Ncolyaamba Bbaibbele

Ndilili Muntu Nakonzya Kubelesya Nguzu Kutegwa Alikwabilile?

KUYOBEKA kwamupa kuti mubuke akati kamasiku. Mwamvwa mijiinci. Mubbi wanjila muŋanda. Akaambo kakuyoowa, moyo uladunta tamuzyi acakucita.

Cintu eeci cilakonzya kucitika kumuntu uuli woonse. Zyintu zibi zilacitika mumasi manji. Akaambo kakuyoowa kuti zyintu zibi zilakonzya kubajatikizya, bantu banji balalikwabilila kwiinda mukuula zilwanyo naa kwiiya kulwana. Mfwulumende zimwi zyazumizya bantu bamucisi mobakkala kubelesya zilwanyo kutegwa kabalikwabilila. Pele ino ncinzi Bbaibbele ncolyaamba? Sena muntu ulizumizyidwe kubelesya nguzu kutegwa alikwabilile naa kukwabilila mukwasyi wakwe?

Leza Takuyandi Kulwana

Ibbaibbele talizumizyi kulwana. Sintembauzyo Davida wakaamba boobu kujatikizya Jehova Leza: “Moyo wakwe ulisulide basikufumpa.” (Intembauzyo 11:5) Leza wakabanyonyoona bantu banji basinku kubikkilizya abantu bakwe akaambo kankondo nzyobakali kucita abulowa mbobakatila. (Joeli 3:19; Mika 6:12; Nahumu 3:1) Ikuti muntu wafwa akaambo kabuyamba bwamuntu umwi, wakali mulandu mupati mu Mulawo ngobakapedwe bana Israyeli.—Deuteronomo 22:8.

Ibbaibbele likulwaizya bantu kutazwangana akuba aluumuno lyoonse. Kulwana kanji-kanji kulatalika kwiinda mukunyemezyanya.  Ibbaibbele lyaamba kuti: “Na taakwe inkuni, mulilo ulazima; Na taakwe sikuvwiya, inkondo ilamana.” (Tusimpi 26:20) Kukkazyika moyo kanji-kanji kupa kuti muleke kunyema alimwi kutabi nkondo. Mwaapostolo Paulo wakalemba kuti: “Anooli kwakonzeka, nkukuti mbuli mbumukonzya nubeni, amukalane abantu boonse caluumuno.”—Ba-Roma 12:18.

Ikuti Mwakongwa

Ikuba muluumuno tacaambi kuti kunyina bantu bakonzya kumulwana pe. Bakombi ba Leza basyomeka kuzwa kaindi bali kupenzyegwa. (Matalikilo 4:8; Jobu 1:14, 15, 17) Ikuti muntu wayaanya cigwebenga cijisi mfwuti, ncinzi ncayeelede kucita? Jesu wakalailila kuti: “Utamutonteeki muntu mubi.” (Matayo 5:39) Alimwi wakaamba kuti: “Uukunyanga ngubo utamukasyi ecibaki.” (Luka 6:29) Jesu kunyina naakazumizya kubelesya zilwanyo kutegwa tukwabilile zyintu zyakumubili. Ikuti wasikilwa cigwebenga cijisi mfwuti, muntu musongo uya kumupa zyintu zyakwe zyajisi. Masimpe, buumi bulayandika kapati kwiinda zyintu zyakumubili.

Kunze lyaboobo, ino mbuti kuti naa muntu uyanda kujaigwa acigwebenga? Mulawo Leza ngwaakapa bana Israyeli bansiku ulakasalazya kaambo aaka. Ikuti mubbi wajatwa masyikati akujaigwa, ooyo wamujaya wakali kupegwa mulandu wakujaya muntu. Eeci cakali boobu nkaambo kakuti mubbi tanaakali kuyandika kujayigwa ikuti wajatwa, wakeelede buyo kusubulwa kweelana amulawo. Nokuba boobo, ikuti mubbi wajayigwa masiku, mwiniŋanda tanaakali kupegwa mulandu nkaambo kakuti cakali kukatazya kuti abone ncaakali kucita muntu ooyo akuzyiba makanze ngaakajisi. Mwiniŋanda ikuti wabona kuti mukwasyi wakwe uli muntenda, wakeelede kuukwabilila.—Kulonga 22:2, 3.

Aboobo, Ibbaibbele litondezya kuti muntu ulakonzya kulikwabilila naa kukwabilila mukwasyi wakwe ikuti kakuli wabalwana. Ulakonzya kuleya fwaindi naa kulikwabilila munzila iimwi naa kumuuma awalo kutegwa atazumanani. Makanze ngakuyanda kuti aleke kumulwana. Ikuti sikumulwana walicisa kapati naa wafwa mubukkale buli boobu, eeci inga tiicabonwa kuti mwacita caali.

Lukwabililo Lugwasya Kapati

Aboobo, kuli bukkale bukonzya kupa kuti kulikwabilila kuzumizyigwe. Bantu balijisi nguzu zyakulikwabilila akukwabilila bayandwa babo kubantu bayanda kubacisa naa kubajaya. Ikuti kamutakonzyi kuccija, kunyina mulawo wamu Bbaibbele uukasya kulikwabilila. Nokuba boobo, cintu camaano ncotweelede kucita, nkutakazyanya ambabo kutegwa kutabi kulwana.—Tusimpi 16:32.

Ibbaibbele litukulwaizya ‘kuyandaula luumuno akulutobela’ mubuumi bwesu boonse. (1 Petro 3:11) Eeyi nenzila mbotu iikonzya kupa kuti katupona muluumuno.

SENA KULI NOMWAKABUZYIDE KUTI?

▪ Nkaambo nzi ncotuteelede kulwana?—Intembauzyo 11:5.

▪ Ninzila nzi yamaano njotweelede kutobela notukwabilila zyintu zyakumubili?—Tusimpi 16:32; Luka 12:15.

▪ Mbuti mbotweelede kucita kutegwa kutabi ntenda notuzwangana?—Ba-Roma 12:18.

[Majwi aakwelelezya sikubala aali apeeji 11]

Ibbaibbele litondezya kuti muntu ulakonzya kulikwabilila naa kukwabilila mukwasyi wakwe ikuti kakuli wabalwana