AAKUKKALA Twamulomba kuti mubabikkile maano bamwi. Amuzyibe kuti inga mwajatila buyo busena bwabantu mbomwaboola limwi mumootokala, banamukwasyi naa aabo mbomwiiya limwi Bbaibbele. Twamulomba kuti mutabikki zintu mumasena ngomwatajatila.

BASIKUGWASYILIZYA Basikugwasyilizya nkobali kutegwa bamugwasye. Twamulomba kuti mubelekele antoomwe ambabo akutobela nzyobamwaambila kujatikizya kwakusiya myootokala, kwakunjilila akwakuzwida, kujatila zyuuno, alimwi amutwaambo tumbi.

FIRST AID Dipatimenti eeyi ilanganya buyo ntenda zyacibukilambuta.

LUBBAPATIZYO Kuyoobikkwa zyuuno zyabasikubbapatizyigwa kumbele lyacibumbili. Mu Buzuba Bwabili mafwumofwumo, basikubbapatizyigwa beelede kuti kabakkede abusena mpobabambilidwe kaatanatalika makani aalubbapatizyo. Umwi aumwi weelede kuletelezya taulu yakulipukutizya alimwi azisani zyabulemu zyakusama ciindi nabbapatizyigwa.

MULIMO WAKULISUNGULA Kuti mwalisungula kugwasyilizya mumulimo uujatikizya muswaangano, amubonane abamudipatimenti eeyi.

ZISWEEKA Ikuti mwabwezela cintu, mweelede kucitola ku Dipatimenti Yazisweeka. Ikuti naa mwasweekelwa cintu cili coonse, amuunke kudipatimenti eeyi. Ikuti bana basweeka, beelede kutolwa kudipatimenti eeyi. Nokuba boobo, kutegwa tutabapenzyi ibajatikizyidwe, twamulomba kuti mubalanganye bana banu alimwi akuba ambabo lyoonse.

ZYAKUSANGA Kwabelesyegwa mali manji mukujana busena bwakukkala, zyaambawido, mincini yakutondezya mavidiyo alimwi akucita milimo minji iipa kuti kujanika kumuswaangano cibe cintu cikkomanisya alimwi icitugwasya kuba acilongwe a Jehova. Ikusanga nkomucita cakulisungula kulagwasya kubbadelela zintu eezyi alimwi akugwasyilizya mumulimo wanyika yoonse. Tubbokesi twakusangila itulembedwe tulibikkidwe abusena obuno. Mulakonzya kusanga alimwi kwiinda mukubelesya donate.pr418.com. Kusanga kuli koonse kulalumbwa kapati. Bamu Kabunga Keendelezya balamulumba akaambo kabwaabi bwanu mukusumpula mulimo wa Bwami.

Cikolo Cabakambausi ba Bwami Bapainiya ibajisi myaka yakuzyalwa iili akati ka 23 a 65 ibayanda kuyungizya mulimo wabo, batambwa kujanika kumuswaangano wabasikulembela ku Cikolo Cabakambausi ba Bwami ciindi cakulyookezya mu Buzuba Bwatatu. Iciindi alimwi abusena ziyakwaambilizyigwa.