Bafwide Balakonzya Kupona Alimwi!

MUCISOBANO cakatondezyegwa mucipekupeku imyaka iili mbwiibede yainda, mulombwana umwi wakatondezyegwa kaimvwi afwaafwi acuumbwe camuyandwa wakwe. Mulombwana ooyu wakati: “Lyoonse bamaama bakali kundaambila kuti bantu boonse baya kufwa buzuba bumwi.” Kumane, muncini ngobabelesya kufwotola nowakagamikwa amajwi aakalembedwe acuumbwe, mulombwana ooyu wakayungizya kuti: “Kubota nocatali boobo.”

Majwi aaya atondezya mbobalimvwa ibanji bakafwidwa muyandwa wabo. Masimpe, lufwu ngusinkondoma! Nokuba boobo, Leza utusyomezya kuti: “Sinkondonyina musyaalizi uuyoolobesegwa ndufu.” (1 Ba-Korinto 15:26) Pele ino nkaambo nzi ncotufwida nokuba kuti twakalengwa munzila yakuti katupona  kukabe kutamani? Ino lufwu luyakulobesyegwa buti?

Ncotucembaalila Akufwa

Ikujatikizya Jehova Leza, Mulengi wesu, Ibbaibbele lyaamba kuti: “Milimo yakwe yoonse ililuleme.” (Deuteronomo 32:4; Intembauzyo 83:18) Muntu wakusaanguna, Adamu, wakalengwa kalondokede alimwi wakali kukonzya kupona kukabe kutamani anyika mu Edeni, mumuunda wa Paradaiso mwaakamubikka Leza. (Matalikilo 2:7-9) Ino ncinzi cakapa kuti Adamu azwe mumunzi ooyu wa Paradaiso, acembaale akufwa?

Bwiinguzi mbwakuti: Adamu wakaalilwa kutobela mulawo wakuti atalyi micelo yacisamu cimwi. Cakutainda mumbali, Leza wakamucenjezya Adamu cakali kuya kumucitikila ikuti walya micelo eeyo kwiinda mukumwaambila kuti: “Ncobeni uuyoofwa.” (Matalikilo 2:16, 17) Adamu wakacita mbumunya mbwaakacita mukaintu wakwe, Eva, awalo wakatyola mulawo ooyu, aboobo Leza wakabatanda mumuunda wa Edeni. Ikaambo kakapa kuti Leza abweze ntaamu eeyi mpoonya-mpoonya kalisalede. Bbaibbele lyaamba kuti: “Kuti [Adamu] atatandabiki ijanza lyakwe akucela micelo yamusamu wabuumi [uuli mumuunda], atalyi njiyo, ataponi mane kukabe kutamani.”—Matalikilo 3:1-6, 22.

Adamu a Eva bakafwa akaambo kakutamvwa, pele ino nkaambo nzi bana babo boonse ncobacembaalila akufwa? Nkaambo kakuti bakakona cibi kuzwa kuli Adamu, alimwi cibi cakapa kuti bana bakwe boonse batalondoki akufwa. Ibbaibbele lipandulula kuti: ‘Cibi cakanjila munyika kumaanza aamuntu omwe buyo Adamu, alwalo lufwu nkaambo kacibi, nkabela mbubonya obo lufwu mbulwakazida bantu boonse, nkaambo kakuti boonse babisya.’—Ba-Roma 5:12.

Bafwide Balakonzya Kupona Alimwi

Mbubwenya mbotwabala kale, lufwu ‘luyoolobesyegwa’—ee, luya kunyonyoonwa kukabe kutamani! (1 Ba-Korinto 15:26) Ino eeci ciya kucitwa buti? Ibbaibbele lipandulula kuti: “Kubululami bwamuntu omwe kulazida bantu boonse lululamiko lwabuumi.” (Ba-Roma 5:18) Ino ncinzi cikonzya kupa kuti bantu balulame mumeso aa Leza akujana buumi butamani?

Mbubambe mbwaakabikka Leza bwakumana cibi ncobakakona bantu boonse kuzwa kumuntu wakusaanguna, Adamu. Ibbaibbele lipandulula kuti: “Caabilo ca-Leza mbuumi butamani bwamuli-Kristo Jesu Mwami wesu.” (Ba-Roma 6:23) Ikujatikizya bubambe oobu bupa kuti bantu baambwe kuti mbalulami akupegwa buumi, Jesu wakati: “Obuya Leza mbwaakayandisya nyika [naa bantu], wakapa Mwanaakwe simuzyalwa alikke, kuti umwi umwi uumusyoma atafwidilili, pele abe abuumi ubutamani.”—Johane 3:16.

Amuyeeye buyo mbwatuyanda Leza a Mwanaakwe, Jesu Kristo, iwakapenga kapati akaambo kandiswe. Imwaapostolo Paulo wakalemba kuti: “Mwana a-Leza, . . . wakandiyanda akulyaaba nkaambo kangu.” (Ba-Galatiya 2:20) Ino nkaambo nzi Jesu ncali nguyo alikke wakali kukonzya “kwaaba buumi bwakwe, [kabuli] cinunuzyo” cesu akutuvwuna kulufwu luboola akaambo kacibi?—Matayo 20:28.

