Ncolyaamba Bbaibbele

Ino Caamba nzi Kuti Mulumi Ngomutwe?

MUZISI zinji izintu zicitwa ciindi cabwiinga zilabikkilizya akukonka kucitwa anabwiinga nasyomezya kuti unoomumvwida mulumi wakwe. Nokuba boobo, banakazi banji tabauyandi muzeezo wakuti mulumi ngomutwe wabo mulukwatano. Amulange-lange ncoliyiisya Bbaibbele kujatikizya makani aaya. Mulajana kuti ncolyaamba Bbaibbele ncamaanu alimwi cilagwasya.

Busilutwe Kweelana Ambwaamba Leza

Ibupanduluzi bwamu Bbaibbele buyandika kujatikizya busilutwe bulajanwa ku Ba-Efeso 5:22-24 nkotubala kuti: “Nubanakazi, amulibombye kubalumi banu mbuli mbumulibombya kuli-Leza. Nkaambo  mulumi ngumutwe wamukakwe, mbubonya mbuli Kristo mbwali mutwe wambungano, . . . Pele mbuli mbungano mbwiilibombya kuli-Kristo, abalo banakazi mbubonya baleelede kulibombya kubalumi babo muzintu zyoonse.” Mbwali ‘mutwe wamukaintu,’ mulumi weelede kusololela mumukwasyi, alimwi mukaintu weelede kutobela busolozi bwakwe akulemeka busilutwe bwakwe.—Ba-Efeso 5:33.

Bweendelezi bwamulumi kuli mpobujinkila nkaambo awalo weelede kulibombya kuli Leza a Kristo. Tajisi nguzu zyakulailila mukaintu wakwe kutyola milawo ya Leza naa kutamvwida manjezeezya aakwe aayiisyidwe njiisyo zyamu Bbaibbele. Pele mubweendelezi oobu mbwapedwe, Leza wapa mulumi mukuli wakusalila mukwasyi wakwe zintu ziyandika kapati.—Ba-Roma 7:2; 1 Ba-Korinto 11:3.

Ibbaibbele lilailila mulumi kuba silutwe uutaliyandi, uubikkila maanu kapati kuzintu nzyayandika mukaintu wakwe kwiinda zyakwe. Lugwalo lwa Ba-Efeso 5:25 lwaamba kuti: “Anywebo nobalumi, amuyande banakazi banu, mbuli Kristo mbwaakayanda imbungano akulyaaba nkaambo kanjiyo.” Imulumi uutobela cikozyanyo cibotu ca Kristo caluyando takabelesyi busilutwe bwakwe kuligwasya buyo lwakwe mwini pe.

Kunze lyaboobo, Ibbaibbele lilailila mwaalumi kukkala amukaintu wakwe “kweelana aluzibo.” (1 Petro 3:7, NW) Eeci caamba zinji kunze buyo lyakuzyiba kwiimpana kuliko mubwaanze ambobalimvwa baalumi abanakazi. Weelede kuzyiba zintu nzyayandika mukaintu wakwe.

“Ngumweenzinyoko”

Sena kulibombya kwamukaintu kuyandika kuti kaumuna buyo lyoonse? Amulange-lange Sara, ooyo mu Bbaibbele waambwa kuti ncikozyanyo cibotu camukaintu wakali kumvwida mulumi wakwe Abrahamu. (1 Petro 3:5, 6) Wakali kulibombya kumulumi wakwe mumakani mapati amasyoonto, imapati mbuli kulisungula kusiya ŋanda mbotu akutalika kupona buumi bwakutuntulika mumatente alimwi imasyoonto mbuli kubamba cakulya cabeenzu batakali kulangilwa. (Matalikilo 12:5-9; 18:6) Pele kujatikizya makani mapati amwi, lyoonse wakali kwaamba nzyaakali kuyeeya izyakaimpene anzyaakali kuyeeya Abrahamu. Eeci cakacitika naakali kuyanda kuti Abrahamu atande simamambe wakwe Hagare, amwanaakwe musankwa wakusaanguna Ismayeli mumukwasyi. Leza wakalailila Abrahamu kuti ‘aswiilile jwi lya Sara’ muciindi cakuti amunyemene. Kulubazu lumwi, Sara wakazumanana kulibombya kuli Abrahamu kwiinda mukumulindila kucita ncaakalaililwa muciindi cakutanda Hagare a Ismayeli lwakwe.—Matalikilo 21:8-14.

Cikozyanyo ca Sara citondezya kuti mukaintu weelede kuba ‘mweenzinyina’ wamulumi, weelede kulemekwa muciindi cakwiile kutobela buyo caamba mulumi. (Malaki 2:14) Mbwali mweenzinyina, ulapa mizeezo iigwasya alimwi ulijisi nguzu zili mbozibede mumukwasyi, ibunji bwaziindi nguulanganya zintu zyamuŋanda kubikkilizya azimwi zijatikizya bweende bwamali. Pele mbwali mutwe wamukwasyi, mulumi nguujisi mukuli wakukosola makani.—Tusimpi 31:10-31; 1 Timoteo 5:14.

Kulemeka Sikwaanza

Jehova Leza wakalenga mwaalumi amwanakazi, alimwi nguwakaanza lukwatano lusalala akati kabo. (Matalikilo 2:18-24) Alimwi wakapa mulumi amukaintu mikuli iigaminide iinga yabapa kukkomana kapati.—Deuteronomo 24:5; Tusimpi 5:18.

Mbwali Sikwaanza lukwatano, Jehova nguuelede alimwi nguujisi nguzu zyakupa zyeelelo zyeelede kutobelwa mulukwatano. Leza ulabakkomanina akubagwasya banabukwetene ibazuzikizya mikuli yabo akutobela bubambe bwakwe bujatikizya busilutwe ikutali buyo kuti nkaambo bulagwasya pele akaambo kakulemeka bweendelezi bwakwe.

SENA KULI NOMWAKABUZYIDE KUTI?

▪ Nguni wakapa cikozyanyo cilondokede cabusilutwe?—Ba-Efeso 5:25.

▪ Sena bweendelezi mbwapede Leza kumulumi kuli mpobujinkila?—1 Ba-Korinto 11:3.

▪ Ino lukwatano abubambe bwabusilutwe zijisi mulimo nzi?—Tusimpi 5:18.

[Cifwanikiso icili apeeji 18]

Ibusilutwe bucitwa kweelana acikozyanyo ca Kristo bupa kuti banabukwetene kabakkomana