Mazuba Aamamanino Aanzi?

ICITONDEZYO cilibonya ampulungwido mucintoolo cilembedwe kuti: “Mazuba aa Mamanino.” Bupanduluzi bwamabala aaya bulizyibidwe. Alakonzya kupandulula kuti zyintu zisambalwa amuulo waansi zilaafwaafwi kumana naa kuti cintoolo cilajalwa. Pele kuti umwi waamba kuti: “Tupona mumazuba aamamanino,” ino eeci caamba nzi?

Mabala aakuti “mazuba aakumamanino” alimwi amabala aakuti “kumamanino aciindi” alikubelesyegwa kuzwa kaindi. (2 Timoteo 3:1; Daniele 12:4) Myaka iinda ku 2,500 yainda, musinsimi Daniele wakapegwa cilengaano cabami bajisi nguzu zyakweendelezya nyika yoonse amazwanga aakali kuyooba akati kabo kusikila “kumamanino aciindi.” Wakaambilwa kuti bupanduluzi bwazilengaano eezyi buya kuzyibwa kuciindi eeco. (Daniele 8:17, 19; 11:35, 40; 12:9) Alimwi Daniele wakalemba kuti: “Lino mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.”—Daniele 2:44.

Jesu Kristo wakaamba kujatikizya “mamanino” naakali kwiingula mubuzyo uujatikizya “citondezyo cakubako [kwakwe] acamamanino aabweende bwazintu.” (Matayo 24:3-42, NW) Kulibonya kuti boonse bobilo, Daniele a Jesu bakali kwaamba ciindi camamanino—ikucinca kupati ooko kuya kubajatikizya bantu bapona abaabo bakali kupona kaindi munyika. Daniele wakalemba mamanino aamfwulumende zyoonse zili munyika. Jesu wakaamba “mamanino aabweende bwazintu.”

Sena mweelede kubikkila maano kutegwa muzyibe ncaatondezya Mazuba aa Mamanino? Inzya. Bantu boonse baleelede kubikkila maano akaambo kakuti balijatikizidwe. Nokuba boobo, bantu banji balaaubya-ubya makani aaya. Ibbaibbele lyakasinsima kuti: “Kumazuba aakumamanino kuyoosika basabuzi beenda muzisusi zibi zyamyoyo yabo beni, bayoosabula cakwaamba kuti, Ino kuli kuli kuboola kwakwe ukwakasyomezegwa? Nkaambo kakuti kuzwa kuciindi nibakafwa mataateesu, zintu zyoonse zicili mbubonya mbozyakabede kuzwa kumalengelo.” (2 Petro 3:3, 4) Masimpe, bantu banji bayeeya kuti zyintu zyakacitika kaindi ziya kucitika alimwi akuti bantu banoopona akufwa mane kukabe kutamani.

Sena kuli bumboni butondezya kuti masimpe tupona mumazuba aamamanino aakaambwa mu Bbaibbele? Atubone.