Jesu alikke nguwakali kukonzya kwaaba buumi bwakwe kabuli cinunuzyo akaambo kakuti walo alikke nguwatakakona cibi kuzwa kumuntu wakusaanguna, Adamu. Nkaambo nzi ncaatakakona cibi? Nkaambo kakuti ibuumi mbwaakali kupona Jesu kujulu bwakalonzyegwa munzila yamaleele akutolwa mwida lya Mariya iwakali nakalindu. Aboobo, mbubwenya mungelo mbwaakamwaambila Mariya, mwanaakwe wakali “Uusalala . . . Mwana a-Leza.” (Luka 1:34, 35) Nkakaambo kaako Jesu ncaitilwa kuti “Adamu musyaalizi” alimwi ncaatakakonena cibi kuzwa ku “Muntu mutaanzi Adamu.” (1 Ba-Korinto 15:45) Mbwaanga tanaakajisi cibi, Jesu wakali kukonzya kwaaba buumi bwakwe kuba “cinunuzyo ceelene”—ibuumi bwakwe bwakaleelene abuumi bwamuntu wakusaanguna wakalondokede.—1 Timoteo 2:6, NW.

 Kwiinda mububambe bwacinunuzyo, Leza wakapa kuti tukonzye kujana ceeco ncaakanyonyoona muntu mutaanzi Adamu, nkokuti buumi butamani muparadaiso anyika. Pele kutegwa ibunji bwabantu bakajane cilongezyo eeci, beelede kubusyigwa. Tabuliboteli kaka bulangizi oobu! Pele sena bubuke nciloto buyo?

Citupa Kusyoma Mububuke

Sena inga catukatazya kusyoma kuti Jehova Leza iwakalenga zyintu zyoonse zipona ulijisi nguzu zyakulengulula muntu? Amuyeeye buyo bubambe bujatikizya kumita—naa kuba ada—Leza mbwaakapa kuti bucitike kumukaintu wakusaanguna. “Adamu wakaswanana a-Eva,” eelyo nokwakainda myezi iibalilwa kufwuka, Eva wakazyala mwana mucinkozya cabo. (Matalikilo 4:1) Cilakatazya kuzyiba mbwaakali kuyabukomena mwana mwida lya Eva, eeci caambwa kuti maleele noliba lino!—Intembauzyo 139:13-16.

Ibanji taabagambyi makani aakuzyala akaambo kakuti mbanji bantu bazyalwa abuzuba. Nokuba boobo, ibanji tabasyomi kuti bafwide balakonzya kubusyigwa. Eelyo Jesu naakaambila bantu bakali kulila mwana musimbi wakafwa kuti baleke kulila, “bakamuseka” akaambo kakuti bakalizyi kuti musimbi ooyo wakalifwide. Pele Jesu wakaambila mwana musimbi ooyo kuti: “Buka! Ndilyonya wakabuka akunyamuka, watalika kwiimaima.” Twaambilwa kuti: “Bantu [bakaliko] bakakankamana kapati.”—Maako 5:40-43, BT; Luka 8:51-56.

Eelyo Jesu naakaamba kuti cuumbwe camweenzinyina Lazaro cijalulwe, Marta, imucizyi wa Lazaro wakakazya akwaamba kuti: “Kuciindi cino ulanunka, nkaambo ulifwide mazuba one.” Pele amuyeeye buyo mbobakakkomana eelyo Jesu naakamubusya Lazaro! (Johane 11:38-44) Ibanji bakaazyiba maleele ngaakali kucita Jesu. Johane Mubbapatizi naakali muntolongo, basikwiiya bakwe bakamwaabila milimo njaakali kucita Jesu kuti: “Bafwide ba[la]busigwa.”—Luka 7:22.

Kupona Alimwi Kwiinda Mububuke

Ino nkaambo nzi Jesu ncaakacitila maleele aaya mbwaanga aabo bakali kubusyigwa bakaciswa akufwa alimwi? Wakacita maleele aaya kutegwa atondezye kuti ncaakanyonyoona Adamu mutaanzi—buumi butamani muparadaiso anyika—cilakonzya kujanwa alimwi. Kwiinda mukubusya bantu, Jesu wakatondezya kuti mukuya kwaciindi tuulunzuma twabantu baya “[ku]kona nyika” alimwi “bayookala alinjiyo lyoonse.”—Intembauzyo 37:29.

Icikkomanisya ncakuti, tulakonzya kuba akati kabaabo bajisi bulangizi oobu butaliboteli bwakupona kukabe kutamani ikuti naa twazumanana “kukomba” Leza. Ibbaibbele lyaamba kuti kukomba Leza “kulijisi cisyomezyo casunu acaciindi ciciza.” Ibuumi bunooliko “[ku]ciindi [eeco] ciciza” alimwi bwaambwa kuti “mbuumi bwini-bwini.”—1 Timoteo 4:8; 6:19, BT.

Lino atulange-lange mbobuya kuba buumi bwini-bwini, nkokuti buumi bwamunyika mpya yabululami.

[Cifwanikiso icili apeeji 22]

“Bantu bakakankamana kapati”