Lino-lino Milandu ‘Tiikooyooba Wo’

“Kaba kaindi kaniini sizibi takooyooba wo.”—INTEMBAUZYO 37:10.

MULENGI wesu, Jehova Leza, ulababikkila maanu kapati bantu mbaakalenga; tali kulamfwu ambabo mbuli mbobayeeya bamwi. (Intembauzyo 11:4, 5) Kunze lyaboobo, ulaibona milandu yoonse akutalulama kucitika kubikkilizya akooko nkobataboni bantu. “Meso aa-Jehova ali koonse koonse, alalanga basizibi ababotu boonse.” (Tusimpi 15:3) Aboobo mulakonzya kuba alusyomo lwakuti basizibi bali “mumasena aatezemuka.”—Intembauzyo 73:12, 18.

Pele, baluleme alimwi abaabo balilemeka, nokuba kuti mbacete alimwi balapenzegwa, bajisi bulangizi bubotu kapati. Sintembauzyo Davida wakalemba kuti: “Langisya uuololokede! Bona mululami! Nkaambo muntu siluumuno nguuyoojana coolwe kumamanino.” (Intembauzyo 37:37) Imajwi aaya alakonzya kutuumbulizya kapati mazubaano mbwaanga tujisi bulangizi bwakuti lino-lino ayoozuzikizigwa munyika yoonse mboizulwa.

Tupona Kumazuba Aakumamanino

Imyaka iitandila ku 2,000 yainda, basikwiiya ba Jesu Kristo bakamubuzya mubuzyo wakali kujatikizya zintu zyakumbele. Bakati: “Utwaambile, . . . ncinzi cizooba citondezyo . . . camamanino aaciindi?” (Matayo 24:3) Ibwiinguzi bwa Jesu bulilembedwe kabotu-kabotu mu Bbaibbele mucaandaano 24 ca Matayo, caandaano 13 ca Marko acaandaano 21 ca Luka. Muzibalo eezi zya Makani Mabotu zyotatwe mujanwa makani aamba kuti kumazuba aano aakumamanino  aanyika eeyi kunooli nkondo, nzala, malwazi, mizuzumo yanyika mipati akuvwula kwamilandu.

Bukkale oobu bukatazya mbwaakasinsima Jesu bwakatalika mumwaka wa 1914. Kweelana ambwaakaamba sikwiiya makani aakaindi Eric Hobsbawm mubbuku lyakwe lyakuti Age of Extremes, imwaanda wamyaka wa 20 “masimpe wakali mwaanda wamyaka wiinda yoonse kukutila bulowa.”

Kujatikizya bubi buvwulide mazubaano, Ibbaibbele lyaamba kuti: “Nekuba kuti basizibi balamena mbuli bwizu, aboonse bacita bubi balasyuuka, bayoonyonyoonwa kukabe kutamani.” (Intembauzyo 92:7) Masimpe, cilisalede kuti: Ikuvwula kwamilandu mbuli bwizu bumena ciindi camainza kwamazubaano kutondezya kuti kunyonyoonwa kwabasizibi kuli afwaafwi! Sena aaya taali makani mabotu?—2 Petro 3:7.

“Balulami Bayookona Nyika”

Ilugwalo lwa Intembauzyo 37:29 lwaamba kuti: “Balulami bayookona nyika, bayookala alinjiyo lyoonse.” Ciindi eeco, milandu yoonse alimwi akutalulama ziyooloba. Aboobo tazikabiko limbi zintu zyoonse ziliko mazubaano akaambo kamilandu mbuli: mincini iizibya kuti kwasika babbi, kukkiya zijazyo, nkuta, basimilawo, bamapulisa alimwi antolongo. Ibbaibbele lisyomezya kuti: “Ezyo zyakusaanguna tazikooyooibalukwa limbi nikuba kuyeeyegwa.”—Isaya 65:17.

Ncobeni, kwiinda lyoonse nyika ini kwiigama alimwi abantu bayoocinca cakumaninina munzila iitanabwenwe. (Isaya 11:9; 2 Petro 3:13) Oobo mbobulangizi bwini-bwini mbobajisi Bakamboni ba Jehova, aboobo bamutamba kuti mulibonene bumboni bwakuti lino-lino bulangizi oobu buyoozuzikizigwa. Mutalubi kuti Ooyo wakasololela Magwalo Aasalala “tabeji” pe.—Tito 1:2.

[Kabbokesi/Cifwanikiso icili apeeji 17]

IKUPA LUGWASYO LWAKUMUUYA KUBAANGE

Mumyaka yainda iili mbwiibede, Bakamboni ba Jehova ku United States bakatambula magwalo kuzwa kubantu bali muntolongo, muzibbadela zyabaange azibbadela zigwasya kuleka kubelesya misamu iikola izili 4,169. Ibaange bamwi balomba mabbuku aapandulula Bbaibbele; bamwi balomba ciiyo ca Bbaibbele citabbadelelwi. Bakamboni beelela balabasikila bantu aaba. Mubwini, nyika yoonse mbwiizulwa, lyoonse Bakamboni balaunka muntolongo ikweendelezya ziiyo zya Bbaibbele kubaange, baalumi abanakazi, ibalomba kuti bagwasyigwe kuzyiba Leza amakanze aakwe. Ibanji akati kabaange aaba bacinca kapati, babbapatizyigwa akuba Banakristo, alimwi bazumanana kupona kweelana acaamba milawo.