1. Ncinzi ciyoocitika ikuti naa swebo ‘twaswenenena kuli Leza’?

JEHOVA ulabayanda aabo bamubelekela. Ikuti kamumukomba Jehova, ulamulongezya lino alimwi akumbele. Ibbaibbele lyaamba kuti: “Amuswenenene kuli-Leza, elyo alakwe ulamuswenenena.”—Jakobo 4:8.

2. Mbuti mbotunga twaswenenena kuli Leza, alimwi ino kucita boobo kwiijatikizya buti mipailo yesu?

² Ikutegwa muswenenene kuli Leza, mweelede kwiiya alimwi akuzibelesya zili mu Jwi lyakwe. Iciindi nomupaila kweelanaa luyando lwakwe, Jehova uya kwiiswiilila mipailo yanu alimwi akuyiingula. Imwaapostolo Munakristo Johane wakalemba kuti: “Kaanzambwene nkitujisi kubusyu bwakwe nkaaka kakuti, na twakumbila kufumbwa cintu cili buti cili mbuli makanze aakwe, ulatumvwa. Nkabela na tulizi kuti ulatumvwa, coonse ncotukumbila, tulizi kuti tulijisi zikumbilo nzitwamukumbila.”—1 Johane 5:14, 15.

3-7. Mbuti mbotunga twabujana busongo bwabunaleza, alimwi ino inga bwatugwasya buti?

³ Kuyungizya waawo, mbomuya buswenenena kuli Leza, uyoomupa busongo buyandika kutegwa mucikonzye kweendelezya bukkale mubuumi bwabuzubaa buzuba. Ibbaibbele lyaamba kuti: “Na nkwali akati kanu uubula busongo, akumbile kuli-Leza.”—Jakobo 1:5.

⁴ Ino mbuti busongo bwa Leza mbobunga bwamugwasya? Ikaambo kamwi nkakuti, bulakonzya kumugwasya kuziba zintu zimucima Jehova. Alimwi mulakonzya kuziba zintu eezi ncozilubide ancomukonzya kucita kutegwa kamutaziciti. Luzibo luli boobo lulakonzya kumukwabilila kumapenzi manji ngobajisi bantu banji. Mucikozyanyo, ikutobela malailile aa Leza aatondezya mbociyandika kulilemeka, kulagwasya mukukwabilila bantu ba Leza kuti batabi amada aamusokwe, malwazi aaboola kwiinda mukoonana alimwi amapenzi mulukwatano naa kulekana.

⁵ Ino ncinzi cimbi busongo buzwa kuli Leza ncobukonzya kumugwasya? Bulakonzya kumugwasya kuzwidilila mubuumi bwanu. Alimwi bulakonzya kumugwasya kusala camaano mumakani aayandika kapati aambuli mbomweelede kwaabelesya kabotu mali aanu. Muyookonzya kubaa mbaakani zigwasya kutali zeezyo zyaciindi buyo cisyoonto.

⁶ Alimwi busongo bwabunaleza bulakonzya kumugwasya mukuyanzana kwanu abantu bambi. Mulakonzya kubaa amukwasyi uukkomanisya. Mulakonzya kujana balongwe basyomeka, beni-beni alimwi nobaba baabo batabelekeli Leza banoomulemeka.

⁷ Kuyungizya waawo, busongo bwabunaleza mbomunooli aambubo buyoomugwasya kubulanga munzila mbotu ibuumi. Buyoomugwasya kuti mucikonzye kuzwidilila mumapenzi ngomujisi atyompya. Alimwi munoojisi mizeezo iili kabotu kujatikizya zintu zyakumbele. Nkabela kuzilanga munzila iili kabotu zintu kuyoomupa kubaa mizeezo iili kabotu alimwi akubaa buumi buli kabotu.—Tusimpi 14:30; Isaya 48:17.

8. Ncinzi ncomutakonzyi kuyoowa ikuti kamubelekela Leza?

 ⁸ Ikuti kamubelekela Leza wakasimpe, tamunooli abuyoofwu mbobajisi aabo batamubelekeli. Mbokunga mulizi kuti bafwide tabaponi mucuumbwe, taakwe nomuyoobayoowa pe. Tamukonzyi kuyoowa kufwa akaambo kakuti mulijisi lusyomo mucisyomezyo ca Leza cakubusya bafwide. Alimwi mbwaanga mulizyi kuti Leza ngusinguzu zyoonse, tamukonzyi kuyoowa bulozi pe.—Johane 8:32.

