“Amusololelwe Amuuya Wa Leza”

Muswaangano Wacooko wa Bakamboni ba Jehova

▪ MYAANDA yamiswaangano eeyi yacooko yamazuba otatwe, yakatalika mu United States mu May 23-25 iyakucitwa mumyezi iiboola mumadolopo manji munyika yoonse. Mu 2007, bantu bainda kutuulunzuma tuli 12 bakajanika kumiswaangano iinda ku 3,200 iili boobu.

Mumasena manji mwaka uuno, mapulogilamu ayakutalika anyimbo aciindi ca 8:20. Mutwe wamakani mubuzuba Bwakusaanguna uyakuzwa mulugwalo lwa Johane 16:13: “Muuya . . . Uzoomweenzya Mubwini Boonse.” Akati kamakani aakumatalikilo kunooli aakuti “Nkaambo nzi Ncotweelede Kusololelwa Amuuya wa Leza?” aakuti “Muuya Uusalala—Mbowakabeleka Mukulenga!” Makani aakusiilana aakuti “Bantu Basyomeka Bakaindi—Bakali Kusololelwa Amuuya wa Leza” ayakwaamba mbobakasololelwa “Muciindi ca Musa,” “Mumazuba aa Babetesi,” a “Mumwaanda Wamyaka Wakusaanguna.” Makani aantalisyo aakuti, “Mulimo wa Muuya Uusalala Mukuzuzikizyigwa Kwamakanze aa Jehova,” ngaya kuba aamamanino mucibeela camafwumina.

Makani aakusaanguna mubuzuba bwakusaanguna kumazuba anakuli aakuti “Kwiingula Mibuzyo Iijatikizya Muuya Uusalala,” kumane kuya kutobela makani aakuti, “Muuya ulagulunganya, . . . Makani Malamfu Aabulondo bwa-Leza” aakuti “Amube Basikuswiilila Abasikucita Jwi lya Leza.” Makani aakusiilana aakuti: “Nobakubusi—Amusololelwe Amuuya Uusalala!” anikujisi zibeela zyakuti, “Kucikolo,” “Kumulimo,” “Mumukwasyi,” “Mumbungano,” “Nomulikondelezya,” a “Nomuli Molikke.” Makani aamamanino mubuzuba bwakusaanguno ngakuti “Nobakubusi Amucibikkile Maano Cilongwe Canu a Jehova,” alo ayakugwasya bakubusi.

Mutwe wamakani mubuzuba bwabili ngwakuti ‘Kubyala Zyintu Zyakumuuya,’ kuzwa mulugwalo lwa Ba-Galatiya 6:8. Cibeela camafwumina cina kujisi makani aakusiilana ajisi zibeela zyotatwe, “Kusololelwa Amuuya wa Leza Mumulimo Wesu.” Cibeela eeci ciyakumana amakani alubbapatizyo kumane aabo beelela baya kubbapatizyigwa.

Makani aakusaanguna mubuzuba bwabili kumazuba aakuti, “Basikulemba Bbaibbele—‘Bakasungulwa [A]muuya wa-Leza’” ayakutobelwa amakani aakusiilana aakuti “Kuyumizyigwa Amuuya Uusalala” aajisi zibeela zyosanwe zyakuti “Kutegwa Tuzunde Mumasunko,” “Kutegwa Tuliyumye Notukatede Anotutyompedwe,” “Kutegwa Tuliyumye Notupenzyegwa,” “Kutegwa Tutayungwi Abeenzuma,” a “Kutegwa Tuliyumye Mumapenzi.” Makani aamamanino mubuzuba bwabili ngakuti “Amuliyobole Muluyando lwa Leza.”

Mutwe wamakani mubuzuba bwamamanino ngwakuti “Inzila Njimweendela Ibe Yamu-Muuya,” kuzwa ku Ba-Galatiya 5:16. Makani aakusiilana aajisi zibeela zili fwuka “Amuzyale ‘Micelo Yamuuya’” ayakubandika cibeela acimwi camicelo yamuuya iilembedwe ku Ba-Galatiya 5:22, 23. Makani aabuleya aakuti “Amulongezyegwe Amwami Uusololelwa Amuuya wa Jehova!” ayakuba makani aamamanino aamafwumina. Cibeela cikkomanisya camasyikati ncisobano cijisi mutwe wakuti, “Mutaluleki ‘Luyando Ndomwakajisi Kusaanguna.’” Citondezya mbobakali kuyeeya alimwi ambweni mbobakali kupona Banakristo kumamanino kwamwaanda wamyaka wakusaanguna. Muswaangano wacooko uya kumana amakani aakuti “Kubeleka Cakusyomeka Ambunga Iisololelwa Amuuya wa Jehova.”

Amutalike lino kulibambila kutegwa mukajanike. Kutegwa muzyibe nkomukonzya kwaakuswaanganina, mulakonzya kubuzya ku Ŋanda ya Bwami ya Bakamboni ba Jehova iili afwaafwi naa kulembela basikumwaya magazini eeyi.