Ncinzi Cikonzya Kulubila?

TAKU cikwati citajisi mapenzi. Masimpe ngakuti, nobaba banabukwetene beendelana kapati tabamvwani zimwi ziindi. Aboobo zimwi ziindi balakonzya kuba amapenzi. Mbubonya mbuli nkalaye mboikonzya kunyonyoona cintu cakapentedwe, kuli zyintu ziindene-indene zikonzya kweeta buyumu-yumu mucikwati. Kutegwa tuzyibe nzyotweelede kucita kutegwa tumane mapenzi aamucikwati, atusaangune kulanga-langa zyintu zimwi zikonzya kulubila.

Ziindi Zityompya

Ibbaibbele lyakaambila limwi kuti bantu banji muciindi cesu “bayooba basikuliyanda, basimuyanda mali, basimantumbwaambwa, basikakomokomo, . . . batalumbi, batakombi, basikancimwa, basimfundiilili, abasiluvuya lwakutaminizya, batalyeendeleli, basitunyetunyetu, batayandi bubotu, basimusuzyanya, basikainya, basikulisumpula.” (2 Timoteo 3:2-4) Bube buli boobo, bulakonzya kupa kuti bantu batalondokede kabatamvwani, kabatabandiki kabotu alimwi akubelesya majwi mabi.

Sikuvwuntauzya umwi wakaamba kuti: “Banabukwetene banji balakatazyigwa mumizeezo babona mapenzi aabacitikila. Tubona kuti . . . , tulijisi makani manji aamba mbotukonzya kuyumya zikwati zyesu . . . Nokuba boobo, kuli mapenzi manji mubuumi alimwi amapenzi aamali aapa kuti katutamvwani mumaanda.”

Ikulangila Zyintu Zitakonzyeki

Sikulaya banabukwetene wakaamba kuti: “Icipa kuti bantu kabatyompwa mulukwatano nkulangila zyintu zitakonzyeki.” Bunji bwabanabukwetene balatyompwa akaambo kakubona kuti zyintu nzyobakali kulangila mucikwati tazicitiki alimwi akuti ngobakwetene limwi ujisi tumpenda ntobatakalizyi. Balakopana mumizeezo akaambo katumpenda ntobatakalizyi naa ntobakali kuyeeyela kuti tuyakumana.

Aboobo, Ibbaibbele lyaamba kuti banabukwatene balakonzya kujana “mapenzi aakunyama.” (1 Ba-Korinto 7:28) Nkaambo nzi ncokuli boobo? Nkaambo kakuti bantu bobilo batalondokede kuti bakkala antoomwe, mukuya kwaciindi tumpenda twabo tulalibonya.

Kunze lyaboobo, bantu banji bayanda kuti kabakkomana mucikwati nokuba kuti nzyobacita tazibapi kukkomana. Balo bayeeya buyo kuti baakukwatana banakukkomene lyoonse.  Ciindi nobabona kuti zyintu nzyobakali kulangila tazicitiki, balatyompwa akunyongana kapati. Bunji bwaziindi, aabo bajisi mizeezo iimpene kapati azyintu zicitika ncobeni mucikwati mbabatyompwa kapati.

Penzi Lyakubandika

Caboola kupenzi lyakutabandika kabotu, ncinzi ncobakonzya kucita banabukwetene kutegwa kabamvwana? Banabukwetene bamwi bajisi cilengwa cakutaamba zili mumoyo naa kuswiilila ncaamba ngobakwetene limwi. Alimwi muciindi cakubandika caluyando acakulikwaya, balazwangana lyoonse nokuba kuti kunyina kaambo kaya koomoonga. Kutamvwisya kaambo kupa kuti kabazwangana alimwi kwaambaula cabukali kupa kuti baleke kwaambauzyanya.

Cuusisya ncakuti, banabukwetene banji tababoni zyintu zibotu nzyacita ngobakwetene limwi alimwi nokuba kuti balakonzya kuzibona, tabalumbi. Kunze lyaboobo, akaambo kakuti mazuba aano banabukwetene banji balabeleka, kujanika kuti bamakaintu balanyema akaambo kakuti bazwa kumilimo mbabacita milimo minji yaaŋanda. Alimwi, bamakaintu banji balimvwa kuti tabayandwi.

Ino ncinzi ncomukonzya kucita kutegwa kamukkala kabotu muŋanda yanu? Amulange-lange lulayo lwamu Bbaibbele lutobela ilukonzya kumugwasya.

[Majwi aakwelelezya sikubala aali apeeji 4]

Banabukwetene bamwi bajisi cilengwa cakutaamba zili mumoyo naa kuswiilila ncaamba ngobakwetene limwi

[Majwi aakwelelezya sikubala aali apeeji 5]

Bantu banji bayanda kuti kabakkomana mucikwati nokuba kuti nzyobacita tazibapi kukkomana