9-11. Mbaani ibayookkala mu Paradaiso, alimwi mbaani ibatakakkali mulinjiyo?

⁹ Ikuti naa mwaswenenena kuli Leza, tamukonzyi kuyoowa zintu zyakumbele. Mbubwenya mbuli mbotwabona kale, Ibbaibbele lyakasinsima mapenzi manji aayo ngotuli mukubona anyika sunu. Jehova utwaambila kuti zintu zyoonse eezi nzyakaindi kasyoonto buyo; ino-ino Bwami bwa Leza buyoocita nyika eeyi kuba paradaiso.—Luka 21:10, 11, 31; 23:43.

¹⁰ Balikke aabo baswenenena kuli Jehova alimwi akumubelekela mbabayookkala mu Paradaiso. Ibbaibbele lyaamba kuti: “Kaba kaindi kaniini sizibi takooyooba wo; unooyeeya nkwaakabede, pele takooyooba nkuko. Pele babombemyoyo bayoovuba nyika, bayookondwa muluumuno lunji.”—Intembauzyo 37:10, 11.

¹¹ Aabo bakaka kutobela milawo ya Leza iiluleme bayoonyonyoonwa mane kukabe kutamani. (2 Ba-Tesalonika 1:8, 9) Tabakooyoobako pe. Bayoomusangana Saatani amadaimonaakwe mulufwu kukabe kutamani. (Ciyubunuzyo 20:10, 14) Pele kulibaabo bali mukwiiya zya Jehova alimwi akumubelekela bayookondwa mu Paradaiso anyika.

12. Ncinzi Bbaibbele ncolyaamba kujatikizya zintu zyakumbele?

¹² Jehova uyoobacitila zintu zibotu kapati aabo bamuyanda! Amubone Jwi lyakwe mbolibupandulula buumi mu Paradaiso anyika:

• Izyakulya zinooli maunda-maunda: “Maila (naa zyakulya) avule ansi, atala lyazilundu.”—Intembauzyo 72:16.

• Maanda mabotu aakukkala: “Bayooyaka maanda akukala mulingao.”—Isaya 65:21.

• Milimo inookondelezya: “Bantu mbensalide bayoongozya milimo yamaanza aabo. Tabakooyoobeleka cabuyo.”—Isaya 65:22, 23.

• Kunoonyina kuciswa: “Takukooyooba naba omwe akati kabantu banyika uuamba kuti, Ndaciswa.”—Isaya 33:24.

• Kunoonyina bulema: “Lino meso aaboofu ayoobononona, amatwi aabasinke ayoosinkuka. Cilema unooya busotauka mbuli insya, alulimi lwasyataambi luyooimbisya.”—Isaya 35:5, 6.

• Kulila, kuusa, lufwu tazicinooliko: “[Leza] uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—Ciyubunuzyo 21:4.

• Kunoonyina nkondo: “[Leza] ulalesya inkondo mane kusikila kumamanino aanyika.”—Intembauzyo 46:9.

• Buumi butamani: “Balulami bayookona nyika, bayookala alinjiyo lyoonse.”—Intembauzyo 37:29.

13. Nguni alikke uukonzya kubamba nyika eeyi kuba paradaiso, alimwi nkaambo nzi?

¹³ Ibantu tabakonzyi kucita zintu zili boobu pe, pele Jehova ulijisi nguzu zyakucita kufwumbwa cintu ncaamba kuti uyoocicita. Taakwe cintu cikonzya kumukasya kucita ceeco ncayanda kuti acite pe. Ibbaibbele lyaamba kuti: “Taakwe ijwi ilizwa kuli-Leza ilibula nguzu.”—Luka 1:37.

14. Ino mbuti mbomunga mwaba munzila iisololela kubuumi butamani?

¹⁴ Kwiinda mukubelesya Bakamboni bakwe, Jehova uli mukupa coolwe kubantu boonse cakuti ‘banjile mumulyango uumanikide’ alimwi akweenda munzila iisololela kubuumi butamani. Amube akati kabantu bakkomene ibazumina kutambwa ooko. Amube mucikombelo cakasimpe kutegwa mukajane zilongezyo zya Jehova mane kukabe kutamani!—Matayo 7:13, 14.