Mbomunga Mwajana Cikombelo Cakasimpe

Bamwi babuzya kuti: ‘Ikuti kasimpe kazwa kuli Leza kakaliko ncobeni, nkaambo nzi ncondeelede kuvwuntauzya buya kutegwa ndikajane? Ikuti Leza kajisi mulumbe uuyandika kubantu boonse, sena takonzyi kwiile kuumwaya munzila iisalede ikutegwa bantu bauteelele kakunyina buyumuyumu, kakunyina kuvwuntauzya buya?’

MASIMPE Leza ulijisi nguzu zyakucita boobo. Pele sena eeyi njenzila njaasala kuzyibya bantu kasimpe?

Mbwakazyibya Kasimpe Leza

Mubwini, Leza uzyibya milumbe yakwe munzila iipa kuti basikuyandaula kasimpe basinizyide bayilingaule milumbe eeyo. (Intembauzyo 14:2) Mucikozyanyo, amuyeeye mulumbe Leza ngwaakapa kuti musinsimi wakwe Jeremiya aambe kaindi. Mulumbe ooyo wakaambilwa bantu ba Leza bazangi ikujatikizya lunyonyooko lwa Jerusalemu lwakali kuyoocitwa abana Babuloni.—Jeremiya 25:8-11; 52:12-14.

Pele aciindi nciconya eeco, kwakali basinsimi bambi bakali kulyaamba kuti bakatumidwe a Leza. Hananiya wakasinsima kuti kumbele kwakali kuyooba luumuno mu Jerusalemu. Imulumbe ooyo wakaliimpene kapati amulumbe wakapegwa a Jeremiya. Aboobo ino ciindi eeco muntu wakeelede kusyoma ni—Jeremiya naa aabo bakali kumukazya?—Jeremiya 23:16, 17; 28:1, 2, 10-17.

Ikutegwa bazyibe wakaluzi, ba Juda basinizyide bakeelede kumuzyiba bwini mbwabede Jehova. Bakeelede kwiimvwisya milawo yakwe anjiisyo, alimwi akuzyiba mbwakubona kucita zibi. Kwiinda mukucita boobo, nobakaazuminizya majwi aa Leza ngaakaamba kwiinda muli Jeremiya kuti “taakwe naba omwe uuempwa kububi bwakwe.” (Jeremiya 8:5-7) Kunze lyaboobo, nobakazyiba kuti ibukkale oobu bubyaabi bwakali kuyooletela Jerusalemu abantu bamumunzi ooyo mapenzi.—Deuteronomo 28:15-68; Jeremiya 52:4-14.

Ibusinsimi bwa Jeremiya boonse kujatikizya Jerusalemu bwakazuzikizyigwa. Imunzi woonse wakanyonyoonwa abana Babuloni mu 607 B.C.E.

Nokuba kuti izyakali kuyoocitika akaambo kakuzanga zyakasinsimwa kakucili ciindi cilamfwu, kwakali kuyandika kusoleka kuziba kuti eeco cakali ciindi cakuti Leza abweze ntaamu.

Ino Mbuti Kujatikizya Kasimpe ka Bunakristo?

Ino mbuti kujatikizya kasimpe kakaambwa a Jesu Kristo? Sena bantu boonse bakali kukabona kuti wakali mulumbe uuzwa kuli Leza? Peepe. Nokuba kuti Jesu wakali akati kabana Israyeli kabayiisya akucita maleele, ibunji bwabaabo bakamuswiilila tiibakaziba kuti wakali Mesiya—Kristo, naa Munanike wakasyomezegwa.

Iba Farisi ibakabuzya nobwakali kuzoosika Bwami bwa Leza, Jesu lwakwe wakabaambila kuti: “Ukusika kwa-Bwami bwa-Leza takubonwa.” Wakayungizya kuti: ‘Bwami bwa Leza buli akati kanu.’ (Luka 17:20, 21) Jesu, imweendelezi  ngwabikkide Leza, wakali akati kabo! Pele ba Farisi aabo tiibakabuzumina bumboni bwakuti wakali kuzuzikizya businsimi bwakali kutondezya kuti ngu Mesiya alimwi tiibakazumina kuti wakali “Kristo, Mwana a-Leza muumi.”—Matayo 16:16.

