Bakubusi Balabuzya

Mbuti Mbondikonzya Kuliyumya Ikuti Kandiciswa?

ILUGWALO lwa Tusimpi 20:29 lwaamba kuti: “Bulemu bwabakubusi ninguzu zyabo.” Ikuti naa ulaciswa naa ulilemene, ulakonzya kuyeeya kuti lugwalo oolu talukonzyi kwaamba nduwe. Pele lulakonzya kalwaamba nduwe! Ibwini mbwakuti, bakubusi banji balemene alimwi ibajisi malwazi aatasilikiki bacikonzya kuliyumya mumapenzi mapati. Balembi ba Sinsimuka! bakabuzya-buzya bakubusi bone bali mubukkale buli boobo.

Hiroki, wakucisi ca Japan, wakazyalwa abulwazi bwa cerebral palsy bupa kuti cibeela cabongo bwakwe ceendelezya milambi kacitabeleki kabotu. Waamba kuti: “Milambi yamunsingo tiibeleki kabotu cakunga cilandaalila kulungumika mutwe akweendelezya maanza aangu. Lyoonse ndisyoma bamwi kundigwasya kucita zintu.”

Natalie amunyina, James, ibakucisi ca South Africa, mbafwaafwi kapati. Kunze lyaboobo, musana wa Natalie uloongomene. Natalie waamba kuti: “Ndakaandulwa ziindi zyone mumoongola alimwi akaambo kakoongomana kwamusana, mapunga aangu taabeleki kabotu.”

Timothy, wakucisi ca Britain, wakajanwa bulwazi bupa kukatala kapati bwa chronic fatigue syndrome kajisi myaka iili 17 yakuzyalwa. Waamba kuti: “Nokuba kuti ndakali muzumi, mumyezi yobile buyo ndakakompama cakuti cakali kundaalila kwiimikila.”

Danielle, wakucisi ca Australia, wakajanwa bulwazi bwaccuka kajisi myaka iili 19 yakuzyalwa. Waamba kuti: “Mbwaanga zitondezyo zyabulwazi bwaccuka tazilibonyi, bantu bamwi bayeeya kuti oobu tabuli bulwazi bupati. Ibwini mbwakuti, bulwazi bwaccuka bulakonzya kundijaya.”

Ikuti naa ulilemene naa uli abulwazi bumwi bukukatazya, masimpe ulakulwaizigwa amajwi ngaakaamba Hiroki, Natalie, Timothy alimwi a Danielle.  Ikuti naa uli buyo kabotu, nkokuti majwi ngobakaamba ayoopa kuti ukonzye kubamvwisya naa kubeetelela aabo baliyumya akaambo kakulemana naa kuciswa.

Sinsimuka!: Ncinzi cikukatazya kapati mubukkale oobu?

Natalie: Penzi pati ndyondijisi lijatikizya mbobacita bantu nobandibona. Lyoonse ndilalibilika. Ncondiyeeya ncakuti lyoonse bantu boonse balanga buyo ndime.

Danielle: Penzi pati ndyondijisi akaambo kabulwazi bwaccuka lijatikizya kusala zyakulya nzyondeelede kulya, kuvwula kwacakulya ncondeelede kulya azyakulya nzyonditeelede kulidalyo. Kutalya zyakulya zyeelede kulakonzya kupa kuti ccuka liceye kapati mubulowa, calo cikonzya kundinetula.

Hiroki: Ndijisi kacinga kabalema kalibedelede nkondakabambilwa, alimwi kwamawoola aatandila ku 15 abuzuba, nsisandamuki. Alimwi tandooni kabotu. Kuyobeka kuli koonse kundipa kubuka.

Timothy: Penzi pati ndyondakajisi kumatalikilo ndyakuzumina makani aakuti ndili mulwazi. Ndakali kufwa nsoni akaambo kabukkale bwangu.

Sinsimuka!: Mmapenzi nzi aambi ngojisi?

Danielle: Bulwazi bwaccuka bupa kuti kandikatala kapati. Eeci cipa kuti kandoona kwaciindi cilamfwu kwiinda bamusela wangu. Kunze lyaboobo, bulwazi bwaccuka tabuleki moombe wakatala alimwi tabusilikiki.

Natalie: Kufwiimpa kupa kuti ndijane buyumuyumu. Cilandikatazya nokuba kucita tulimo-limo tutayi koomoonga mbuli kubweza zintu zibikkidwe mujulu mumantoolo. Nonduunka ndelikke kukuula zintu, cilandiyumina kapati.

