1. Ncinzi ncotweelede kucita kutegwa tumukkomanisye Leza?

IKUTEGWA tube acilongwe a Leza, tatweelede kubaa lubazu mucikombelo cakubeja. Tweelede kutobela cikombelo cakasimpe. Sunu tuulunzuma twabantu munyika yoonse bali mukucita mbubwenya oobo.

2. Nkuukuli Bakamboni ba Jehova nkobakonzya kujanwa, alimwi mulimo nzi ngobali mukucita?

² Kweelanaa mbulyakasinsima Bbaibbele, bakombi beni-beni mbabali mucibeela “[ca]nkamu impati” yabantu bakazwa “kuzisi zyoonse akumisyobo yoonse akumikowa yoonse akumyaambo yoonse.” (Ciyubunuzyo 7:9) Muzisi zili 235, tuulunzuma twa Bakamboni ba Jehova bali mukugwasya bamwi kwiiya nzila zyaluyando zya Jehova alimwi akuyanda kwakwe.

3. Nguni Bakamboni ngobakomba, alimwi mbukombi buli bumwi mbobatantamuka?

³ Bakamboni balizyi kuti Jehova alikke nguuyelede kukombwa. Aboobo balakaka kukomba mituni alimwi azifwanikiso zyobabikka muzikombelo. (1 Johane 5:21) Tabalemeki bantu bafwide kwiinda mukutola lubazu muzilengwa zyakubucesya mumadilwe, mumapobwe aamwi aakulwaizya njiisyo zyacikombelo cakubeja alimwi “amafundisyo aabadaimona.” (1 Timoteo 4:1) Nokuba boobo, balapa luumbulizyo kulibaabo bafwidwa bayandwa babo kwiinda mukupandulula cisyomezyo ca Leza cakuti kuyooba bubuke bwabafwu muparadaiso anyika.—Johane 5:28, 29; Incito 24:15.

4. Ino bantu ba Leza baalanga buti masalamuzi?

⁴ Bakamboni tabatoli lubazu mumasalamuzi alimwi amubulozi nkaambo balizyi kuti zintu eezi zizwa kuli Diabolosi. Tabasyomi mumasalamuzi kuti abakwabilile pe—lusyomo lwabo luli kuli Jehova.—Tusimpi 18:10.

5. Mmuunzila nzi Bakamboni ba Jehova mobatali “banyika”?

⁵ Jesu wakaamba kuti basikwiiya bakwe tiibakali kuyooba “banyika.” (Johane 17:16) Jesu mwini kumugama wakakaka kutola lubazu mutwaambo twacisi naakali kupona anyika. (Johane 6:15) Mbubwenya buyo, Bakamboni tabatoli lubazu mutwaambo twacisi, kuciindilizya kuyandisya cisi cakwabo alimwi akuzwangana akaambo kakuyanda kuba kabunga kalaampuwo ooko kuliko munyika eeyi. Nokuba boobo, balabbadela mitelo yabo alimwi akutobela milawo yacisi mobakkala.—Johane 15:19; Ba-Roma 13:1, 7.

6. Ino mmalailile nzi babelesi ba Leza ngobatobela aajatikizya lukwatano alimwi akulekana?

⁶ Akaambo kakuti milawo yamfwulumende balaitobela, Bakamboni balabona kwaamba kuti balembya lukwatano lwabo mumulawo. (Tito 3:1) Balabutobela busolozi bwa Leza alimwi taakwe nobakwata maali. (1 Timoteo 3:2) Kuyungizya waawo, mbwaanga balazitobela zyeelelo zya Bbaibbele mubuumi bwabo, kulekana takulangilwi pe kubabelesi ba Leza.

7. Mbuti Bakamboni mbobatondezya luyando kuluumwi aumwi?

⁷ Bakamboni balamvwana. Luyando oolu ndobajisi lulabikkilizya aloolo ndobajisi kuli Leza, lulabakamantanya mubunyina bwini-bwini, nokuba kuti bazwa kumisyobo minji alimwi amuzisi zyandeene-andeene. Bakamboni balafwambaana kugwasyanya nokwacitika ntenda naa nokuyandika lugwasyo lumwi. Bakamboni balatondezya luyando mubukkale bwabo.—Johane 13:35.

8. Mmicito mibi iili bantu ba Leza njobataciti?

⁸ Bantu ba Jehova balasolekesya kusyomeka akuba abukkale bululeme. Tababbi, tababeji, balalilemeka, tabakolwi alimwi balasyomeka mumakwebo. Baalumi tababaumi bamakaintu babo. Bamwi bakali kuzicita zintu eezi kabatanaba Bakamboni, pele kwiinda mulugwasyo lwa Jehova bakazileka. ‘Bakasalazigwa’ mumeso aa Leza.—1 Ba-Korinto 6:9-11.

