Ino Ncinzi Ciyakucitika Aakumana Mazuba Aamamanino?
Ino Ncinzi Ciyakucitika Aakumana Mazuba Aamamanino?
BANTU bamwi balayoowa nobayeeya makani aajatikizya “mazuba aakumamanino.” (2 Timoteo 3:1) Bayeeya buyo kuti zinakuli ziindi zikatazya. Pele ino nkaambo nzi bantu banji kuzwa kaindi ncobali kwaalangila mazuba aamamanino? Akaambo kakuti mazuba aamamanino atondezya kuti kuli zyintu zibotu ziya kuboola kumbele.
Mucikozyanyo, ba Isaac Newton, bakali kusyoma kuti kumamanino kuya kuba ciindi caluumuno munyika yoonse mubulelo bwa Bwami bwa Leza bwamyaka iili cuulu. Bakaamba kuti businsimi buli mulugwalo lwa Mika 4:3, akuli Isaya 2:4 buya kuzuzikizyigwa kuciindi eeco: “Lino bayoofula mapanga aabo abe maamba aakulimya, amasumo aabo abe zizibyo zyamisamu. Cisi tacikooyoobweza ipanga lyakulwisya cisinyina. Tabakooyooiya inkondo limbi pe.”
Jesu naakali kwaamba ciindi camamanino, wakakulwaizya basikumutobela kuti babe abulangizi. Naakamana kwaamba buyumuyumu akulibilika ikuya kuba muciindi camapenzi mapati, Jesu wakaamba kuti: “Pele zyatalika kucitika ezi zintu, amulange mujulu, mulungumike mitwe yanu, nkaambo kunununwa kwanu kuli afwaafwi.” (Luka 21:28) Ino nkunununwa kuzwa kunzi?
Nzyasyomezya Leza
Mazuba aano bantu balapenga akaambo kankondo, kusulaikana, milandu, kulwana, nzala amapenzi aamwi manji, aboobo eeci capa kuti tuluunzuma twabantu kabalibilika. Sena kuli naakamucitikila mapenzi aali boobu? Amubone Leza nzyasyomezya:
“Kaba kaindi kaniini sizibi takooyooba wo; . . . Pele babombemyoyo bayoovuba nyika, bayookondwa muluumuno lunji.”—Intembauzyo 37:10, 11.
“Bantu bangu bayookala mucikalilo caluumuno amumaanda aalusyomo amumasena aacilyokezezyo aakuliiba.”—Isaya 32:18.
“[Jehova] ulalesya inkondo mane kusikila kumamanino aanyika, uladunsaula mata akutyolaula masumo; ulatenta inkalaki mumulilo.”—Intembauzyo 46:9.
“Banooyookede umwi aumwi mucisiko camusaansa wakwe amumukuyu wakwe, nkabela takukooyooba muntu naba omwe uubayoosya.”—Mika 4:4.
“Maila avule ansi, atala lyazilundu. Ayoome mbuli lusaka lwaku-Lebano. Abantu bamuminzi bavule mbuli bwizu bwamusokwe.”—Intembauzyo 72:16.
“Pele abo baswiilila ndime Tusimpi 1:33
bayookala kabotu, bayooba aluumuno cakutayoowa bubi”—Nokuba kuti tukkede mubusena bantu mobapona kabotu, toonse tulalangilwa kuciswa akufwa. Pele zyoonse eezyi tazinakuliko munyika mpya njasyomezya Leza. Aboobo, tulakonzya kuba abulangizi bwakubona bayandwa besu ibakafwa. Amulange-lange zisyomezyo zitobela:
“Takukooyooba naba omwe akati kabantu banyika uuamba kuti, Ndaciswa.”—Isaya 33:24.
“[Leza] uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—Ciyubunuzyo 21:4.
“Sinkondonyina musyaalizi uuyoolobesegwa ndufu.”—1 Ba-Korinto 15:26.
“Nkaambo ciindi ciyoosika ncobati kamvwe ijwi [lya Jesu] boonse abali muzyuumbwe, bayoozwa mpoonya.”—Johane 5:28, 29.
Mwaapostolo Petro wakazyaamba zyintu zyoonse eezyi mubufwaafwi naakalemba kuti: “Pele swebo tulangila ijulu ipya anyika impya, mbubonya mbuli mbwaakatusyomezya. Mulinzizyo momukala bululami.” (2 Petro 3:13) Kutegwa kukabe bululami munyika, aabo baleta manyongwe abaabo bajaya bantunyina akaambo kabusyaacivwule mwangu bayoogwisyigwa. Beendelezi boonse bali munyika bayakunjililwa busena a Bwami bwa Leza bweendelezyegwa a Kristo. Kujatikizya bulelo oobo, tusyomezyegwa kuti: “Bwami bwakwe buyookomenesya, alwalo luumuno talukooyoomana, acuuno cabwami ca-Davida abweendelezi bwakwe. Uyoobubusya akubwiimya nji alubeta abululami kuzwa kuciindi ecino mazuba oonse mane kukabe kutamani. Busungu bwa-Jehova wamakamu mbobuti cite aya makani oonse.”—Isaya 9:7.
Mulakonzya kulangila zyintu eezyi akaambo kakuti Bbaibbele lisyomezya kuti: “[Leza] uuyandisya kuti bantu boonse bafutulwe akuboola kuluzibo lwakuziba lusinizyo.” (1 Timoteo 2:4) Mutamuki pe. Amwiiye kutegwa mube aluzyibo lusololela kubuumi butamani. (Johane 17:3) Amubalembele basikumwaya magazini eeyi akulomba ciiyo ca Bbaibbele caaŋanda citabbadelwi.
[Zifwanikiso izili apeeji 24, 25]
Mulakonzya kuba abulangizi bwakuya kupona buumi bulondokede alimwi bwaluumuno kukabe kutamani mu Paradaiso anyika