Buumi Bubotu Mbomukonzya Kulangila
Buumi Bubotu Mbomukonzya Kulangila
Amweezyeezye kuti muya bweenda mpoonya mwasika aandaanina nzila. Mwajana zitondezyo zyobilo, cimwi cilembedwe kuti, “Amusyome bantu azisyomezyo zyabo.” Cimbi cilembedwe kuti, “Amusyome Leza a Bwami bwakwe.” Njiili nzila njomukonzya kugama?
NCAMAANO kusyoma Leza. Mboobu mbwaamba Leza: “Abo baswiilila ndime bayookala kabotu, bayooba aluumuno cakutayoowa bubi.” (Tusimpi 1:33) Tulamuswiilila Mulengi wesu notutobela njiisyo zyamu Bbaibbele zisyomeka alimwi zigwasya ncobeni. (2 Timoteo 3:16) Sena ncamaano kuba alusyomo luli boobu? Inzya! Mucikozyanyo, mbuli mbotwabona mucibalo cabili, Bbaibbele lelikke ndelipandulula munzila iiluzi ikaambo bantu ncobatakonzyi kulyeendelezya kabotu. Sena tamuzumini kuti ncolyaamba Bbaibbele ncamasimpe kweelana azicitika?
Kunze lyaboobo, Bbaibbele lilasyomeka kumakani aabusinsimi. Mucikozyanyo, Ibbaibbele lyakasinsima kujatikizya zyintu zibi zicitika “kumazuba [aano] aakumamanino.” Tatweelede kulwiidwa buya zyintu eezyi. (Matayo 24:3-7; 2 Timoteo 3:1-5) Mane buya Bbaibbele lyakasinsima kuti bantu baya kusofwaazya nyika. Ibbuku lya Ciyubunuzyo 11:18 lyaamba kuti Leza ‘uyakubanyonyoona abo banyonyoona nyika.’
Imajwi aaya naakali kulembwa imyaka iitandila ku 2,000 yainda, zyintu mbuli kusofwaazya muya, lwizi alimwi anyika, kupya kwazuba (global warming) alimwi akunyonyoona banyama azisamu tiizyakali kulangilwa kucitika. Pele mazuba aano eezyi teensyi zyintu zyakweezyeezya buyo. Masimpe, Leza tabeji pe. Ijwi lyakwe lilembedwe lilazuzikizya lyoonse. * (Tito 1:2; Ba-Hebrayo 6:18) Leza nasyomezya, ulacita oobo kweelana azyina lyakwe.
Izyina Ndyomukonzya Kusyoma
Mbweena muntu mbwasaina cipepa kutegwa cibe anguzu, izyina lya Leza lyakuti Jehova lipa bumboni bwakuti zisyomezyo zyoonse zilembedwe mu Bbaibbele ziya kuzuzikizyigwa ncobeni. * Mulembi umwi wa Bbaibbele iwakali kukwabililwa a Leza ziindi zinji wakati: “Twasyoma izina lyakwe lisalala.”—Intembauzyo 33:21; 34:4, 6.
Ikutondezya zyina lya Leza mboliswaangene aluyando ndwajisi mbwali Taateesu, lugwalo lwa Tusimpi 18:10 lwaamba kuti: “Izina lya-Jehova ningazi injumu; mululami ulacijila kulinjiyo, aboobo ulafutuka.” Alwalo lugwalo lwa Ba-Roma 10:13 lwaamba kuti: “Umwi aumwi uulilila izina lya-Mwami ulafutuka.” Inzya, eeci tacaambi kuti zyina lya Leza lili mbuli cizimba. Muciindi caboobo, Leza lwakwe nguufwutula alimwi aabo balilila nguwe kweelana ambolwaamba lugwalo balacita oobo akaambo kakuti balamusyoma cakumaninina. Balizyi kuti ulasyomeka, tabeji pe. Lugwalo lwa Intembauzyo 91:14 lwaamba kuti: “Mbwabikide moyo wakwe kulindime [Jehova], njoomuvuna. Njoomusumpula, nkaambo ulizi izina lyangu.”
Amulibuzye kuti, ‘Nguni ngondisyoma—Leza naa bantu?’ Bakamboni ba Jehova bakasala kusyoma Leza a Bwami bwakwe. Mukucita boobo, tiibakasyoma buyo kakunyina kuyeeya pele bakacita oobo kwiinda muluzyibo lwini-lwini lwamu Bbaibbele. (Ba-Hebrayo 11:1; 1 Johane 4:1) Aboobo, muciindi cakuyoowa ziboola kumbele, ‘balikkomene abulangizi’ mbobajisi. Bamulomba kuti mwiiye makani aamba zyabulangizi oobu bwini-bwini.—Ba-Roma 12:12, NW.
Bupanduluzi buyungizidwe
^ munc. 5 Amubone Sinsimuka! yaalubazu ya Cingisi yamu November 2007 yakali kubandika mutwe wakuti “Sena Mulakonzya Kulisyoma Bbaibbele?”
^ munc. 7 Amubone kabbokesi kakuti “Ndizyina Alimwi Ncisinizyo.”
[Majwi aakwelelezya sikubala aali apeeji 18]
Mbweena muntu mbwasaina cipepa kutegwa cibe anguzu, izyina lya Leza lipa bumboni bwakuti zisyomezyo zyoonse zyamu Bbaibbele ziya kuzuzikizyigwa
[Kabbokesi kali apeeji 18]
NDIZYINA ALIMWI NCISINIZYO
Izyina lya Leza lyakuti Jehova talili buyo zyina litajisi bupanduluzi. * Munzila nzi? Eelyo zyina lyaamba kuti “Uupa Kuti Kube.” Munzila imwi, inga twaamba kuti Leza ulaaluyando, nguzu abusongo mbwakonzya kubelesya kuti abe kufwumbwa ceeco ciyandika kutegwa acite makanze aakwe akuzuzikizya ncaamba. Mucikozyanyo, ulakonzya kuba mufwutuli wabalulami, Sikunyonyoona basizibi, Sikuswiilila mipailo naa Taata siluyando naa kufwumbwa ncayanda kuba.
“Ndime Leza, taakwe umbi. Ndime Leza, taakwe ngutweelene awe. Ndime uulungulula makani aamamanino nikuba kuzwa kumatalikilo, . . . . Ndati, Lulayo lwangu luyoozuzikizigwa, njoocita zyoonse nzinjanda.” (Isaya 46:9, 10) Akaambo kakuti Leza ulaazuzikizya makanze aakwe lyoonse alimwi izyina lyakwe lilijatikizidwe, Ijwi lyakwe lilembedwe alyalo liya kuzuzikizyigwa. “Leza tali muntu, tabeji.”—Myeelwe 23:19.
Bupanduluzi buyungizidwe
^ munc. 17 Izyina lyakuti Jehova liliindene amazyina aabulemu aakuti Singuzuzyonse, Mulengi a Mwami. Lilajanika ziindi zitandila kuzyuulu zili ciloba mumwaambo wakabelesyegwa kulemba Bbaibbele. Leza nguwakalyuulika zyina eelyo. Lugwalo lwa Kulonga 3:15 lwaamba kuti: “Jehova . . . Ndendilyo izina lyangu lyoonse.”