9. Ncinzi bbuku limwi ncolyakaamba kujatikizya zikombelo zyamu Afulika?

⁹ Masimpe, zikombelo zinji zilitaminina kuti ziyiisya kasimpe. Balakonzya kwaamba milimo yabo iigambya ikutegwa basinizye kulitaminina kwabo. Mucikozyanyo, kujatikizya zeezyo nzyobaita kuti zikombelo zyamuuya mu Afulika, ibbuku limwi lyaamba kuti: “Imulimo wamuntu simasalamuzi naa simisamu wanjililwa mubusena [atubunga tupya twa Bunakristo]. . . . Balyaamba kuti balakonzya kusinsima alimwi akucita maleele. Ibasinsimi bali akati kabo balabatondezya zilengaano alimwi akupandulula ziloto. Mukusilika kwabo alimwi akukwabilila malwazi, babelesya maanzi alimwi amungwimba uusetekene, itwe, nkandela alimwi atununkilizyo.”

10, 11. Nkaambo nzi maleele aacitwa mazubaano ncaatatondezyi kuti cikombelo eeco cizwa kuli Leza?

¹⁰ Ibakombi kuzwa kuzikombelo eezi baamba kuti maleele ngobacita asinizya kuti cikombelo cabo cililongezyedwe a Leza. Pele aayo maleele ngobaamba taasinizyi kuti cikombelo cilazuminwa kuli Jehova pe. Saatani ulabapa nguzu bamwi bakombi bakubeja zyakucita ‘milimo yanguzu.’ (2 Ba-Tesalonika 2:9) Kunze lyaboobo, Ibbaibbele lyakasinsima kuti zipego zyamaleele kuzwa kuli Leza mbuli zyakusinsima, kukanana mumyaambo alimwi aluzibo lulibedelede, zyakali ‘kuyooloba.’—1 Ba-Korinto 13:8.

¹¹ Jesu wakacenjezya kuti: “Boonse bandaambila kuti, Mwami, mwami, teensi mbabo bayoonjila mu-Bwami bwakujulu, ngooyo uucita luyando lwa-Taata uuli kujulu. Kubuzuba obo banjibanji bayoondaambila kuti, Mwami, mwami, sa teetwakasinsima kuzina lyako? Alimwi, sa teensi kuzina lyako nkutwakatanda badaimona? Sa teensi kuzina lyako nkutwakacita milimo mipati minji? Lino nzoobaambila kuti, Nsimuzi pe, amuzwe kulindime inywe nubamucita zibi.”—Matayo 7:21-23.

12. Mbaani ibayoonjila mu Bwami bwakujulu?

¹² Aboobo, ino mbaani ibayoonjila mu Bwami bwakujulu? Mbaabo ibacita kuyanda kwa Jehova.

13. Ino mmulimo nzi Leza ngwali mukusololela bantu bakwe kuti bacite sunu, alimwi mbaani bali mukuucita?

¹³ Ino ncinzi Leza ncayanda kubantu bakwe sunu? Jesu wakaamba kuti: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse.” (Matayo 24:14) Ooyu ngomulimo Bakamboni ba Jehova ngobali mukucita cabusungu.

14. Ino Bwami bwa Leza ninzi, alimwi mbaani ibayoolela mu Bwami oobu?

¹⁴ “Munyika yoonse,” Bakamboni ba Jehova balaambilizya Bwami bwa Leza kuti nimfwulumende yakujulu iyooyendelezya nyika yoonse mbwiizulwa cabululami. Bayiisya kuti Jehova wakabikka Kristo Jesu kuba Mwami wa Bwami oobo antoomwe abasikulelanyina ibali 144,000 bakasalwa akati kabantu.—Daniele 7:14, 18; Ciyubunuzyo 14:1, 4.

15. Ncinzi Bwami ncobuyoonyonyoona?

¹⁵ Kwiinda mukubelesya Bbaibbele, Bakamboni bayiisya bantu kuti Bwami bwa Leza buyoonyonyoona bweende bubyaabi bwa Saatani. Icikombelo cakubeja acalo ciyoonyonyoonwa antoomwe anjiisyo zyancico zitalemeki Leza zilemeka buyo Diabolosi! (Ciyubunuzyo 18:8) Alimwi imfwulumende zyabantu zyoonse zikazyanya a Leza, ziyoonyonyoonwa!—Daniele 2:44.

16. Mbaani ibayooba balelwa ba Kristo Jesu, alimwi nkuukuli nkobayookkala?

¹⁶ Kuyungizya waawo, Bakamboni ba Jehova bali mukuzibya bantu kuti Kristo Jesu uyooleta zilongezyo zitaliboteli kubantu boonse bacita ceeco Leza ncayanda. Bayooba balelwa bakwe anyika. Mboobu Bbaibbele mbolisyomezya: “Ulavuna bacete nibakwiila, abalo bapengede abaabo babula mugwasyi. Bacete abatengwana ulabafwida luzyalo; buumi bwabacete ulabufutula.”—Intembauzyo 72:12, 13.

17. Mbaani balikke bali mukukambauka Bwami bwa Leza?

¹⁷ Taakwe nkamu yabantu iimbi iicita luyando lwa Leza kwiinda mukukambauka makani mabotu aa Bwami pe. Balikke Bakamboni ba Jehova mbabali mukuzibya bantu zya Bwami bwa Leza munyika yoonse mboizulwa.