CIIYO 57
Jehova Watuma Jeremiya Kuyookambauka
Jehova wakasala Jeremiya kuba musinsimi kuba Juda. Wakamwaambila kuti abakambaukile bantu akubacenjezya kuti baleke kucita zintu zibi. Jeremiya wakaamba kuti: ‘Jehova, mebo ndili mwana muniini. Tandikonzyi kwaambaula kumbele lyabantu.’ Jehova wakamwaambila kuti: ‘Utayoowi pe. Ndilakwaambila ncoyelede kucita. Ndilakugwasya.’
Jehova wakaambila Jeremiya kuti abweze baalu akupwaya nongo yabulongo boonse kabalangilila, akwaamba kuti: ‘Jerusalemu uyoopwayaulwa mbubwenya oobu.’ Ciindi Jeremiya naakacita ncaakaamba Jehova, baalu bakanyema kapati. Mupaizi wazina lya Pasuri wakamuuma Jeremiya akumubikka muziliba. Masiku oonse, Jeremiya tanaakali kukonzya kuputauka. Buzuba bwakatobela, Pasuri wakamwaangulula. Mpoonya Jeremiya wakaamba kuti: ‘Ndasubuka. Ndilacileka kukambauka.’ Pele sena wakacileka ncobeni? Peepe. Ciindi Jeremiya naakazinzibala kuyeeya kujatikizya makani aaya, wakaamba kuti: ‘Mulumbe wa Jehova uli mbuli mulilo wajalilwa mumafwuwa aangu. Tandikonzyi kuleka kukambauka.’ Jeremiya wakazumanana kubacenjezya bantu.
Nokwakainda myaka minji, kwakaba mwami mupya mu Juda. Bapaizi alimwi abasinsimi bakubeja tiibakali kuuyanda mulumbe wa Jeremiya. Bakaambila basilutwe kuti: ‘Mwaalumi ooyu weelede kujaigwa.’ Jeremiya wakaamba kuti: ‘Ikuti mundijaye, mulajaya muntu uutakwe mulandu. Ndaamba majwi aa Jehova kutali aangu.’ Basilutwe nobakamvwa boobo, bakaamba kuti: ‘Mwaalumi ooyu tayelede kujaigwa.’
Jeremiya wakazumanana kukambauka, aboobo basilutwe bakanyema kapati. Bakaambila mwami kuti amujaye Jeremiya. Mwami wakabaambila kuti balakonzya kumucita kufwumbwa ncobayanda Jeremiya. Bakabweza Jeremiya akumusowela mumugoti mulamfwu, imwakali mankandya kabayeeya kuti ulafwida mumo. Jeremiya wakatalika kubbila mumankandya.
Kumane mwaalumi iwakajisi cuuno caatala wazina lya Ebedi-meleki wakaambila mwami kuti: ‘Basilutwe bamusowela mumugoti Jeremiya! Ikuti tutamugwisyi, ulafwa.’ Mwami wakalailila Ebedi-meleki kuti abweze baalumi bali 30 kutegwa bakamugwisye Jeremiya mumugoti. Sena tatweelede kuba mbuli Jeremiya, iwatakazumizya cintu cili coonse kuti cimulesye kukambauka?
“Muyoosulwa abantu boonse akaambo kazina lyangu, pele ooyo uuliyumya kusikila kumamanino uyoofwutulwa.”—Matayo 10:22
Andiza Inga Mwaakkomanina Ayaaya
AMUBAYIISYE BANA BANU
Jeremiya Tanaakaleka Kwaambila Bantu Kujatikizya Jehova
Nokuba kuti bantu bakali kumufwubaazya alimwi akumunyemena, nkaambo nzi Jeremiya ncaakazumanana kwaamba makani aajatikizya Leza?
MAVIDIYO AANTALISYO AAMABBUKU AAMU BBAIBBELE
Makani Aantalisyo Aabbuku lya Jeremiya
Jeremiya wakazumanana kusyomeka mumulimo wakwe nokuba kuti wakajana buyumuyumu. Amubone ziiyo nzyobakonzya kwiiya Banakristo bamazuba aano.
ZYAKUCITA ZIJATIKIZYA KWIIYA BBAIBBELE
Amukakatile Kuzyintu Nzyomusyoma!
Amwiiye cakagwasya Jeremiya kwaamba mulumbe wakucenjezya kuba Juda.