Timothy: Ndeelede kuliyumya akaambo kakucisa kutaleki alimwi akutyompwa ciindi aciindi. Kanditanaciswa, tiindakali kulileka-leka mbuli mulomo wakunsi. Ndakali kubeleka alimwi ndakali kulyeenzyela mootokala. Ndakali kutola lubazu muzisobano ziindene-indene mbuli kuuma bbola. Pele lino ndeendela akacinga kabalema.

Hiroki: Ndilaakuliluma-luma kwaambaula. Eeci cilandityompya alimwi cindipa kuyoowa kutalisya mibandi. Zimwi ziindi, akaambo kakutacikonzya kweendelezya maanza, ndilaakuuma bamwi cakutayeeyela. Nondicita boobo, cilandaalila nokuba kwaamba buyo kuti “amundijatile” akaambo kapenzi lyakwaambaula ndyejisi.

Sinsimuka!: Ncinzi cakugwasya kuliyumya mubukkale oobu?

Danielle: Ndilasoleka kubikkila maanu kuzintu zibotu nzyondijisi mubuumi. Ndijisi mukwasyi mubotu, balongwe basiluyando mumbungano alimwi kwiinda zyoonse, Jehova Leza ngomugwasyi wangu. Kunze lyaboobo, ndilabala makani mapya aamba mbobukonzya kweendelezegwa bulwazi bwaccuka. Ndilabikkila maanu kubuumi bwangu alimwi ndilasoleka kusikila mpondigolela kulilanganya.

Natalie: Mupailo ulandiyumya-yumya. Ndilasoleka kulanganya penzi limwi alimwi ndyejisi aciindi nsini. Ikujata bubi kundipa kutabikkila maanu kuzintu zityompya. Kunze lyaboobo, ndijisi bazyali babotu mbondikonzya kwaambila kufwumbwa cili kumoyo.

Timothy: Abuzuba ndilacita zintu zyakumuuya, neliba leelyo nocitola buyo ciindi cisyoonto. Mucikozyanyo, lyoonse mafwumina ndilalingaula lugwalo lwabuzuba. Kucita Ciiyo Cangu ca Bbaibbele akupaila ndilazibikkila maanu kapati, ikapati nondityompedwe.

Hiroki: Ndilasoleka kutabikkila maanu kuzintu nzyonditakonzyi kucita. Ooko nkusowa buyo ciindi. Muciindi caboobo, ncondicita nkuyumya cilongwe cangu a Leza, alimwi bulwazi bwangu taakwe nondibulekela kuba cilitaminizyo cindilesya kwiiya Bbaibbele. Ikuti naa ndakakilwa koona, ciindi eeco ndicibelesya kupaila.—Bala Ba-Roma 12:12.

 Sinsimuka!: Ino bamwi bakukulwaizya buti?

Hiroki: Baalu balandilumbaizya lyoonse nondicita zintu nzyondikonzya kucita nokuba kuti taziyi koomoonga. Kunze lyaboobo, bakwesu abacizyi mumbungano balanditamba kutegwa ndibasangane munyendo zyabo zyakupilukila akuziiyo zyabo zya Bbaibbele.—Bala Ba-Roma 12:10.

Danielle: Icindinjila kapati ndeelyo bakwesu abacizyi mumbungano nobandilumbaizya camoyo woonse. Nobacita boobo cipa kuti ndibone kuti balandiyanda alimwi ndilakulwaizigwa kuyaambele.

Timothy: Mucizyi umwi uucembeede ulasolekesya kubandika andime lyoonse kumiswaangano. Abalo baalu abamakaintu babo balandikulwaizya akundibuula maanu. Mwaalu umwi uuli amyaka yakuzyalwa iili 84 wakandigwasya kulibikkila mbaakani nzyondikonzya kuzuzikizya. Mukutausi umwi wakanditamba kuti ndimusangane mubukambausi, alimwi wakacita bubambe bwakuti tubelekele mucilawo cibambasene calo cakapa kuti ndikonzye kweenda kabotu ancinga yabalema.—Bala Intembauzyo 55:22.

Natalie: Lyoonse nondinjila mu Ŋanda ya Bwami, bakwesu abacizyi mumbungano balandaanzya kabamweta-mweta. Ibacembeede balandikulwaizya lyoonse nokuba kuti abalo bali amapenzi.—Bala 2 Ba-Korinto 4:16, 17.

