Kakwiindide myaka iili 400 kuzwa ciindi bwaanda bwa Jerusalemu nobwakayakululwa, mupaizi wazina lya Zekariya alimwi amukaintu wakwe Elizabeta bakali kukkala munsi-munsi amunzi ooyu. Bakalikwetene kwamyaka minji pele tiibakajisi bana. Bumwi buzuba ciindi Zekariya naakali kutuula tununkilizyo mutempele, mungelo Gabriyeli wakalibonya. Zekariya wakayoowa kapati, pele Gabriyeli wakati: ‘Utayoowi pe. Ndakuletela makani mabotu kuzwa kuli Jehova. Mukaintu wako Elizabeta uyoozyala mwana musankwa, ooyo ngoyakuulika zina lya Johane. Jehova wamusala Johane akumupa mulimo waalubazu.’ Zekariya wakabuzya kuti: ‘Ino inga ndakusyoma buti? Mebo amukaintu wangu tulicembeede kapati cakuti tatukonzyi kuba amwana.’ Gabriyeli wakaamba kuti: ‘Ndatumwa a Leza kuti ndikwaambile makani aaya. Pele akaambo kakuti tiiwandisyoma, ulacileka kwaambaula mane kusikila mwana akazyalwe.’

Zekariya wakakkala mutempele kwaciindi cilamfwu kwiinda lyoonse. Aboobo ciindi naakazwa, bantu ibakali kumulindila anze bakali kuyanda kuzyiba ncaamukila. Pele Zekariya tanaakali kwaambaula. Wakali kutambaika buyo amaanza. Mpoonya bantu bakazyiba kuti Zekariya watambula mulumbe kuzwa kuli Leza.

Tiilyakalampa, Elizabeta wakamita akuzyala mwana musankwa, mbubwenya buyo mungelo mbwaakaambide. Beenzinyina alimwi abacibbululu bakaboola kubona mwana. Bakakkomana kapati. Elizabeta wakaamba kuti: ‘Zina lyakwe ngu Johane.’ Pesi balo bakati: ‘Mumukwasyi wako kunyina uulikidwe zina lya Johane. Komuulika kuti Zekariya, izina lyabausyi.’ Pele Zekariya wakalemba majwi aakuti: ‘Izina lyakwe ngu Johane.’ Kuzwa kuciindi eeco, Zekariya wakatalika alimwi kwaambaula! Makani aajatikizya mwana ooyu akamwaika mu Judaya moonse, alimwi bantu bakatalika kulibuzya kuti: ‘Ino ooyu uyooba mwana uuli buti?’

Mpoonya Zekariya wakazula muuya uusalala. Wakasinsima kuti: ‘Aatembaulwe Jehova. Wakasyomezya Abrahamu kuti uyootuma mufwutuli, nkokuti Mesiya, uuzootufwutula. Johane uyooba musinsimi alimwi uyoobamba nzila ya Mesiya.’

 Cintu cimwi caalubazu cakamucitikila awalo Mariya mubbululu wa Elizabeta. Atucilange-lange eeco mucibalo citobela.