Wakagwasyigwa A Sinsimuka! Cakutayeeyela

CAKALEMBWA AMULEMBI WA SINSIMUKA! WAKU BENIN

▪ Noël uujisi myaka iili 23 naakaleka cikolo kutegwa atalike mulimo waciindi coonse wa Bakamboni ba Jehova, basazinyina bakali kuyeeya kuti takacikonzyi kujana mali aakuligwasya mubuumi. Mubwini, cakamukatazya kujana mulimo uukonzya kumupa kuti kajana ciindi cakukambauka. Aboobo, cibalo cigwasya cakuti “Five Keys to Finding a Job” (Inzila Zyosanwe Zigwasya Kujana Mulimo) nicakamwaigwa mumagazini ya Sinsimuka!, Noël wakacibala ziindi zinji. * Sena eeci cakamugwasya? Inzya, pele ikutali kweelana ambwaakali kuyeeya.

Mweendelezi wacikolo cimwi naakaswaangana a Noël kakambauka kuŋanda aŋanda wakamubuzya naa wakali umwi wa Bakamboni ba Jehova. Mweendelezi wakali kuyanda mwiiyi, aboobo akaambo kakuti wakabona kuti Bakamboni ba Jehova balicibwene kuyiisya, wakabuzya Noël ikuti naa kuli muntu ngwaakazyi iwakali kuyanda mulimo wabwiiyi. Noël naakaamba kuti kunyina ngwaakazyi, mweendelezi wakamubuzya kuti, “Ino yebo tokonzyi kuyiisya?”

Noël tanaakaninga ubelekede mulimo wabwiiyi alimwi wakali akamaama. Eeli lyakali penzi akaambo kakuti kucisi ca Benin aabo bayanda kuba bamayi balasunkwa akabunga kalanganya makani alwiiyo kutegwa babone naa tabajisi kamaama. Mweendelezi ooyu wakamwaambila kuti, “Ikuti naa upase musunko, ulatalika kubeleka.”

Noël wakali kucita kabotu mu Cikolo Camulimo Weendelezyegwa a Leza icakabambilwa kugwasya bantu kucizyiba kwaambaula kabotu kubuleya alimwi cilacitwa amvwiki mumbungano zya Bakamboni ba Jehova. Wakali kupa makani aabuleya mumbungano yankobazwa. Nokuba boobo, nocakasika ciindi cakusunkwa wakalibilika.

Iwakali kumusunka wakamupa magazini akumwaambila kuti abale cakupozya muncali omwe wakeengedwe. Noël wakamwetamweta naakabona cibalo cakuti “Inzila Zyosanwe Zigwasya Kujana Mulimo.” Wakaubala kabotu muncali ooyo amane wakapegwa cipepa cakali kuyandika.

Kumane sikumusunka wakaamba kuti bunji bwaziindi ulaakwaabala mamagazini aa Bakamboni ba Jehova. Wakaamba kuti, “Mamagazini aaya alagwasya alimwi alembedwe kabotu aboobo ndilaakwaabelesya mumisunko.”

Noël wakatalika kuyiisya alimwi mweendelezi wakali kuyanda kuti azumanane kuyiisya mumwaka wakatobela, pele walo wakakaka nkaambo wakajisi makanze ambi. Wakaitwa kwaakubelekela kuofesi yamutabi ya Bakamboni ba Jehova, asunu nkwacibede.

Bupanduluzi buyungizidwe