Sinsimuka!: Ncinzi cakugwasya kuzumanana kuzilanga munzila iili kabotu zintu?

Hiroki: Mbwaanga ndili umwi wa Bakamboni ba Jehova, ndili mumbunga yabantu bajisi bulangizi butaliboteli. Ikuziba kuti ndili mumbunga iitaliboteli kulandikulwaizya.—Bala 2 Makani 15:7.

Danielle: Ndilaakuyeeya coolwe ncendijisi cakumvwisya makanze aa Leza. Bamwi bantu bapona buyo kabotu, pele tabakkomene kapati mubuumi mbuli mbwekkomene mebo akaambo kakuba abuumi buli ampindu kapati.—Bala Tusimpi 15:15.

Natalie: Ncondibikkila maanu kapati nkuyanzana abantu bali alusyomo luyumu. Kunze lyaboobo, cilakulwaizya ikubala zyakuluula zyabamwi ibabelekela Jehova nokuba kuti bali amapenzi. Alimwi, nonduunka ku Ŋanda ya Bwami ndilizi kuti ndilakulwaizigwa akuyeekezegwa coolwe ncendijisi cakuti ndili umwi wa Bakamboni ba Jehova.—Bala Ba-Hebrayo 10:24, 25.

Timothy: Kweelana alugwalo lwa 1 Ba-Korinto 10:13, Jehova kunyina naya kutulekela kuba amapenzi ngotutakonzyi kuliyumya. Ncondilaakuyeeya ncakuti ikuti naa Mulengi wangu kajisi lusyomo lwakuti ndilakonzya kuliyumya mupenzi eeli, nkaambo nzi ncondeelede kuyeeya kuti nsekonzyi kuliyumya?

Zibalo azimbi zyakuti “Bakubusi Balabuzya” zilakonzya kujanwa aa intaneti aakkeyala ya www.watchtower.org/ype

ZYAKUYEEYESYA

▪ Boonse bobilo, Hiroki a Timothy beendela ancinga zyabalema. Ikuti naa mbobede ayebo oobo, ino mbuti majwi ngobakaamba mbwaakonzya kukukulwaizya kuzumanana kuzilanga munzila iili kabotu zintu?

▪ Danielle waamba kuti “mbwaanga zitondezyo zyabulwazi bwaccuka tazilibonyi, bantu bamwi bayeeya kuti oobu tabuli bulwazi bupati.” Sena anduwe uli abulwazi mbobatakonzyi kubona bamwi? Ikuti naa mboobo, ncinzi ncokonzya kwiiya kutwaambo twa Danielle?

▪ Natalie waamba kuti penzi pati ndyajisi lijatikizya mbobacita bantu nobamubona. Mbuti mbokonzya kupa kuti muntu uuli mubukkale bwa Natalie atalibiliki? Ikuti naa ulilemene naa uli abulwazi bukupa kulimvwa mbwalimvwa Natalie, mbuti mbonga wamwiiya mukuzilanga kabotu zintu?

▪ Lemba ansi aawa mazina aabantu mbozi balemene naa bali abulwazi butasilikiki.

․․․․․

▪ Ncinzi ncokonzya kucita kutegwa umwi aumwi wabantu aaba mboolemba mazina ubakulwaizye?

․․․․․

[Kabbokesi kali apeeji 9]

Luumbulizyo Lwamu Bbaibbele

▪ Jesu ulabeetelela kapati balwazi.—Marko 1:41.

▪ Kwiinda “[mu]kuponya malwazi oonse amalengwa oonse,” Jesu wakatondezya mbobaya kuponesegwa bantu mu Bwami bwa Leza.—Matayo 4:23.

▪ Munyika mpya ya Leza, “takukooyooba naba omwe akati kabantu banyika uuamba kuti, Ndaciswa,” alimwi macise oonse ayoomana.—Isaya 33:24; Ciyubunuzyo 21:1-4.

▪ Noluba lufwu ‘luyoolobesegwa.’—1 Ba-Korinto 15:25, 26.

[Cifwanikiso icili apeeji 8]

Hiroki, uujisi myaka iili 23 uzwa ku Japan

[Cifwanikiso icili apeeji 8]

Natalie, uujisi myaka iili 20 uzwa ku South Africa

[Cifwanikiso icili apeeji 8]

Timothy, uujisi myaka iili 20 uzwa ku Britain

[Cifwanikiso icili apeeji 8]

Danielle, uujisi myaka iili 24 uzwa ku Australia