Mbomukonzya Kukkala Kabotu Mucikwati

CIKWATI cilakonzya kukozyanisyigwa alweendo, nzinji zicitika mulweendo—zimwi zilakondelezya, zimwi zilacisizya moyo. Zyintu zitayeeyelwi zilakonzya kucitika zyalo zinga zyapa kuti kube mapenzi, amwi inga kaalibonya mbuli kuti taakonzyi kumanizyigwa. Nokuba kuti zimwi ziindi balaba abuyumu-yumu, ibanji balazwidilila mulweendo oolu alimwi balakkomana. Masimpe, tacaambi kuti banabukwetene bakkala kabotu tabajisi mapenzi. Banabukwetene bakkala kabotu mbabaabo bacikonzya kumana mapenzi aabasikila.

Ino muyeeya kuti ncinzi cinga capa kuti banabukwetene kabakkala kabotu akukkomana mucikwati? Bunji bwabanabukwetene balimvwa kuti bayandika busolozi mucikwati cabo. Lulayo lugwasya alimwi lusyomeka kapati luzwa kuli Sikutalisya lukwatano—Jehova Leza. Nokuba boobo, ikwiile kuba a Jwi lyakwe lyakasololelwa amuuya Ibbaibbele Lisetekene, takukonzyi kwaamana naa kupa kuti kutabi mapenzi. Pele, lilijisi busolozi bugwasya mbobeelede kutobela banabukwetene kutegwa kabakkala kabotu mucikwati cabo.—Intembauzyo 119:105; Ba-Efeso 5:21-33; 2 Timoteo 3:16.

Atulange-lange Magwalo—injiisyo zyamu Bbaibbele—zikonzya kumusololela kutegwa mukkale kabotu akukkomana mucikwati.

▸ Lukwatano amulubone kuti lulisetekene. “Abo mbaakakakatizya Leza muntu atabapambukanyi.” (Matayo 19:6) Imulengi wakatalisya bubambe bwalukwatano ciindi naakapa muntu mutaanzi, Adamu, imukaintu uutegwa Eva. (Matalikilo 2:21-24) Kristo Jesu, iwakalibonena ameso nibakakwatana bantu bakutaanguna katanaboola anyika, wakaamba kuti nibakakwatana ba Adamu a Eva tiibakeelede kulekana pe. Wakati: “Sa tamubalide kuti oyo iwakabalenga kuzwa kumatalikilo wakabacita baalumi abanakazi? Alimwi wakaamba kuti, Nkaambo kaako mwaalumi asie wisi abanyina, akakatile mukakwe, kuti aba bobile babe nyama yomwe. Lino tabacili bobile pe, baba nyama yomwe. Nkaambo kaako, abo mbaakakakatizya Leza muntu atabapambukanyi.”—Matayo 19:4-6.

Jesu naakaamba kuti “abo mbaakakakatizya Leza,” tanaakali kwaamba kuti Leza nguukwasya bantu. Muciindi caboobo, wakali kupandulula kuti lukwatano lwakatalisyigwa a Leza aboobo lwakeelede kubonwa kuti lulisetekene. *

Masimpe, bamalumi abamakaintu kunyina nobanga bayanda kukkala mulukwatano mutakwe luyando alukkomano. Muciindi caboobo, ncobayanda nkukkomana akukkala kabotu mucikwati. Balakonzya kukkomana mucikwati ikuti batobela malailile aa Mulengi aagwasya aali mu Bbaibbele.

Akaambo kakuti toonse tatulondokede, zimwi ziindi kulaba kwiimpana. Nokuba boobo, ikanji-kanji ikukkala kabotu mucikwati takuli buyo akaambo kakweendelena kwabanabukwetene pele ciya buyo mbuli mbobacita zyintu nobaimpana. Aboobo, iciyandika kapati mulukwatano nkumana mazwanga munzila yaluyando, nkaambo luyando “ncecaanzyo cabuumi bulondokede.”—Ba-Kolose 3:14