Kwakanyina kwiimpana ambobakakabona bantu kasimpe kakaambwa abasikwiiya ba Kristo bamumwaanda wamyaka wakusaanguna. Nokuba kuti maleele akagwasya kutondezya kuti Leza nguwakali kugwasya basikwiiya, pele kasimpe kunyina nokaazibwa abantu banji. (Incito 8:1-8; 9:32-41) Jesu wakapa batobeli bakwe mulimo ‘wakugwasya bantu kuba basikwiiya’ kwiinda mukubayiisya. Kwiinda mukuswiilila akwiiya kasimpe kamu Magwalo, basikuyandaula kasimpe basinizyide bakasyoma.—Matayo 28:19; Incito 5:42; 17:2-4, 32-34.

Ncimwi buyo asunu. ‘Makani mabotu aabwami alakambaukwa munyika yoonse kuti abe citondezyo kumisyobo yoonse.’ (Matayo 24:14) Eeci tacicitiki ‘munzila iigambya’—munzila iilibonya caantangalala cakuti bantu boonse anyika balakonzya kwaazyiba kuti mmulumbe uuzwa kuli Leza. Nokuba boobo, cilakonzyeka kukaziba kasimpe ka Leza alimwi kalabanjila bantu babombemyoyo ibayanda kukomba Leza munzila njakkomanina.—Johane 10:4, 27.

Ikubala magazini eeyi iipandulula Bbaibbele nkomucita kutondezya kuti muli sikuyandaula kasimpe uusinizizye. Ino inga mwacizyiba buti cikombelo ciyiisya kasimpe?

Inzila Iibeleka

Bantu bamu Bereya bamwi mumwaanda wamyaka wakusaanguna wakabalumbaizya mwaapostolo Paulo kujatikizya mbobakacita naakali kubayiisya. Kunyina nobakazizumina ndilyonya kuti zyakali zyamasimpe nzyaakaamba Paulo; pele bakamuswiilila cabulemu. Kuli ciiyo ncotwiiya kujatikizya nzyobakacita bantu bamu Bereya nobakamana kumvwa mulumbe.

Ibbaibbele lipandulula kuti: “Abakooko [ku Bereya] bakaliluleme kwiinda abo baku-Tesalonika, nkaambo bakatambula makani emyoyo ilibambide kabotu, balalingula Magwalo mazuba oonse, kubona kuti na zintu ezi mbozibede. Nkaako banjibanji babo bakasyoma.” (Incito 17:10-12) Aboobo ikuvwuntauzya kwabo tiikwakali kwaatala-tala buyo pe. Kunyina nobakali kulangila kwaakosola makani mumibandi misyoonto buyo a Paulo.

Alimwi amubone kuti bana Bereya “bakatambula makani emyoyo ilibambide kabotu.” Eeci citwaambila mbobakakubona kwiiya Magwalo nkobakali kucita. Kunyina nobakaide kazisyoma nanka kuzikaka zyoonse nzyobakali kwaambilwa kakunyina kuziyeeyela lutaanzi. Tiibakazikazya pe nzyaakali kupandulula Paulo, iwakali kwaambilizya mulumbe wa Leza.

Alimwi amuciyeeyele eeci: Cakali ciindi cakusaanguna kubantu baku Bereya ikumvwa makani aajatikizya Bunakristo. Akababotela  makani aayo, pele ambweni akabotesya cakuti cakabayumina kwaasyoma. Nokuba boobo, muciindi cakwaakaka, bakalingula Magwalo cakusitikila, kabalanga-langa kutegwa bazyibe ‘naa zintu nzyaakali kwaamba Paulo zyakali zyamasimpe.’ Alimwi amubone kuti, aabo ibakalomya kuvwuntauzya mu Bereya alimwi amu Tesalonika bakasyoma. (Incito 17:4, 12) Kunyina nobakacilekela munzila akuyeeya kuti tacikonzyeki kujana kasimpe. Bakacizyiba cikombelo cakasimpe.

