Nguni Weelede Kwaamba Kuti Eeci Ncecikombelo Cakasimpe?

JESU wakacisalazya kuti bukombi bumwi tabukkomanini Leza. Wakaamba zya “basinsimi babeji,” kabeezyanisya kumusamu uuzyala micelo mibi alimwi ‘uutemwa akusowelwa mumulilo.’ Alimwi wakati: “Boonse bandaambila kuti, Mwami, mwami, teensi mbabo bayoonjila mu-Bwami bwakujulu.”—Matayo 7:15-22.

Mubwini, ikujatikizya bamwi ibakali kuyoolyaamba kuti balamutobela, Jesu wakati: “Nzoobaambila kuti, Nsimuzi pe, amuzwe kulindime inywe nubamucita zibi.” (Matayo 7:23) Kunze lyaboobo, naakali kwaambila basololi bazikombelo bakuciindi cakwe, Jesu wakabelesya majwi aa Leza ngaakaambila bana Israyeli basiluleyo aakuti: “Kundikomba kwabo nkwabuyo, nkaambo zifundo nzibafunda njimilazyo yabantu buyo.”—Marko 7:6, 7.

Cilasalala kuti tabuli bukombi boonse Leza a Mwanaakwe mbobakkomanina. Aboobo, tabuli bukombi boonse bwakasimpe. Sena eeci caamba kuti kuli buyo cikombelo comwe ciyiisya kasimpe? Sena Leza inga katabelesyi zikombelo zili mbozibede, nokuba kuti zimwi ulazikaka? Naa sena tacikonzyeki kuti Leza ulakonzya kazumina naa kukaka bukombi bwamuntu aumwi muzikombelo ziindene-indene kakunyina makani ancoziyiisya?

Kasololelwa amuuya wa Leza, imwaapostolo Paulo wakalemba kuti: “Lino ndamukumbila, nubakwesu, muzina lya-Mwami Jesu Kristo, kuti mwaambe cintu comwe, kutabi mipampo mipampo akati kanu. Amube alukamantano lwamoyo omwe alwamiyeeyo yomwe.” (1 Ba-Korinto 1:10) Ibbaibbele alimwi lilaya Banakristo kuti babe “abuyanzane bomwe, akuyandana aluyandisyo lomwe, camoyo omwe acakuyeeya comwe.”—Ba-Filipi 2:2.

Nokuli lukamantano luli boobu, kuba buyo cikombelo comwe. Aboobo Bbaibbele lyaamba kuti “Mwami ngumwi, alusyomo ndumwi, alubapatizyo ndumwi.”—Ba-Efeso 4:4, 5.

Ncolitondezya Bbaibbele

Ikwaamba kuti kuli buyo cikombelo cakasimpe comwe mmakani aasalede mu Bbaibbele. Kwiinda mukuvwuntauzya  mu Bbaibbele, muyoojana kuti Leza wakali kweendelezya bantu bakwe kwiinda mubukombi bomwe. Kuzwa kumatalikilo, Leza wakali kubelesya bamasyaanene, naa basilutwe bamikwasyi kuba basikumwiiminina. Ibadumide akati kabo kuli Nowa, Abramu (Abrahamu), Izaka alimwi a Jakobo.—Matalikilo 8:18-20; 12:1-3; 26:1-4; 28:10-15.

Ibaluzubo lwa Jakobo bakaba bazike ku Egepita. Kabali kooko, bakadyaamininwa kapati, pele bakavwula kapati. Leza wakabavwuna mubuzike, munzila yamaleele wakabazubusya Lwizi Lusalala. Mpoonya Leza wakabasala kuba bantu bakwe, wakabapa milawo kwiinda muli simwiimaakati Musa. Bakaba musyobo wa Israyeli wansiku, icisi ca Leza.—Kulonga 14:21-28; 19:1-6; 20:1-17.

Icipati ncakuti, Leza taakabukkomanina pe bukombi bwabantu bakali muzisi zyakeengelede bana Israyeli. Mubwini, wakabasubula bantu bakwe nobakaleya kumilawo yakwe akutalika kutobela bukombi buli boobo.—Levitiko 18:21-30; Deuteronomo 18:9-12.

Ino ncinzi ncobakeelede kucita bantu bamumasi aambi ibakali kuyanda kukomba Leza wakasimpe? Cakusaanguna bakeelede kuleka bukombi bwabo bwakubeja, mpoonya bakeelede kusangana bana Israyeli mukukomba Jehova Leza. Ibanji bakaba balongwe ba Leza akuba babelesi bakwe basyomeka. Akati kabo kwakali banakazi mbuli Rahabu muna Kanana alimwi a Rute muna Moabu; baalumi mbuli Uriya mu Hiti alimwi a Ebedi-meleki muna Etiopiya; alimwi kwakali ankamu zyabantu mbuli bana Gibeoni. Camoyo woonse, Mwami wa Israyeli Solomoni wakabapailila bantu boonse aabo mbuli baaba mbotwabandauka ibakasangana abantu ba Leza mubukombi bwakasimpe. *—2 Makani 6:32, 33.

Jesu Kazwide Anyika

Kumbele Jesu kazwide anyika, ibukombi bwakasimpe bwakayeeme anjiisyo zyakwe, alimwi makanze aa Leza akasalazyigwa munzila iilibedelede. Mukuya kwaciindi, bakombi bakasimpe bakazyooitwa kuti ‘Banakristo.’ (Incito 11:26) Aboobo iba Juda bakali kuyanda kukkomaninwa a Leza bakeelede kucileka kukomba mbuli musyule. Kunyina nobakeelede kusala akati kabukombi bobile naa kutalisya bukombi bwakuti aumwi kakomba mbuli mbwayanda. Mbubwenya mbolyaamba Jwi lya Leza, bakombi bakasimpe bakalikamantene ‘mulusyomo lomwe.’—Ba-Efeso 4:4, 5.

Sunu imuzeezo wakuti Leza weendelezya bantu kwiinda mucikombelo comwe buyo ulakonzya kumvwika mbuli kuti nkuciindizya alimwi inga wabasulula bamwi. Pele eeci ncelyaamba Bbaibbele. Musyule, ibantu banji bakali kukomba munzila njibakali kuyeeyela kuti njiiluzi, bakakateelela akukatobela kaambo aaka. Bakasangana bakombi ba Jehova bakasimpe, alimwi kudooneka nkobakajisi kumatalikilo kwakamana nobakajana zilongezyo zinji alukkomano. Mucikozyanyo, Ibbaibbele lyaamba kuti mwaalumi umwi muna Etiopiya naakatambula Bunakristo akubbapatizyigwa, ‘wakaya munzila yakwe kaboteledwe kapati.’—Incito 8:39.

Kufwumbwa muntu sunu uutambula akutobela ciyiisyigwa acikombelo cakasimpe uyoolongezyegwa mbubwenya. Pele, mbwaanga zikombelo ziliko nzinji kapati, mbuti mbomunga mwacizyiba cikombelo cakasimpe?

Bupanduluzi buyungizidwe

[Cifwanikiso icili apeeji 27]

Ncinzi ciyoocitikila cikombelo cizyala micelo mibi?