▸ Amwaambaule cabulemu. “Majwi aabantu bamwi alayasa mbuli ipanga, pele lulimi lwabasongo lulaponya.” (Tusimpi 12:18) Basikuvwuntauzya bakajana kuti mubandi watalika kabotu ulamana kabotu. Aboobo, ikuti mubandi  watalika cabulemu ikanji-kanji ulamana cabulemu. Kulubazu lumwi, cilacisizya moyo ikuti muntu ngomuyanda kapati wabelesya majwi mabi. Aboobo, amwaapailile makani aaya kutegwa kamubandika cabulemu alimwi munzila yaluyando. (Ba-Efeso 4:31) Ba Haruko * baku Japan ibakakwatwa myaka iili 44 yainda, bakaamba kuti: “Nokuba kuti tulabona mbotulezya, tulasoleka kwaambaula cabulemu alimwi akubikkila maano kububotu mbwacita umwi. Eeci catugwasya kuti katukkala kabotu mucikwati.”

▸ Amube abuuya akuba batete moyo. “Amuusilane buuya, mukabe batete moyo.” (Ba-Efeso 4:32) Ciindi banabukwetene nobazwangana, kanji-kanji cipa kuti boonse banyeme. Mukaintu waku Germany wazyina lya Annette iwakakwatwa myaka iili 34 yainda alimwi ukkomene mucikwati cakwe wakati: “Tacili cuuba-uba kuumuna buyo ciindi notyompedwe—ulakonzya kwaamba zyintu zikonzya kunyemya mweenzinyoko zyalo zikonzya kuyungizya buyo penzi apenzi.” Ikuti mwasoleka canguzu kuba abuuya alimwi batete moyo, mulakonzya kupa kuti kube luumuno muŋanda yanu.

▸ Amulibombye. “Mutaciti cintu niciba comwe cabbivwe nanka cakulisumpula, pele umwi aumwi akati kanu alibombye mumoyo, akuyeeya kuti mweenzuma mubotu kwiinda ndime.” (Ba-Filipi 2:3) Mazwanga manji alatalika akaambo kakuti banabukwetene akaambo kakulisumpula bapa mulandu ngobakwetene limwi muciindi cakulibombya akubona mbobakonzya kulimana penzi. Kulibombya naa kulicesya kulakonzya kumugwasya kuti mutani kuyeeyi kuti ndinywe muluzi lyoonse nomuzwangana.

▸ Mutafwambaani kukalala. “Utafwambi kukalala ciindi cakubijilwa.” (Mukambausi 7:9) Mutabi aciyanza cakukazya mweenzinyoko naa kufwambaana kulikwabilila ikuti naa tanaakkomana acintu ncomwaamba naa kucita. Muciindi caboobo, amuswiilile akuzuminizya ncaamba mweenzinyoko. Mweelede kuyeeya kamutanaingula. Banabukwetene banji balamuka kuzyiba kuti iciyandika kapati nkuyandana muciindi cakuzwangana.

▸ Amuzyibe ciindi nomweelede kuumuna. “Abe amutwe muuba, amuke kwaamba, amuke kunyema.” (Jakobo 1:19) Cakutadooneka, ikubandika kabotu ncimwi cazyintu zipa kuti kube lukkomano mucikwati. Nkaambo nzi Bbaibbele ncolyaamba kuti kuli “ciindi cakuumuna?” (Mukambausi 3:7) Eeci cilakonzya kuba ciindi cakuswiilisisya, cibeela ciyandika kapati mukubandika icipa kuzyiba bwini mbwalimvwide ngomukwetene limwi alimwi akaambo ncalimvwa boobo.

 ▸ Amube alubomba alimwi amuswiilisisye. “Amusekelezyanye abo basekelela, akulilana abo balila.” (Ba-Roma 12:15) Lubomba lulayandika kapati kutegwa mubandike kabotu nkaambo lupa kuti mulimvwe mbwalimvwa ngomukwetene limwi. Lulakonzya kupa kuti kamulemekana akubikkila maano kuzyintu nzyaamba naa nzyayeeya mweenzinyoko. Nella, mukaintu waku Brazil iwakakwatwa myaka iili 32 yainda wakaamba kuti: “Lyoonse notubandika mapenzi ngotujisi, ndilaakuswiilisisya kutegwa ndimvwisye ncobayeeya ambobalimvwa balumi bangu ba Manuel.” Ciindi ngomukwetene limwi naambaula, ‘nceciindi canu cakuumuna’ akuswiilisisya.

