Zikwati Zili Mumapenzi

“Eelyo kaka ndapenga!” Sena mwakabamvwa kale bantu kabaamba boobo kujatikizya cikwati cabo? Ikuti kamukwete naa kamukwetwe, sena kuli buzuba mbomwakalimvwide boobo?

BANABUKWETENE banji bakali kuyandana kapati nobakakwatana alimwi bakali kulangila kuti banakukkomana lyoonse. Sikupa lulayo umwi wakaamba kuti: “Nibakaboola kulindime bunji bwabo tiibakajisi lusyomo lwakuti balakonzya kukkomana. Bakalityompedwe angobakwetene limwi, tiibakali kukkomana mucikwati, bakali kulimvwa kutayandwa alimwi akuti buumi bwakali bwabuyo.” Bunji bwabanabukwetene aaba tabamvwani.

Zikwati zimwi zilamana akaambo kakutyompwa akulibilika. Kubeleka milimo iiminya, milimo iibelekwa masiku akubeleka mawoola manji kupa kuti banabukwetene banji kabakatala kapati cakuti tabacijisi ciindi cakubandika angobakwetene limwi. Kuyandana akulemekana zilakonzya kumana akaambo kapenzi lyamali, kukomezya bana, kulongela kubusena bumbi, kunjila mulimo uumbi akuciswa-ciswa. Mubufwaafwi, mbwaaya buya mazuba azyintu mboziya bucinca, banabukwetene balakonzya kuleka kumvwana akaambo kakutyompwa.

Bamakaintu banji babeleka milimo yobilo—wakuŋanda akooko nkobakanjila mulimo. Eeci cipa kuti bamakaintu banji babikkile buyo maano kumulimo akubana. Kutyompwa akukatala kapati kupa kuti banabukwetene banji kabatajisi ciindi cinji cakwiizya angobakwetene limwi. Nkakaambo kaako banji ncobatyompwa akulimvwa kutayandwa. Ino nkaambo nzi zikwati zinji ncozili mumapenzi? Ino ncinzi ncomukonzya kucita kutegwa kamukkomana akukkala kabotu mucikwati?