Ino Leza A Kristo Bababona Buti Banakazi?

INO inga twazyiba buti kabotu mbwababona Jehova Leza banakazi? Inzila imwi nkwiinda mukulanga-langa mbwabede ambwalilemeka Jesu Kristo, mbwali “cikozyano ca-Leza uutabonwi” alimwi uuiya Leza munzila iilondokede kujatikizya mbwazibona zintu. (Ba-Kolose 1:15) Mbwaakali kweendelezya banakazi Jesu kali anyika kutondezya kuti Jehova a Jesu balabalemeka banakazi akuti kunyina nobakukkomanina kudyaaminina alunya ludumide kapati muzisi zinji sunu.

Mucikozyanyo, amuyeeye ciindi Jesu naakaambaula amwanakazi kumugodi. Imakani Mabotu ngaakalemba Johane aamba kuti: “Kwakeza mwanakazi mu-Samariya kuzooteka maanzi. Jesu wakamwaambila kuti, Ndipa nywe.” Jesu wakalilisungwide kwaambaula amwanakazi muna Samariya antangalala, nokuba kuti ibunji bwaba Juda kunyina nobakali kulyatana abana Samariya. Ikweelana abbuku litegwa The International Standard Bible Encyclopedia, “ikwaambaula amwanakazi mubuleya cakali cintu camasampu kapati” kuba Juda. Pele Jesu wakali kubalemeka akubabikkila maanu banakazi alimwi kunyina naakali kusalaula nkaambo kamusyobo naa nkaambo mmwanakazi. Mukwiimpana, nkuumwanakazi muna Samariya Jesu nkwaakalipandulula cakutainda mumbali ciindi cakusaanguna kuti wakali Mesiya.—Johane 4:7-9, 25, 26.

Aciindi cimbi Jesu wakasikilwa mwanakazi ooyo kwamyaka iili 12 wakali kuciswa bulwazi bwakalobola buusya nsoni alimwi bumana nguzu. Mbwaakamugumina buyo, wakapona. “Lino Jesu wakacebuka, wakamubona, wakaamba kuti, Mwanaangu, sekaseka, lusyomo lwako lwakufutula.” (Matayo 9:22) Ikweelana a Mulawo wa Musa,  imwanakazi wakali kuciswa kalobola tanaakeelede kuba akati kabantu, nokuba kusola kubaguma. Nokuba boobo, Jesu kunyina naakamubwentela pe. Muciindi caboobo, caluzyalo wakamuumbulizya akumwaamba kuti “mwanaangu.” Ikumwiita boobo kweelede kuti kwakamupa kukatalukwa akulikwaya kapati! Alimwi kweelede kuti Jesu wakakkomana kapati kuti wakamuponya!

Jesu naakabusigwa, nkwaakasaanguna kulibonya nkuuli Mariya Magadalene akuli umwi wabasikwiiya bakwe Bbaibbele ngolyaamba kuti “Mariya umwi.” Jesu wakali kukonzya kulibonya lutaanzi kuli Petro, Johane, naa kuli umwi wabasikwiiya bakwe baalumi. Muciindi caboobo, wakabalemeka banakazi kwiinda mukubapa kuba bakamboni bakusaanguna kulibonena ameso kubuka kwakwe. Imungelo wakalailila banakazi aaba kuti bakaambile basikwiiya ba Jesu baalumi kujatikizya cakacitika eeci cigambya. Jesu wakaambila banakazi kuti: “Kamuya, mwaambile bakwesu.” (Matayo 28:1, 5-10) Masimpe kunyina Jesu naakayungwa akusalulula kwakadumide akati kaba Juda bakuciindi ncaakali kupona, ibanakazi nobakali kukasyigwa kuba bakamboni munkuta.

Aboobo, muciindi cakubabona kuti mbabi naa kuzumina mizeezo yakuti baalumi mbabotu kwiinda banakazi, Jesu wakatondezya kuti wakali kubalemeka banakazi akubabona kuti bali ampindu. Kutundulula banakazi tiikwakaswaangene abuniini anzyaakayiisya Jesu alimwi tulisyomede kuti zintu wakazicita mbuli Jehova, Bausyi mbaakali kwiiya munzila iilondokede.