▸ Kamulumba. “Amube amyoyo yakulumba.” (Ba-Kolose 3:15) Banabukwetene bamvwana balalumbaizyanya. Nokuba boobo, banabukwetene bamwi tababikkili maano kukaambo aaka kayandika kapati mukubandika kabayeeya kuti nokuba kuti tabaambi, mweenzinyina ulizyi kale kuti ulalumbwa. Ba Dr Ellen Wachtel bakaamba kuti: “Banabukwetene banji balakonzya kupa kuti mweenzinyina alimvwe kuti ulalumbwa pele kanji-kanji tabaciti oobo.”

Ikwaambisya bamakaintu bayandika kulumbaizyigwa akuyandwa abalumi babo. Nobalumi mulakonzya kupa kuti nywebo amukaintu wanu kamukkomana kwiinda mukumulumbaizya mukaintu wanu akaambo kazyintu zibotu nzyacita naa akaambo kamoyo mubotu ngwajisi.

Cilayandika kutondezya luyando mumajwi amumicito. Kunze lyakwaamba buyo kuti “ndilakuyanda ceeni,” nobalumi mulakonzya kupa kuti mukaintu wanu alimvwe kabotu kwiinda mukumumyonta, kumukumbata akumweta-mweta. Eeci caamba kuti mulamuyanda kapati mukaintu wanu. Amumutumine luwaile naa mumulembele kagwalo aluwaile akumwaambila kuti, “Ndakuyeeya ceeni” naa kuti “Ino zyintu zyeenda buti ooko?” Ikuti naa ciindi nimwakali kweebana mwakali kwaamba majwi aaya pele lino mwakacileka, inga cainda kugwasya ikuti mwatalika alimwi. Amuzumanane kubona zimukkomanisya ngomukwetene limwi.

Majwi aabanyina Mwami Lemueli waku Israeli yansiku aleelela kapati mumakani aaya. Bakati: “Mulumaakwe ulamutembaula; ulati, Banakazi banji bacita kabotu, pele yebo wabainda boonse.” (Tusimpi 31:1, 28, 29) Ino ndilili nomwakamulumbaizya mukaintu wanu? Andinywe nobakaintu, ndilili nomwakacitide oobo kubalumi banu?

▸ Amufwambaane kulekelelana. “Zuba litabbili kamunyemede.” (Baefeso 4:26, BT) Mulukwatano, nyoonse mulalubizya. Aboobo, ikulekelelana kulayandika. Ba Clive aba Monica  baku South Africa, ibakakwatana myaka iili 43 yainda, babona kuti lulayo oolu lwamu Bbaibbele lulagwasya kapati. Ba Clive bakaamba kuti: “Tulaibelesya njiisyo iili ku Ba-Efeso 4:26, alimwi tulalekelelana nkaambo tulizyi kuti eeci cilamukkomanisya Leza. Eeci cilatukkomanisya, citupa kuba amanjezeezya mabotu akoona kabotu.”

Kasimpi kansiku ikagwasya kakati ncibotu: “Kulekelela milandu.” (Tusimpi 19:11) Annette iwaambwa kale wakayungizya kuti: “Ikuti banabukwetene kabatalekelelani tabakonzyi kukkala kabotu pe.” Wakapandulula kuti: “Ikuti naa bazumanana kucimwa akutasyomana, mukuya kwaciindi inga capa kuti ŋanda ifwe. Akaambo kakulekelelana, banabukwetene inga kabamvwana kapati.”

Ikuti naa mwamulubizyila ngomukwetene limwi, mutayeeyi kuti ulamulekelela akuluba buyo. Kutegwa kube luumuno, muyandika kucita cintu cimwi cibakatazya kapati banabukwetenene: Ooku nkuzumina kuti mwalubizya. Nokuba boobo, amujane nzila yakwaamba majwi aakulibombya mbuli aakuti: “Amundijatile, ndalubizya.” Ikulilekelela kuya kumupa kuba abulemu, kusyomana akukkalikana mumizeezo.

