“Ino Ncinzi Cacitika Kumwanaangu!”

Ba Scott aba Sandra * bakalamwa mwanaabo wamyaka iili 15 naakanjila muŋanda mubakakkende. Imasusu aakwe aakali kabotu wakaapenta mubala uusalala. Alimwi cakabija kapati ncakuti, mubandi ngubakajisi tiiwakali kabotu.

“Sena twakakuzumizya kuti waapente masusu aayo?”

“Taku nimwakali ndikasyide.”

“Ino wakalekela nzi kutwaambila kuti uyanda kwaapenta masusu?”

“Ndakalizyi kuti nimwakandikasya!”

BA Scott aba Sandra balizyi kuti ciindi mwana nakubuka nciindi cikatazya, eeci tacikatazyi bana balikke pe, pele abazyali balakatazyigwa. Masimpe ngakuti, bamatata abamamama tabalibambili ciindi eeci mwana nakomena. Ba Barbara banyina mwana musimbi baku Canada bakaamba kuti: “Cakutazyiba, imwaneesu musimbi wakacinca. Tiindakalizyi cakali kucitika kumwanaangu. Cakali mbuli kuti bakatucinca mwana nitwakalilede akutuletela umbi!”

Cakabacitikila ba Barbara tacigambyi pe. Atubone ncobakaamba bamazyali bamwi mumasi aindene-indene kubalembi ba Sinsimuka!

“Mwanaangu musankwa kuzwa naakakubuka ulimvwa kuti wakomena cakuti tatweelede kumwaambila cakucita alimwi tanaakali kutumvwida.”—Ba Lia baku Britain.

“Bana besu basimbi bakatalika kulibilika akaambo kambubakali kulibonya.”—Ba John baku Ghana.

“Mwanaangu wakali kuyanda kucita kufwumbwa ncayanda. Tanaakali kuyanda kwaambilwa cakucita.”—Ba Celine baku Brazil.

“Imwaneesu musimbi wakatalika kukaka kukumbatwa naa kumyontwa.”—Ba Andrew baku Canada.

“Bana besu basankwa bakatalika kutunyemena. Aboobo, muciindi cakutobela ncitwakali kubaambila bakali kuyanda kuti kabalicitila nzibayanda.”—Ba Steve baku Australia.

“Mwanaangu tanaakali kwaamba mbwaakali kulimvwa. Tanaakali kuyanda kwaamba cili coonse cakuti, kuti naa ndamubuzya mbwalimvwide wakali kunyema.”—Ba Joanne baku Mexico.

“Bana besu tiibakali kuyanda kuti tuzyibe ncibakali kuyanda kucita ancibakali kuyeeya, bakali kuyanda kuti zyoonse kabalicitila. Ziindi zinji bakali kulombozya kuti kabali abeenzyinyina kutali andiswe.”—Ba Daniel baku Philippines.

Nobazyali nomujisi bana bakubuka, muyakujana kuti tumwi twaambo twaambwa atala aawa tulakozyanya atooto tumucitikila. Ikuti naa mbuboobo mutatyompwi pe, muya kucizyiba cipa kuti mwaneenu musankwa naa musimbi kalilemeka munzila eeyo. Ibbaibbele lilakonzya kumugwasya. Munzila nzi?

Busongo Akubona Kaambo

Ikasimpi kamu Bbaibbele kaamba kuti: “Kolijanina busongo, kolijanina maanu.” (Tusimpi 4:5) Bube boonse bobilo bulayandika nomweendelezya bana bakubusi. Maano naa kubona kaambo kulayandika  kutegwa mukonzye kubona cipa kuti mwaneenu kalilemeka boobo. Alimwi busongo bulayandika kutegwa bumugwasye kuzumanana kumugwasya mwana kusikila ciindi naya kukomena.

Mutayeeyi kuti mwaneenu musankwa naa musimbi tamuyandi akaambo kambwalilemeka cino ciindi. Masimpe ngakuti, bakubusi bayanda kuti bazyali babo kababagwasya muciindi eeci cikatazya nobacinca mubuumi bwabo. Ino kubona twaambo abusongo inga zyamugwasya buti kuti mubagwasye bana benu?

Bupanduluzi buyungizidwe