Mbokabanjila Bantu Kasimpe

Muntu najana kasimpe, mbubwenya bwakacita bantu baku Bereya, ukulwaizigwa kukaambila bamwi cabusungu. Bamwi balakonzya kucikazya eeci, kabasyoma kuti citondezya kulicesya kuyeeya kuti zikombelo zimbi zilakonzya kaziluzi azyalo. Pele muntu woonse uujana kasimpe kamu Bbaibbele uba alusyomo luyumu mukasimpe aako. Kunyina nadooneka naa cilakonzyeka kukajana kasimpe alimwi naa zikombelo zyoonse zisololela kulufwutuko. Pele ikutegwa tukajane kasimpe, kusaanguna tweelede kuvwuntauzya cakusitikila, calo ciyandika kulicesya ncobeni.

Bakamboni ba Jehova bakacita kale oobo. Nkekaambo kaako ncobasyoma kuti bakacijana cikombelo cakasimpe. Alimwi bamutamba kuti muvwuntauzye mu Magwalo ikutegwa mubazyibe aabo bacita zyeendelana acikombelo cakasimpe sunu. Nokuba kuti nzinji zijatikizyidwe kunze buyo lyamulongo watwaambo, imakani aajatikizya Banakristo bamumwaanda wamyaka wakusaanguna aali mukabbokesi apeeji eeli alakonzya kumupa ntalisyo mbotu.

Kwiinda mukuzumina ciiyo ca Bbaibbele caaŋanda citabbadelelwi a Bakamboni ba Jehova, mulakonzya kuvwuntauzya munzila iisitikide cini ncoliyiisya Bbaibbele. Ikwiiya cini ncolyaamba Bbaibbele kuyoomugwasya kuzyiba cikombelo cakasimpe.

[Kabbokesi kali apeeji 31]

Izizyibya Cikombelo Cakasimpe

Amulange-lange nzyobakali kucita anjiisyo zya Banakristo bamumwaanda wamyaka wakusaanguna:

▪ Bakali kutobela busolozi bwa Jwi lya Leza.—2 Timoteo 3:16; 2 Petro 1:21.

▪ Bakali kuyiisya kuti Jesu wakali Mwana wa Leza, waandeene a Leza mwini alimwi uulibombya kuli Leza.—1 Ba-Korinto 11:3; 1 Petro 1:3.

▪ Bakali kuyiisya kuti bafwide bayooba baumi alimwi kwiinda mububuke.—Incito 24:15.

▪ Cipati cakabazyibya nduyando ndobakajisi akati kabo.—Johane 13:34, 35.

▪ Muntu amuntu tanaakali kukomba munzila yakwe mwini pele bakalikamantene mumbungano akusololelwa abalangizi alimwi akabunga kabaalu ikakali kutobela Jesu Simutwe wabo.—Incito 14:21-23; 15:1-31; Ba-Efeso 1:22; 1 Timoteo 3:1-13.

▪ Bakali basungu kukambauka Bwami bwa Leza kuti mbobulangizi bwabantu bulikke. —Matayo 24:14; 28:19, 20; Incito 1:8.

[Cifwanikiso icili apeeji 29]

Ino bantu bakali kunoozyiba buti kuti Jeremiya wakali musinsimi mwini-mwini bamwi nobakali kumukazya?

[Zifwanikiso izili apeeji 30, 31]

Bantu baku Bereya mumwaanda wamyaka wakusaanguna bakamuswiilila Paulo pele alimwi bakaalingula Magwalo kutegwa basinizye kuti nzyaakali kwaamba nzyamasimpe

[Zifwanikiso izili apeeji 30, 31]

Ikwiiya Bbaibbele cakusitikila kulakonzya kumugwasya kuzyiba kasimpe kabukombi