantu kubwini bwa-Bbaibbele.—2 Timoteo 4:4.

Mu Africa kuli twaano tunji twabantu bakabonwa balapona nibaamana kufwa. Kanjikanji, kubonwa oku kulacitwa kubusena bwakule kuzwa kooko muntu oyo nkwaakali kuponena. Pele amulibuzye nobamukamwini: ‘Sena inga ncamaanu ikuti na muntu ulijisi nguzu zyakupiluka kuzwa kubafu, wainka kubusena kule kuzwa kumukwasyi wakwe abalongwe?’

Alimwi, sena inga takuli kuti muntu oyo wabonwa ukozyenye buyo amuntu wakafwa? Muceezyanisyo, babelesi bobile Bacikristo bakali kukambauka kubusena bwamuminzi bakabona mudaala umwi wakali kubacilila kwamaola aakubwene. Ciindi nibakamubuzya, bakazooziba kuti mudaala uya wakali kuyeeya kuti umwi wababelesi wakali munyina wakafwide ciindi kwamyaka iikubwene. Ncobeni, wakalilubide, pele wakakaka kusyoma kuti wakali lubide. Amuyeeye mudaala oyo mbwaakalungulula makani ayo kubeenzinyina alimwi abasimukobonyina!

Kakwiina akudooneka mulizi zintu zikatazya bantu nzyobaabona, kumvwa, naba kulota. Zicitika zyamusyobo oyo zyanguzu ziinda bunji bwaziindi ziyoosya baabo bazijisi. Marein, wakali kukala Kumbo a Africa, kanji kanji wakali kumvwa ijwi lyabaneene bakwe baazimina kalimwiita masiku. Kayoowede, Marein wakali kunga uloongolola, kubusya boonse bamuŋanda yakwe. Mukuya kwaciindi, wakasondoka.

Lino, ikuti na bafwide masimpe balapona, sena inga caba camaanu kuti inga bayoosya bayandwa babo? Ncobeni peepe. Ikuzwa twaambo oto tucisa madaimona.

Pele ino mbuti zyatwaambo oto tulangika mbuli kuti tulagwasya alimwi akutontozya? Muceezyanisyo, Gbassay, uzwa ku Sierra Leone, wakali kuciswa. Wakali aciloti oko bausyi balobe nkobakalibonya kulinguwe. Bakamulailila kwiinka kucisamu cimwi, kubweza tu, kulisanganya amaanzi, akunywa. Tanaakeelede kukanana amuntu naba omwe katanacita obo. Wakacita eci elyo wakaba kabotu.

Aumwi mukaintu wakaamba kuti mulumaakwe wakalibonya kulinguwe bumwi busiku kafwide kale. Wakaamba kuti wakali kweebeka alimwi wakasamide zisani zibotu.

 Twaambo twamusyobo oyo tulangika kuba tubotu alimwi tugwasya. Sena tuzwa kuli Leza? Peepe, tatuciti. Jehova ngu “Leza walusyomo.” (Intembauzyo 31:5) Kwiina nakonzya kuzumina kutubeja naba kutweena. Alike madaimona ngaacita eco.

Pele sena nkwaali madaimona mabotu? Peepe. Nokuba kuti inga alangika kuba alugwasyo zimwi ziindi, oonse buyo mabi. Ciindi Diabolosi naakakanana kuli Eva, wakalitondezya kuba mulongwe. (Matalikilo 3:1) Pele ino ncinzi cakazwa mpawo naakamana kumvwa kulinguwe akucita nzyaakamwaambila? Wakafwa.

Mulizi kuti tacili ceenzu muntu mubi kuba mulongwe kuli baabo mbayanda kuunina akucenga. “Meno atuba, moyo uusiya,” mbokaamba kaambyo kaci Africa. Alimwi Ijwi lya-Leza lyaamba kuti: “Saatani mwini alakwe ulalisandula mbuli angelo wamumuni.”—2 Ba-Korinto 11:14.

Leza tacijatani abantu anyika kwiinda mumaloto, zilengaano, na majwi azwa kunyika yamuuya. Ulabalailila akubatondezya kwiinda mu-Bbaibbele, elyo linga lyapa muntu kuti “azulile kukumana milimo mibotu yoonse.”—2 Timoteo 3:17.

Aboobo, ciindi Jehova natucenjezya kuzwa kukuuninwa kwa-Diabolosi, ulacita obo nkaambo ulatuyanda. Ulizi kuti madaimona mbalwani babi.