1, 2. Ncikozyanyo nzi citondezya mbokuyandika kubaa ceelelo notukosola makani aabukombi?

MBUTI mbotunga twamuzyiba Leza? Sena cilayandika kulanga-langa njiisyo zyoonse zili muzikombelo zinji? Tacikonzyeki kucita boobo pe. Nokuba kuti twaali kukonzya kucita boobo, mbuti mbotunga twazyiba njiisyo yakasimpe?

² Masimpe, akaambo kamizeezo iindene-indene yoonse iiliko kujatikizya Leza, tuyandika nzila iikonzya kutugwasya kuzyiba kasimpe, iceelelo bantu ncobakonzya kuzumina. Mucikozyanyo: Atwaambe kuti kakuli kukazyanya amusika akaambo kabulamfwu bwamulembo. Musambazi waamba kuti mulembo ulampa mamita aali otatwe, pele sikuula uuyeeyela kuti tausiki aawo pe. Ino mbuti kaambo mbokanga kakosolwa? Nkwiinda mukupima mulembo acipimyo.

3. Nkaambo nzi Bbaibbele ncolyakalembelwa?

³ Sena kuli cipimyo naa ceelelo cakubelesya mukukosola makani aabukombi? Inzya, ndi Bbaibbele. Leza wakabona kuti Bbaibbele lyalembwa kutegwa bantu kumasena oonse bakonzye kwiiya kasimpe kujatikizya nguwe. Izyuulu zyatuulunzuma zili mbozibede zyamakkopi zyasimbwa. Ibbaibbele lyasandululwa lyoonse mbolizulwa naa muzibeela-beela mumyaambo iinda ku 2,100. Ibunji bwabantu balakonzya kubala kasimpe ka Leza mumwaambo wabo.

4. Mmakani nzi aajanika mu Bbaibbele?

⁴ Ibbaibbele ncipego cipati kuzwa kuli Leza. Lilapandulula zintu eezyo nzyotwatali kunookonzya kuziba nilyataliko. Lilaamba  kujatikizya baabo bakkala mubusena bwamyuuya. Lilayubununa mizeezo ya Leza, bube bwakwe alimwi amakanze aakwe. Lilaamba mbwakali kweendelezya bantu kwazyuulu zyamyaka zyainda. Lilaamba zintu ziyoocitika kumbele. Alimwi lilatondezya mbotunga twaijana nzila iisololela kubuumi butamani.

5. Ino ncikozyanyo nzi citondezya kuti Bbaibbele lileendelana asayaansi?

⁵ Kuli twaambo tunji ncotweelede kulisyoma Bbaibbele kuti ndi Jwi lya Leza ncobeni. Ikaambo kakusaanguna nkakuti, Ibbaibbele lileendelana asayaansi. Muciindi cansiku, ibantu munyika yoonse bakali kuyeeya kuti nyika yakakkede atalaa cintu cimwi. Mucikozyanyo, ku West Africa bantu kaindi bakali kusyoma kuti nyika iikkede atalaa nzoka iilizingide makata-makata ziindi zili 3,500 atalaa nyika alimwi aziindi zili 3,500 aansi. Nokuba boobo, kweendelanaa bwaamba sayaansi, imulembi wa Bbaibbele wakalemba myaka iinda ku 3,500 kuti Leza “wakaanzika nyika aatakwe cintu.”—Jobo 26:7, BT.

6. Ino kaambo nzi kapati kasinizya kuti Bbaibbele lizwa kuli Leza?

⁶ Ikaambo kapati kasinizya kuti ncobeni Bbaibbele lizwa kuli Leza ninzila iilondokede mbolisinsima zyakumbele. Ikwiimpana amizimo, Leza ulizyi zyakumbele; kufwumbwa ncaamba cilacitika ncobeni.

7. Mbusinsimi nzi bumwi bwamu Bbaibbele bwakazuzikizyigwa lyansiku?

⁷ Myaanda-myaanda yabusinsimi bwa Bbaibbele yakazuzikizyigwa muziindi zyansiku. Mucikozyanyo, kakucili myaka iili 700, Ibbaibbele lyakaamba kuti Jesu wakali kuyoozyalilwa mumunzi wa Betelehemu alimwi cakacitika mbubwenya oobo. (Mika 5:2; Matayo 2:3-9) Kunze lyabusinsimi bunji bumbi kujatikizya Jesu, Ibbaibbele alimwi lyakasinsima kuti wakali kuyoozyalwa kuli nakalindu alimwi mukuya kwaciindi wakali kuzooabwa amali aansiliva aali 30. Abwalo businsimi oobo bwakacitika ncobeni. Masimpe taakwe naba omwe muntunsi wakali kukonzya kusinsima zintu zili boobo!—Isaya 7:14; Zekariya 11:12, 13; Matayo 1:22, 23; 27:3-5.

8. Mbusinsimi nzi bumwi bwamu Bbaibbele buli mukuzuzikizyigwa sunu, alimwi businizya nzi?

⁸ Businsimi bwamu Bbaibbele bunji buli  mukuzuzikizyigwa muciindi cesu. Mboobu bumwi ibusinsimi:

• “Cisi ciyoobukilana acisinyina [munkondo], bwami buyoobukilana abwaminyina. Kuyooba mizuzumo mipati, [a]nzala [a]zilwazi mumasena aandeene.”—Luka 21:10, 11.

• Kuyooba “kuvula kwamilandu.”—Matayo 24:12.

• “Kumazuba aakumamanino . . . bantu bayooba basikuliyanda, basimuyanda mali, . . . batamvwi bamawisi, . . . batalyeendele[zyi], basitunyetunyetu, batayandi bubotu, . . . basikulisumpula, bayandisya misalo yaansi kwiinda Leza.”—2 Timoteo 3:1-5.

Sena tamuzumini kuti zintu zili boobo zili mukucitika sunu? Ikululama alimwi akusyomeka kwabusinsimi bwamu Bbaibbele kutondezya kuti Ibbaibbele talili bbuku-bbuku buyo pe. Ndi Jwi lyakasololelwa a Leza!—2 Timoteo 3:16.

9, 10. Ino ncinzi citondezya kuti Leza kunyina naazumizya bantu kuti bacince Bbaibbele?

⁹ Atweezeezye kuti mulijisi fakitali yanu alimwi akuti mwanamatika debelwa lyamilawo kubwanda njobeelede kutobela babelesi banu. Ncinzi ncomukonzya kucita ikuti naa basinkondonyoko bamwi baicinca milawo njomwakalembede? Sena inga tamukooyilulamika eeyo njibakacinca? Mbubwenya buyo, Leza tazumizyi bantu kucinca kasimpe ka Jwi lyakwe, Ibbaibbele.

¹⁰ Aabo ibasola kucinca njiisyo zijanika mu Jwi lya Leza taakwe nobazwidilila pe. Notweezyanisya Bbaibbele ndyotujisi sunu alimwi amakkopi akaindi aa Bbaibbele, tujana kuti zyeelene buyo. Eeci citondezya kuti, Ibbaibbele taakwe nolyacincwa mumyaka yainda.