Ikukomezya Bana Bakubuka Ncociyandika Kubona Kaambo

Amweezyeezye kuti mwaunka kukuswaya kucisi cimbi nkubabelesya mwaambo ngomutazyi. Ncamasimpe kuti, cilakonzya kumukatazya kubandika ikuti kamutauzyi mwaambo ooyo pesi inga mwajana nzila. Mucikozyanyo, bbuku lipandulula mabala lilakonzya kumugwasya kwiiya mabala aayandika mumwaambo ooyo. Ambweni muntu umwi ulakonzya kumupanduluda zyaambwa kutegwa mumvwane abantu bakooko.

IBAZYALI bakomezya bana bakubuka balakonzya kulimvwa boobo abalo. Mbomunya mbocikatazya kwiiya mwaambo wakucisi cimbi, ikulilemeka kwabana bakubuka kulakonzya kukatazya akwalo, pele inga mwajana nzila. Icikonzya kumugwasya kumana penzi eeli nkuzyiba citola busena mubuumi bwabana mbomukomezya kuciindi cino cikkomanisya pele cinyonganya mizeezo yabazyali abana akaambo kakuti bana balacinca mbobalilemeka nobayaabukomena.

Ncobalilemeka Boobo

Mukubusi nayanda kulyeendelezya tacaambi kuti uyanda kuzanga buya pe. Amuyeeye kuti, Ibbaibbele lyaamba  kuti mukuya kwaciindi “mwaalumi uleelede kusia wisi abanyina.” (Matalikilo 2:24) Ikutegwa balibambile mikuli iiyakuboola baakukomena, bakubusi bayandika kuzyiba mbobakonzya kutubamba twaambo.

Amubone lino cakali kupa kuti bana kabalilemeka kweelana ancibakajana bazyali baambwa mucibalo cainda.

Ba Lia baku Britain bakatongooka kuti: “Mwanaangu musankwa kuzwa naakakubuka ulimvwa kuti wakomena cakuti tatweelede kumwaambila cakucita alimwi tanaakali kutumvwida.”

Mbomunya mbuli bana baniini, ibana bakubuka lyoonse balayanda kupanduludwa twaambo toonse. Lino tabaimini buyo akubuzya mbobakali kubuzya kaindi. Ino nkaambo nzi? Imwaapostolo Paulo wakalemba kuti: “Nindakacili mwana, ndakali . . . kuyeeya mbuli mwana.” (1 Bakolinti 13:11, BT) Pele bakubusi mbobayaabukomena bayandika kupanduludwa kabotu-kabotu kutegwa “miyeeyo” yabo ikonzye kuyiisyigwa.—Ba-Hebrayo 5:14.

Ba John baku Ghana bakati: “Bana besu basimbi bakatalika kulibilika akaambo kambubakali kulibonya.”

Kufwumbwa naa wafwambaana, wamuka-muka naa wayaluka aciindi ceelede, bakubusi banji ciindi cinji bacibelesya kubona mbobaboneka. Ikucinca kwamubili kulakonzya kubakkomanisya bana basimbi naa kubakatazya ambweni balakonzya kuba amizeezo yoonse yobilo. Akaambo kakuti balalisenda akaambo kafwula nzyobajisi bakubusi aaba baboneka kuti coonse ciindi bacimanina acimboni-mboni kabalibamba-bamba muciindi cakubala.

Ba Daniel baku Philippines bakapandulula kuti: “Bana besu tiibakali kuyanda kuti tuzyibe ncibakali kuyanda kucita ancibakali kuyeeya, bakali kuyanda kuti zyoonse kabalicitila. Ziindi zinji bakali kulombozya kuti kabali abeenzinyina kutali andiswe.”

Kusisikizya takuli kubotu pe, kulajazya. (Ba-Efeso 5:12) Pele kuba olikke kuliindene. Awalo Jesu wakabona kuti cilayandika kuunka “kubusena buliibide.” (Mateyo 14:13, BT) Nobaya bukomena, bakubusi abalo bayanda kuti kabajana ciindi cakuba balikke, aboobo bayanda kuti ibapati kababapa ciindi eeco. Ikuba aciindi cili mbocibede kabali balikke kulakonzya kugwasya bakubusi kuti balizinze—eeci cilakonzya kubagwasya baakukomena.

Mbomunya buyo ikwiiya kuba abeenzinyina kutondezya kuti muntu wakomena. Masimpe ngakuti, “mweenda abamineme, anywebo mulaminama.” (1 Ba-Korinto 15:33) Nokuba boobo, Bbaibbele lyaamba kuti: “Mulongwe ulayanda mweenzinyina ciindi coonse, pele munyina uzyalilwa kugwasya muziindi zyamapenzi.” (Tusimpi 17:17, BT) Ikwiiya kujana beenzinyina akuzumanana kumvwana ambabo, cilayandika kapati alimwi ciyakumugwasya mwana aakukomena.

Ikuti naa basikilwa mapenzi mbuli yaaya aambwa kale, bazyali beelede kwaalangisya makani aaya kutegwa batabayeeyeli bumbi bana babo bakubuka. Masimpe, kunze lyakuzyiba cicitika, bazyali beelede kubelesya busongo kutegwa babone mbobakonzya kubagwasya bana babo. Ino bazyali bajisi bana bakubuka inga bacita buti oobo?

[Majwi aakwelelezya sikubala aali apeeji 5]

Mbobayabukomena bakubusi bayandika kupanduludwa kabotu-kabotu milawo iibikkidwe mumukwasyi