▸ Amuzumanane kusyomeka kuli ngomukwetene limwi. Mulumi amukaintu “tabacili bobile pe, baba nyama yomwe. Nkaambo kaako, abo mbaakakakatizya Leza muntu atabapambukanyi.” (Matayo 19:6) Mwakakonka kuli Leza akubantu kuti muya kukkala antoomwe nomuba mumapenzi. * Nokuba boobo, ikusyomeka kumuntu ngomukwetene limwi takuli kwiile kwiizya mulawo pe. Pele, iceelede kumukulwaizya kucita boobo nduyando lwini-lwini ndomujisi akati kenu alimwi ncitondezyo cakuti mulalemekana alimwi mulamulemeka Leza. Aboobo, mutaimwayi ŋanda yenu akaambo kukusobana nkwela abantu bambi; mutabi basimeso-meso.—Matayo 5:28.

▸ Kulyaaba kupa kuti mucizuzikizye cisyomezyo canu. “Tamweelede kuyeeya kuligwasya nubeni luzutu, pe, umwi aumwi uleelede kwiingasila kugwasya mweenzinyina.” (Ba-Filipi 2:4) Ikubikkila maano kuzyintu nzyayanda ngomukwetene limwi muciindi cakulibikkila buyo maano, nenzila imwi iikonzya kupa kuti muzumanane kusyomeka. Ba Premji, ibakakwata myaka iili 20 yainda, balaakubagwasya kubeleka milimo yaaŋanda bakaintu babo ibabeleka mulimo wakumubili. “Ndilaakumugwasya Rita ikujika, kusalazya akucita milimo imwi kutegwa kakonzya kuba aciindi cakucita zyintu zimwi zimukkomanisya.”

Kusolekesya Kulakonzya Kumupa Kulongezyegwa

Zimwi ziindi, ibamwi balakonzya kuleka kucita zyintu zikonzya kubakkomanisya mucikwati akaambo kamapenzi ngobajana. Pele muciindi cakucita boobo, mapenzi aaya atamulesyi kuzuzikizya cisyomezyo canu naa kwiimwaya ŋanda njomwabelekela kwaciindi cilamfwu.

Ba Sid, ibakakwata myaka iili 33 yainda alimwi ibakkomene mulukwatano lwabo bakati: “Ikuti mwasoleka canguzu kutegwa kamukkala kabotu mucikwati, Jehova ulakonzya kumulongezya.” Ikubelekela antoomwe muziindi zikatazya amuziindi zikkomanisya kuya kumugwasya kuti muzumanane kukkala kabotu mucikwati canu.

Bupanduluzi buyungizidwe

[Majwi aakwelelezya sikubala aali apeeji 6]

Ibbaibbele lilakonzya kumugwasya mucikwati canu

[Kabbokesi/Cifwanikiso icili apeeji 7]

Nomuyanda kubandika penzi limwi

▪ Amubikke ciindi nomutakatede nyoonse.

▪ Mutanikupani milandu; amubikkile maanu kuzyintu zibotu zyacita umwi.

▪ Mutani kunjilani mukanwa; kamupana ciindi cakwaambaula.

▪ Kamuzuminizya naambaula ngomukwetene limwi.

▪ Amukkazyike moyo, nokuba kuti tamukazumini kaambo kaambwa.

▪ Amunyoneke.

▪ Ikuti naa mwalubizya amulilekelele.

▪ Kamulumba alimwi amutondezye luyando.

[Kabbokesi/Cifwanikiso icili apeeji 8]

Kutegwa mukkale kabotu mucikwati

▪ Amutobele njiisyo zyamu Bbaibbele zipa kukkomana mucikwati.

▪ Amujane ciindi cakuba angomukwetene limwi.

▪ Kamuyandana.

▪ Amusyomeke akulyaaba.

▪ Amube aluzyalo abulemu.

▪ Amugwasyanye milimo yaaŋanda.

▪ Amwaambaule munzila ikonzya kumupa kuzumanana kubandika.

▪ Amwaambe twaambo tusesya akujana ciindi cakulikondelezya.

▪ Amuzumanane kucita zyintu zikonzya kumugwasya mucikwati canu.

[Kabbokesi/Cifwanikiso icili apeeji 9]

Amuyeeye twaambo ootu

▪ Ncinzi ncondeelede kucita kutegwa katukkala kabotu muŋanda yesu?

▪ Mbuti mbondikonzya kucita oobo?