Mbobabede Banakazi Mbalanganya Leza

“Kunyina mucooko ca Mediterranean naa Asia nkoili kumbo ibanakazi nkobakaangulukide mbobaangulukide lino muzisi zyabukuwa. Izyakali kusyomwa kapati nzyakuti banakazi bakeelede kulibombya kubaalumi mbubwenya bazike mbubakali kulibombya kuli basimalelo, ambuli bana mbubalibombya kubapati. . . . Bana balombe bakali kuyandwa kapati kwiinda basimbi, alimwi bana basimbi bavwanda zimwi ziindi bakali kusiigwa mumasena mabyaabi kutegwa balifwide.” Oobo mbolyaamba bbuku limwi lipandulula Bbaibbele kujatikizya mbobakali kubonwa banakazi insiku. Munzila zinjaanji, bakali kubonwa mbuli bazike.

 Ibbaibbele lyakalembwa kuciindi nozyakali kucitika zilengwa eezi. Nokuba boobo, mulawo wa Leza uuli mu Bbaibbele wakatondezya kuti banakazi beelede kulemekwa kapati, icintu cakaindene kapati azilengwa zinji zyabukkale bwakaindi.

Mbwabikkila maanu Jehova kubukkale bwabanakazi kulalibonya twalanga-langa ziindi zili mbozibede naakagwasya bakombi bakwe banakazi. Ziindi zyobile wakanjilila kutegwa akwabilile mukaintu wa Abrahamu mubotu Sara kuti atajatwi. (Matalikilo 12:14-20; 20:1-7) Leza wakamugwasya Leya, imukaintu wa Jakobo ngwaatakali kuyandisya kwiinda ‘mukujula zyalilo lyakwe,’ aboobo wakazyala mwana mulombe. (Matalikilo 29:31, 32) Basikutumbusya ibana Israyeli bobile bayoowa Leza nibakalibikka muntenda akaambo kakukwabilila bana babana Hebrayo balombe kukujaigwa mu Egepita, Jehova “wakabacitila inzubo” kutondezya kuti wakacikkomanina ncobakacita. (Kulonga 1:17, 20, 21) Alimwi wakawiingula mupailo wa Hana uusitikide. (1 Samuele 1:10, 20) Kunze lyaboobo, mukamufwu wakakwetwe kumusinsimi naakapenzyegwa asizikoloto wakali kuyanda kutola bana bakwe kuti babe bazike bakwe kutegwa babbadele cikoloto, Jehova tanaakamulekelezya mupenzi eelyo. Muluyando, Leza wakapa kuti musinsimi Elisha avwuzye mafwuta aamukaintu ooyo kutegwa abbadele cikoloto alimwi akusyaala amafwuta aakkwana mukwasyi wakwe. Aboobo wakafwutula mukwasyi wakwe alimwi wakacili abulemu mwini.—Kulonga 22:22, 23; 2 Bami 4:1-7.

Iziindi zinji basinsimi bakakukasya kucitila banakazi zintu calweeno naa kubatundulula. Muzina lya Jehova, imusinsimi Jeremiya wakaambila bana Israyeli kuti: “Amubeteke cakululama, amuvune uubbididwe mumaanza aasikubba; mutapenzyi nikuba kubisizya mweenzu amucaala amukamufu, alimwi mutatili bulolwa bwabaabo batakwe milandu mubusena obuno.” (Jeremiya 22:2, 3) Musyule, ibavwubi abasinguzu mu Israyeli bakanyemenwa akaambo kakutanda banakazi mumaanda aabo akupenzya bana babo. (Mika 2:9) Kupenga kuli boobu ikucitilwa banakazi abana babo ulikubwene Leza sibululami alimwi nkubi kapati kulinguwe.

“Mwanakazi Mubotu”

Inzila yeelede mbwayelede kulangwa mukaintu mubotu ilaambwa amulembi wansiku wabbuku lya Tusimpi. Mbwaanga bupanduluzi oobu bubotu bujatikizya mulimo ambwayelede kubonwa mwanakazi bwakabikkilizyigwa mu Jwi lya Jehova, tweelede kusyoma kuti ulabukkomanina. Muciindi cakudyaamininwa naa kubonwa kuti unyina mpindu, imwanakazi uuli boobo ulayandwa, ulalemekwa alimwi akusyomwa.

“Mukaintu mubotu” waambwa ku Tusimpi caandaano 31 mmubelesi munkutwe. Ulabeleka canguzu milimo “amaanza masungu” alimwi ulacita makwebo mane akuula ŋanda alimwi anyika. Ulabona muunda akuula. Ulatunga zisani akuzyuuzya. Ulapa inkumba kubasambazi. Ucita zintu anguzu zyakwe zyoonse. Kunze lyaboobo, imajwi aakwe aabusongo aluzyalo lwakwe nzintu ziyandika kapati. Aboobo, ulayandwa kapati amulumi wakwe, bana bakwe alimwi kwiinda boonse, ulayandwa a Jehova.

Banakazi tabeelede kudyaamininwa abaalumi babacitila zintu zibyaabi, mbuli kubasampaula naa kubatundulula munzila iili yoonse. Muciindi caboobo, imwanakazi uukwetwe weelede kuba ‘sikugwasya’ mulumi uukkomene alimwi uucibwene.—Matalikilo 2:18.

 Amubalemeke

Naakali kulembela balumi Banakristo kujatikizya mbobakeelede kweendelezya bamakaintu babo, Petro imulembi wakasololelwa a Leza wakakulwaizya balumi kwiiya Jehova a Jesu Kristo. Wakalemba kuti: “Anywebo nobalumi, . . . amubalemeke.” (1 Petro 3:7) Kulemeka muntu caamba kumubona kuti uli ampindu kapati. Aboobo, mwaalumi uulemeka mukaintu wakwe kunyina namusampaula, kumubona kuti unyina mpindu nokuba kumuuma. Muciindi caboobo, utondezya kuti ulamukkomanina akumuyanda kapati kwiinda mumajwi aakwe anzyamucitila mubuleya alimwi anobali balikke.

Mmasimpe, ikulemeka mukaintu kuletela lukkomano mulukwatano. Amulange-lange cikozyanyo ca Carlos a Cecilia. Cimwi ciindi mulukwatano lwabo bakali kukazyanya kakunyina kumanizya makani ngobakali kuzwanganina. Zimwi ziindi bakali kwiile kuleka kwaambauzyanya. Tiibakazi mbobakali kunga baamanizya mapenzi aabo. Mulumi wakali mukali; mukaintu wakali kulisumpula akuyanda kupegwa kufwumbwa ceeco ncayanda. Pele nobakatalika kwiiya Bbaibbele akutobela nzyobakali kwiiya, bukkale bwabo bwakatalika kubota. Cecilia waamba kuti: “Ndabona kuti njiisyo zya Jesu acikozyanyo cakwe zyacinca bube bwangu abwamulumi wangu. Akaambo kacikozyanyo ca Jesu, ndaba muntu uulicesya alimwi uumvwida. Ndaiya kulomba lugwasyo kuli Jehova mumupailo, mbubwenya mbwaakacita Jesu. Carlos waiya kutafwambaana kunyema akulyeendelezya—kulemeka mukaintu wakwe mbubwenya Jehova mbwayanda kuti acite.”

Lukwatano lwabo talulondokede, pele lwazumanana kwamyaka minji. Bakajisi mapenzi mapati mumyaka yalino-lino—Carlos wakatandwa mulimo alimwi wakaandulwa nkaambo kabulwazi bwakkansa mbwajisi. Nokuba boobo, mapenzi aaya aluyumya buya lukwatano lwabo muciindi cakulunyonganya.

Kuzwa ciindi bantu nobakabisya akuba batalondokede, banakazi mumisyobo minji bali kusampaulwa kapati. Bali kutundululwa kumubili, mumizeezo amumakani aakoonana. Pele buumi oobo teensyi mbobuumi Jehova mbwaakali kuyanda kuti banakazi kabapona. Ibbaibbele lilatondezya cakusalazya kuti kunyina makani azilengwa zyabukkale zidumide, banakazi boonse beelede kulemekwa akubonwa kuti bali ampindu kapati. Oobu mbwaakabalenga Leza mwini.

[Cifwanikiso icili apeeji 4, 5]

Mwanakazi uucisidwe

[Cifwanikiso icili apeeji 4, 5]

Mwanakazi muna Samariya

[Cifwanikiso icili apeeji 5]

Mariya Magadalene

[Cifwanikiso icili apeeji 6]

Jehova wakakwabilila Sara ziindi zyobile

[Cifwanikiso icili apeeji 7]

Ba Carlos a Cecilia bakali amapenzi mulukwatano

[Cifwanikiso icili apeeji 7]

Ba Carlos a Cecilia mazubaano